69. එකං සමයං ආයස්මා ච සාරිපුත්තො ආයස්මා ච උපසෙනො රාජගහෙ විහරන්ති සීතවනෙ සප්පසොණ්ඩික පබ්භාරෙ. තෙන ඛො පන සමයෙන ආයස්මතො උපසෙනස්ස කායෙ ආසීවිසො පතිතො හොති.

අථ ඛො ආයස්මා උපසෙනො භික්ඛූ ආමන්තෙසි: එථ මෙ ආවුසො, ඉමං කායං මඤ්චකං ආරොපෙත්වා බහිද්ධා නීහරථ. පුරායං කායො ඉධෙව විකිරති සෙය්යථාපි භුසමුට්ඨීති. එවං වුත්තෙ ආයස්මා සාරිපුත්තො ආයස්මන්තං උපසෙනං එතදවොච: න ඛො පන මයං පස්සාම ආයස්මතො උපසෙනස්ස කායස්ස වා අඤ්ඤථත්තං ඉන්ද්රියානං වා විපරිණාමං. අථ ච පනායස්මා උපසෙනො එවමාහ: එථ මෙ ආවුසො ඉමං කායං මඤ්චකං ආරොපෙත්වා බහිද්ධා නීහරථ. පුරායං කායො ඉධෙව විකිරති සෙය්යථාපි භුසමුට්ඨීති.

යස්ස නූන ආවුසො සාරිපුත්ත, එවමස්ස: අහං චක්ඛුන්ති වා මම චක්ඛුන්ති වා, අහං සොතන්ති වා මම සොතන්ති වා, අහං ඝානන්ති වා මම ඝානන්ති වා, අහං ජිව්හාති වා මම ජිව්හාති වා, අහං කායොති වා මම කායොති වා, අහං මනොති වා මම මනොති වා. තස්ස නූන ආවුසො සාරිපුත්ත, සියා කායස්ස වා අඤ්ඤථත්තං ඉන්ද්රියානං වා විපරිණාමො. මය්හඤ්ච ඛො ආවුසො සාරිපුත්ත, න එවං හොති: අහං චක්ඛුන්ති වා මම චක්ඛුන්ති වා, අහං සොතන්ති වා මම සොතන්ති වා, අහං ඝානන්ති වා මම ඝානන්ති වා, අහං ජිව්හාති වා මම ජිව්හාති වා, අහං කායොති වා මම කායොති වා, අහං මනොති වා මම මනොති වා. තස්ස මය්හං ආවුසො සාරිපුත්ත, කිං කායස්ස වා අඤ්ඤථත්තං භවිස්සති, ඉන්ද්රියානං වා විපරිණාමොති?

තථා හි පනායස්මතො උපසෙනස්ස දීඝරත්තං අහංකාරමමිංකාර මානානුසයො සුසමූහතා. තස්මායස්මතො උපසෙනස්ස න එවං හොති: ‘අහං චක්ඛුන්ති වා මම චක්ඛුන්ති වා -පෙ- අහං ජිව්හාති වා මම ජිව්හාති වා -පෙ- අහං මනොති වා මම මනොති වා’ති.

අථ ඛො තෙ භික්ඛූ ආයස්මතො උපසෙනස්ස කායං මඤ්චකං ආරොපෙත්වා බහිද්ධා නීහරිංසු. අථ ඛො ආයස්මතො උපසෙනස්ස කායො තත්ථෙව විකිරි සෙය්යථාපි භුසමුට්ඨීති.

70. අථ ඛො ආයස්මා උපවාණො යෙන භගවා තෙනුපසඞ්කමි -පෙ- එකමන්තං නිසින්නො ඛො ආයස්මා උපවාණො භගවන්තං එතදවොච: සන්දිට්ඨිකො ධම්මො සන්දිට්ඨිකො ධම්මොති භන්තෙ, වුච්චති. කිත්තාවතා නු ඛො භන්තෙ, සන්දිට්ඨිකො ධම්මො හොති, අකාලිකො එහි පස්සිකො ඔපනයිකො පච්චත්තං වෙදිතබ්බො විඤ්ඤූහීති?

ඉධූපවාණ භික්ඛු චක්ඛුනා රූපං දිස්වා රූපපටිසංවෙදී ච හොති රූපරාගපටිසංවෙදී ච. සන්තඤ්ච අජ්ඣත්තං රූපෙසු රාගං අත්ථි මෙ අජ්ඣත්තං රූපෙසු රාගොති පජානාති. යන්තං උපවාණ, භික්ඛු චක්ඛුනා රූපං දිස්වා රූපපටිසංවෙදී ච හොති, රූපරාගපටිසංවෙදී ච සන්තඤ්ච අජ්ඣත්තං රූපෙසු රාගං අත්ථි මෙ අජ්ඣත්තං රූපෙසු රාගොති පජානාති. එවම්පි ඛො උපවාණ, සන්දිට්ඨිකො ධම්මො හොති අකාලිකො එහිපස්සිකො ඔපනයිකො පච්චත්තං වෙදිතබ්බො විඤ්ඤූහී -පෙ-

පුන චපරං උපවාණ, භික්ඛු ජිව්හාය රසං සායිත්වා රසපටිසංවෙදී ච හොති රසරාගපටිසංවෙදී ච. සන්තඤ්ච අජ්ඣත්තං රසෙසු රාගං අත්ථි මෙ අජ්ඣත්තං රසෙසු රාගොති පජානාති. යන්තං උපවාණ, භික්ඛු ජිව්හාය රසං සායිත්වා රසපටිසංවෙදී ච හොති රසරාගපටිසංවෙදී ච. සන්තඤ්ච අජ්ඣත්තං රසෙසු රාගං අත්ථි මෙ අජ්ඣත්තං රසෙසු රාගොති පජානාති. එවම්පි ඛො උපවාණ, සන්දිට්ඨිකො ධම්මො හොති අකාලිකො එහිපස්සිකො ඔපනයිකො පච්චත්තං වෙදිතබ්බො විඤ්ඤූහී -පෙ-