10. දසක නිපාතය
ඒ භගවත් අර්‍හත් සම්මාසම්බුදුරජාණන් වහන්සේට නමස්කාර වේවා.
1. ප්‍රථම පණ්ණාසකය
1. ආනිසංස වර්‍ගය
10. 1. 1. 1.
කිමත්‍ථිය සූත්‍රය
මා විසින් මෙසේ අසන ලද: එක් සමයෙක්හි භාග්‍යවතුන් වහන්සේ සැවැත්නුවර සමීපයෙහි ජේතවන නම් අනේපිඬු සිටුහුගේ අරම්හි වැඩවසන සේක. එකල්හි ආයුෂ්මත් ආනන්‍ද තෙරණුවෝ භාග්‍යවතුන් වහන්සේ කරා එළඹියහ. එළඹ භාග්‍යවතුන් වහන්සේ සකසා වැඳ එකත්පස්ව හුන්හ. එකත්පස්ව හුන් ආයුෂ්මත් ආනන්‍ද තෙරණුවෝ භාග්‍යවතුන් වහන්සේට තෙල සැලකළහ:
වහන්ස, කුශල ශීලයෝ කුමක් අර්‍ත්‍ථ කොට කුමක් අනුසස් කොට ඇත්තාහු ද?
ආනන්‍දය, කුශලශීලයෝ අවිප්‍රතිසාරය (නො විපිළිසර බව) අර්‍ත්‍ථ කොට අවිප්‍රතිසාරය අනුසස් කොට ඇත්තාහ යි.
වහන්ස, අවිප්‍රතිසාරය කුමක් අර්‍ත්‍ථ කොට කුමක් අනුසස් කොට ඇද්ද?
ආනන්‍දයෙනි, අවිප්‍රතිසාරය ප්‍රාමෝද්‍යය අර්‍ත්‍ථ කොට ප්‍රාමෝද්‍යය අනුසස් කොට ඇත.
වහන්ස, ප්‍රාමෝද්‍යය කුමක් අර්‍ත්‍ථ කොට කුමක් අනුසස් කොට ඇද්ද?
ආනන්‍දයෙනි, ප්‍රාමෝද්‍යය ප්‍රීතිය අර්‍ත්‍ථ කොට ප්‍රීතිය අනුසස් කොට ඇත.
වහන්ස, ප්‍රීතිය කුමක් අර්‍ත්‍ථ කොට කුමක් අනුසස් කොට ඇද්ද?
ආනන්‍දයෙනි, ප්‍රීතිය ප්‍රශ්‍රබ්ධිය අර්‍ත්‍ථ කොට ප්‍රශ්‍රබ්ධිය අනුසස් කොට ඇත.
වහන්ස, ප්‍රශ්‍රබ්ධිය කුමක් අර්‍ත්‍ථ කොට කුමක් අනුසස් කොට ඇද්ද?
ආනන්‍දයෙනි, ප්‍රශ්‍රබ්ධිය සුඛය අර්‍ත්‍ථ කොට සුඛය අනුසස් කොට ඇත.
වහන්ස, සුඛය කුමක් අර්‍ත්‍ථ කොට කුමක් අනුසස් කොට ඇද්ද?
ආනන්‍දයෙනි, සුඛය සමාධිය අර්‍ත්‍ථ කොට සමාධිය අනුසස් කොට ඇත.
වහන්ස, සමාධිය කුමක් අර්‍ත්‍ථ කොට කුමක් අනුසස් කොට ඇද්ද?
ආනන්‍දයෙනි, සමාධිය යථාභූතඥානදර්‍ශනය අර්‍ත්‍ථ කොට යථාභූතඥානදර්‍ශනය අනුසස් කොට ඇත.
වහන්ස, යථාභූතඥානදර්‍ශනය කුමක් අර්‍ත්‍ථ කොට කුමක් අනුසස් කොට ඇද්ද?
ආනන්‍දයෙනි, යථාභූතඥානදර්‍ශනය නිබ්බිදාවිරාගය අර්‍ත්‍ථ කොට නිබ්බිදාවිරාගය අනුසස් කොට ඇත.
වහන්ස, නිබ්බිදාවිරාගය කුමක් අර්‍ත්‍ථ කොට කුමක් අනුසස් කොට ඇද්ද?
ආනන්‍දයෙනි, නිබ්බිදාවිරාගය විමුත්තිඥානදර්‍ශනය අර්‍ත්‍ථ කොට විමුත්තිඥානදර්‍ශනය අනුසස් කොට ඇතැ යි.
ආනන්‍දයෙනි, මෙසේ කුශලශීලයෝ අවිප්‍රතිසාරය අර්‍ත්‍ථ කොට අවිප්‍රතිසාරය අනුසස් කොට ඇතියහ. අවිප්‍රතිසාරය ප්‍රාමෝද්‍යය අර්‍ත්‍ථ කොට ප්‍රාමෝද්‍යය අනුසස් කොට ඇත. ප්‍රාමෝද්‍යය ප්‍රීතිය අර්‍ත්‍ථ කොට ප්‍රීතිය අනුසස් කොට ඇත. ප්‍රීතිය ප්‍රශ්‍රබ්ධිය අර්‍ත්‍ථ කොට ප්‍රශ්‍රබ්ධිය අනුසස් කොට ඇත. ප්‍රශ්‍රබ්ධිය සුඛය අර්‍ත්‍ථ කොට සුඛය අනුසස් කොට ඇත. සුඛය සමාධිය අර්‍ත්‍ථ කොට සමාධිය අනුසස් කොට ඇත. සමාධිය යථාභූතඥානදර්‍ශනය අර්‍ත්‍ථ කොට යථාභූතඥානදර්‍ශනය අනුසස් කොට ඇත. යථාභූතඥානදර්‍ශනය නිබ්බිදාවිරාගය අර්‍ත්‍ථ කොට නිබ්බිදාවිරාගය අනුසස් කොට ඇත. නිබ්බිදාවිරාගය විමුත්තිඥානදර්‍ශනය අර්‍ත්‍ථ කොට විමුත්තිඥානදර්‍ශනය අනුසස් කොට ඇත. ආනන්‍දයෙනි, මෙසේ කුශලශීලයෝ අනුපිළිවෙළින් අර්‍හත්ත්‍ව සඞ්ඛ්‍යාත අග්‍රයට පැමිණෙන්නාහයි.