113. සාවත්ථියං:

අථ ඛො අඤ්ඤතරො භික්ඛු යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො සො භික්ඛු භගවන්තං එතදවොච: “අවිජ්ජා අවිජ්ජා”ති භන්තෙ වුච්චති. කතමා නු ඛො භන්තෙ, අවිජ්ජා කිත්තාවතා ච අවිජ්ජාගතො හොතීති.

ඉධ භික්ඛු අස්සුතවා පුථුජ්ජනො රූපං නප්පජානාති, රූපසමුදයං නප්පජානාති, රූපනිරොධං නප්පජානාති, රූපනිරොධගාමිනිං පටිපදං නප්පජානාති, වෙදනං නප්පජානාති -පෙ- සඤ්ඤං නප්පජානාති -පෙ- සඞ්ඛාරෙ නප්පජානාති -පෙ- විඤ්ඤාණං නප්පජානාති, විඤ්ඤාණසමුදයං නප්පජානාති, විඤ්ඤාණනිරොධං නප්පජානාති, විඤ්ඤාණනිරොධගාමිනිං පටිපදං නප්පජානාති. අයං වුච්චති භික්ඛවෙ, අවිජ්ජා. එත්තාවතා ච අවිජ්ජාගතො හොතීති.

114. සාවත්ථියං:

එකමන්තං නිසින්නො ඛො සො භික්ඛු භගවන්තං එතදවොච: “විජ්ජා විජ්ජා”ති භන්තෙ, වුච්චති. කතමා නු ඛො භන්තෙ, විජ්ජා කිත්තාවතා ච විජ්ජාගතො හොතීති.

ඉධ භික්ඛු, සුතවා අරියසාවකො රූපං පජානාති, රූපසමුදයං පජානාති, රූපනිරොධං පජානාති, රූපනිරොධගාමිනිං පටිපදං පජානාති. වෙදනං පජානාති -පෙ- සඤ්ඤං පජානාති -පෙ- සඞ්ඛාරෙ පජානාති -පෙ- විඤ්ඤාණං පජානාති, විඤ්ඤාණසමුදයං පජානාති, විඤ්ඤාණ නිරොධං පජානාති, විඤ්ඤාණනිරොධගාමිනිං පටිපදං පජානාති. අයං වුච්චති භික්ඛු, විජ්ජා. එත්තාවතා ච විජ්ජාගතො හොතීති.

115. සාවත්ථියං:

එකමන්තං නිසින්නො ඛො සො භික්ඛු භගවන්තං එතදවොච: “‘ධම්මකථිකො ධම්මකථිකො’”ති භන්තෙ, වුච්චති. කිත්තාවතා නු ඛො භන්තෙ, ධම්මකථිකො හොතීති.

රූපස්ස චෙ භික්ඛු, නිබ්බිදාය විරාගාය නිරොධාය ධම්මං දෙසෙති, “ධම්මකථිකො භික්ඛූ”ති අලං වචනාය. රූපස්ස චෙ භික්ඛු, නිබ්බිදාය විරාගාය නිරොධාය පටිපන්නො හොති, “ධම්මානුධම්මපටිපන්නො භික්ඛූ”ති අලං වචනාය. රූපස්ස චෙ භික්ඛු, නිබ්බිදා විරාගා නිරොධා අනුපාදා විමුත්තො හොති, “දිට්ඨධම්මනිබ්බානප්පත්තො භික්ඛූ”ති අලං වචනාය.

වෙදනාය චෙ භික්ඛු -පෙ- සඤ්ඤාය චෙ භික්ඛු -පෙ- සඞ්ඛාරානං චෙ භික්ඛු -පෙ- විඤ්ඤාණස්ස චෙ භික්ඛු නිබ්බිදාය විරාගාය නිරොධාය ධම්මං දෙසෙති, “ධම්මකථිකො භික්ඛූ”ති අලං වචනාය. විඤ්ඤාණස්ස චෙ භික්ඛු නිබ්බිදාය විරාගාය නිරොධාය පටිපන්නො හොති “ධම්මානුධම්මපටිපන්නො භික්ඛූ”ති අලං වචනාය. විඤ්ඤාණස්ස චෙ භික්ඛු නිබ්බිදා විරාගා නිරොධා අනුපාදා විමුත්තො හොති, “දිට්ඨධම්මනිබ්බානප්පත්තො භික්ඛූ”ති අලං වචනායාති.

116. සාවත්ථියං:

එකමන්තං නිසින්නො ඛො සො භික්ඛු භගවන්තං එතදවොච: “ධම්මකථිකො ධම්මකථිකො”ති භන්තෙ, වුච්චති. කිත්තාවතා නු ඛො භන්තෙ, ධම්මකථිකො හොති? කිත්තාවතා ධම්මානුධම්මපටිපන්නො හොති? කිත්තාවතා දිට්ඨධම්මනිබ්බානප්පත්තො හොතී”ති?

රූපස්ස චෙ භික්ඛු, නිබ්බිදාය විරාගාය නිරොධාය ධම්මං දෙසෙති, “ධම්මකථිකො භික්ඛූ”ති අලං වචනාය. රූපස්ස චෙ භික්ඛු නිබ්බිදාය විරාගාය නිරොධාය පටිපන්නො හොති, “ධම්මානුධම්මපටිපන්නො භික්ඛූ”ති අලං වචනාය. රූපස්ස චෙ භික්ඛු නිබ්බිදා විරාගා නිරොධා අනුපාදා විමුත්තො හොති, “දිට්ඨධම්මනිබ්බානප්පත්තො භික්ඛූ”ති අලං වචනාය.

වෙදනාය චෙ භික්ඛු -පෙ- සඤ්ඤාය චෙ භික්ඛු -පෙ- සඞ්ඛාරානං චෙ භික්ඛු -පෙ- විඤ්ඤාණස්ස චෙ භික්ඛු, නිබ්බිදාය විරාගාය නිරොධාය ධම්මං දෙසෙති “ධම්මකථිකො භික්ඛූ”ති අලං වචනාය. විඤ්ඤාණස්ස චෙ භික්ඛු, නිබ්බිදාය විරාගාය නිරොධාය පටිපන්නො හොති, “ධම්මානුධම්මපටිපන්නො භික්ඛූ”ති අලං වචනාය. විඤ්ඤාණස්ස චෙ භික්ඛු නිබ්බිදා විරාගා නිරොධා අනුපාදා විමුත්තො හොති, “දිට්ඨධම්මනිබ්බානප්පත්තො භික්ඛූ”ති අලං වචනායාති.