70. අථ ඛො ආයස්මා උපවාණො යෙන භගවා තෙනුපසඞ්කමි -පෙ- එකමන්තං නිසින්නො ඛො ආයස්මා උපවාණො භගවන්තං එතදවොච: සන්දිට්ඨිකො ධම්මො සන්දිට්ඨිකො ධම්මොති භන්තෙ, වුච්චති. කිත්තාවතා නු ඛො භන්තෙ, සන්දිට්ඨිකො ධම්මො හොති, අකාලිකො එහි පස්සිකො ඔපනයිකො පච්චත්තං වෙදිතබ්බො විඤ්ඤූහීති?

ඉධූපවාණ භික්ඛු චක්ඛුනා රූපං දිස්වා රූපපටිසංවෙදී ච හොති රූපරාගපටිසංවෙදී ච. සන්තඤ්ච අජ්ඣත්තං රූපෙසු රාගං අත්ථි මෙ අජ්ඣත්තං රූපෙසු රාගොති පජානාති. යන්තං උපවාණ, භික්ඛු චක්ඛුනා රූපං දිස්වා රූපපටිසංවෙදී ච හොති, රූපරාගපටිසංවෙදී ච සන්තඤ්ච අජ්ඣත්තං රූපෙසු රාගං අත්ථි මෙ අජ්ඣත්තං රූපෙසු රාගොති පජානාති. එවම්පි ඛො උපවාණ, සන්දිට්ඨිකො ධම්මො හොති අකාලිකො එහිපස්සිකො ඔපනයිකො පච්චත්තං වෙදිතබ්බො විඤ්ඤූහී -පෙ-

පුන චපරං උපවාණ, භික්ඛු ජිව්හාය රසං සායිත්වා රසපටිසංවෙදී ච හොති රසරාගපටිසංවෙදී ච. සන්තඤ්ච අජ්ඣත්තං රසෙසු රාගං අත්ථි මෙ අජ්ඣත්තං රසෙසු රාගොති පජානාති. යන්තං උපවාණ, භික්ඛු ජිව්හාය රසං සායිත්වා රසපටිසංවෙදී ච හොති රසරාගපටිසංවෙදී ච. සන්තඤ්ච අජ්ඣත්තං රසෙසු රාගං අත්ථි මෙ අජ්ඣත්තං රසෙසු රාගොති පජානාති. එවම්පි ඛො උපවාණ, සන්දිට්ඨිකො ධම්මො හොති අකාලිකො එහිපස්සිකො ඔපනයිකො පච්චත්තං වෙදිතබ්බො විඤ්ඤූහී -පෙ-

පුන චපරං උපවාණ, භික්ඛු මනසා ධම්මං විඤ්ඤාය ධම්මපටිසංවෙදී ච හොති ධම්මරාගපටිසංවෙදී ච. සන්තඤ්ච අජ්ඣත්තං ධම්මෙසු රාගං අත්ථි මෙ අජ්ඣත්තං ධම්මෙසු රාගොති පජානාති. යන්තං උපවාණ, භික්ඛු මනසා ධම්මං විඤ්ඤාය ධම්මපටිසංවෙදී ච හොති ධම්මරාගපටිසංවෙදී ච. සන්තඤ්ච අජ්ඣත්තං ධම්මෙසු රාගං: අත්ථි මෙ අජ්ඣත්තං ධම්මෙසු රාගොති පජානාති. එවම්පි ඛො උපවාණ, සන්දිට්ඨිකො ධම්මො හොති අකාලිකො එහිපස්සිකො ඔපනයිකො පච්චත්තං වෙදිතබ්බො විඤ්ඤූහි.

ඉධූපවාණ භික්ඛු චක්ඛුනා රූපං දිස්වා රූපපටිසංවෙදී හි ඛො හොති නො ච රූපරාගපටිසංවෙදී. අසන්තඤ්ච අජ්ඣත්තං රූපෙසු රාගං නත්ථි මෙ අජ්ඣත්තං රූපෙසු රාගොති පජානාති. යන්තං උපවාණ, භික්ඛු චක්ඛුනා රූපං දිස්වා රූපපටිසංවෙදී හි ඛො හොති, නො ච රූපරාගපටිසංවෙදී. අසන්තඤ්ච අජ්ඣත්තං රූපෙසු රාගං නත්ථි මෙ අජ්ඣත්තං රූපෙසු රාගොති පජානාති. එවම්පි ඛො උපවාණ, සන්දිට්ඨිකො ධම්මො හොති, අකාලිකො එහිපස්සිකො ඔපනයිකො පච්චත්තං වෙදිතබ්බො විඤ්ඤූහි. -පෙ-

පුන චපරං උපවාණ භික්ඛු ජිව්හාය රසං සායිත්වා රසපටිසංවෙදී හි ඛො හොති නො ච රසරාගපටිසංවෙදී. අසන්තඤ්ච අජ්ඣත්තං රසෙසු රාගං: නත්ථි මෙ අජ්ඣත්තං රසෙසු රාගොති පජානාති. යන්තං උපවාණ භික්ඛු ජිව්හාය රසං සායිත්වා රසපටිසංවෙදී හි ඛො හොති නො ච රසරාගපටිසංවෙදී. අසන්තඤ්ච අජ්ඣත්තං රසෙසු රාගං: නත්ථි මෙ අජ්ඣත්තං රසෙසු රාගොති පජානාති. එවම්පි ඛො උපවාණ, සන්දිට්ඨිකො ධම්මො හොති, අකාලිකො එහිපස්සිකො ඔපනයිකො පච්චත්තං වෙදිතබ්බො විඤ්ඤූහි. -පෙ-

පුන චපරං උපවාණ, භික්ඛු මනසා ධම්මං විඤ්ඤාය ධම්මපටිසංවෙදී හි ඛො හොති, නො ච ධම්මරාගපටිසංවෙදී. අසන්තඤ්ච අජ්ඣත්තං ධම්මෙසු රාගං: නත්ථි මෙ අජ්ඣත්තං ධම්මෙසු රාගොති පජානාති. යන්තං උපවාණ, භික්ඛු මනසා ධම්මං විඤ්ඤාය ධම්මපටිසංවෙදී හි ඛො හොති, නො ච ධම්මරාගපටිසංවෙදී. අසන්තඤ්ච අජ්ඣත්තං ධම්මෙසු රාගං: නත්ථි මෙ අජ්ඣත්තං ධම්මෙසු රාගොති පජානාති. එවම්පි ඛො උපවාණ සන්දිට්ඨිකො ධම්මො හොති අකාලිකො එහිපස්සිකො ඔපනයිකො පච්චත්තං වෙදිතබ්බො විඤ්ඤූහී ති.

71. යො හි කොචි භික්ඛවෙ භික්ඛු ඡන්නං ඵස්සායතනානං සමුදයඤ්ච අත්ථගමඤ්ච අස්සාදඤ්ච ආදීනවඤ්ච නිස්සරණඤ්ච යථාභූතං නප්පජානාති: අවුසිතං තෙන බ්රහ්මචරියං, ආරකා සො ඉමම්හා ධම්මවිනයාති.