4. 6.
1. ජානං සභික්ඛුකං ආරාමං අනාපුච්ඡා පවිසන්තී ද්වෙ ආපත්තියො ආපජ්ජති : පඨමං පාදං පරික්ඛෙපං අතික්කාමෙති ආපත්ති දුක්කටස්ස. දුතියං පාදං අතික්කාමෙති ආපත්ති පාචිත්තියස්ස.
2. භික්ඛුං අක්කොසන්තී පරිභාසන්තී ද්වෙ ආපත්තියො ආපජ්ජති : අක්කොසති පයොගෙ දුක්කටං, අක්කොසිතෙ ආපත්ති පාචිත්තියස්ස.
3. චණ්ඩිකතාය ගණං පරිභාසන්තී ද්වෙ ආපත්තියො ආපජ්ජති : පරිභාසති පයොගෙ දුක්කටං. පරිභාසිතෙ ආපත්ති පාචිත්තියස්ස.
4. නිමන්තිතා වා පවාරිතා වා ඛාදනීයං වා භොජනීයං වා භුඤ්ජන්තී ද්වෙ ආපත්තියො ආපජ්ජති : ඛාදිස්සාමි භුඤ්ජිස්සාමීති පටිගණ්හාති ආපත්ති දුක්කටස්ස. අජ්ඣොහාරෙ අජ්ඣොහාරෙ ආපත්ති පාචිත්තියස්ස.
5. කුලං වා මච්ඡරායන්තී ද්වෙ ආපත්තියො ආපජ්ජති : මච්ඡරායති පයොගෙ දුක්කටං. මච්ඡරිතෙ ආපත්ති පාචිත්තියස්ස.
6. අභික්ඛුකෙ ආවාසෙ වස්සං වසන්තී ද්වෙ ආපත්තියො ආපජ්ජති : වස්සං වසිස්සාමීති සෙනාසනං පඤ්ඤපෙති, පානීයං පරිභොජනීයං උපට්ඨපෙති, පරිවෙණං සම්මජ්ජති, ආපත්ති දුක්කටස්ස. සහ අරුණුග්ගමනා ආපත්ති පාචිත්තියස්ස.
7. වස්සං වුත්ථා භික්ඛුනී උභතො සඞ්ඝෙ තීහි ඨානෙහි නප්පවාරෙන්තී එකං ආපත්තිං ආපජ්ජති : පාචිත්තියං.
8. ඔවාදාය වා සංවාසාය වා න ගච්ඡන්තී එකං ආපත්තිං ආපජ්ජති : පාචිත්තියං.
9. උපොසථම්පි න පුච්ඡන්තී ඔවාදම්පි න යාචන්තී එකං ආපත්තිං ආපජ්ජති : පාචිත්තියං.
10. පසාඛෙ ජාතං ගණ්ඩං වා රුහිතං වා අනපලොකෙත්වා සඞ්ඝං වා ගණං වා පුරිසෙන සද්ධිං එකෙනෙකා භෙදාපෙන්තී ද්වෙ ආපත්තියො ආපජ්ජති : භෙදාපෙති පයොගෙ දුක්කටං. භෙදාපිතෙ ආපත්ති පාචිත්තියස්ස.
ආරාමවග්ගො ඡට්ඨො.
4. 7.
1. ගබ්භිනිං වුට්ඨාපෙන්තී ද්වෙ ආපත්තියො ආපජ්ජති : වුට්ඨාපෙති පයොගෙ දුක්කටං. වුට්ඨාපිතෙ ආපත්ති පාචිත්තියස්ස.
2. පායන්තිං වුට්ඨාපෙන්තී ද්වෙ ආපත්තියො ආපජ්ජති : වුට්ඨාපෙති පයොගෙ දුක්කටං. වුට්ඨාපිතෙ ආපත්ති පාචිත්තියස්ස.
3. ද්වෙ වස්සානි ඡසු ධම්මෙසු අසික්ඛිතසික්ඛං සික්ඛමානං වුට්ඨාපෙන්තී ද්වෙ ආපත්තියො ආපජ්ජති : වුට්ඨාපෙති පයොගෙ දුක්කටං. වුට්ඨාපිතෙ ආපත්ති පාචිත්තියස්ස.
4. ද්වෙ වස්සානි ඡසු ධම්මෙසු සික්ඛිතසික්ඛං සික්ඛමානං සඞ්ඝෙන අසම්මතං වුට්ඨාපෙන්තී ද්වෙ ආපත්තියො ආපජ්ජති : වුට්ඨාපෙති, පයොගෙ දුක්කටං. වුට්ඨාපිතෙ ආපත්ති පාචිත්තියස්ස.
5. ඌනද්වාදසවස්සං ගිහීගතං වුට්ඨාපෙන්තී ද්වෙ ආපත්තියො ආපජ්ජති : වුට්ඨාපෙති පයොගෙ දුක්කටං. වුට්ඨාපිතෙ ආපත්ති පාචිත්තියස්ස.
6. පරිපුණ්ණද්වාදසවස්සං ගිහීගතං ද්වෙ වස්සානි ඡසු ධම්මෙසු අසික්ඛිතසික්ඛං වුට්ඨාපෙන්තී ද්වෙ ආපත්තියො ආපජ්ජති : වුට්ඨාපෙති පයොගෙ දුක්කටං. වුට්ඨාපිතෙ ආපත්ති පාචිත්තියස්ස.