3. උපරිපණ්ණාසකො
1. අන්තවග්ගො
1. 3. 1. 1.
අන්ත සුත්තං
103. සාවත්ථියං:
චත්තාරො මෙ භික්ඛවෙ, අන්තා. කතමෙ චත්තාරො:
සක්කායන්තො, සක්කායසමුදයන්තො, සක්කායනිරොධන්තො, සක්කායනිරොධගාමිනීපටිපදන්තො.
කතමො ච භික්ඛවෙ, සක්කායන්තො:
පඤ්චුපාදානක්ඛන්ධාතිස්ස වචනීයං,
කතමෙ පඤ්ච,
සෙය්යථිදං: රූපුපාදානක්ඛන්ධො, වෙදනුපාදානක්ඛන්ධො, සඤ්ඤුපාදානක්ඛන්ධො, සඞ්ඛාරූපාදානක්ඛන්ධො, විඤ්ඤාණුපාදානක්ඛන්ධො. අයං වුච්චති භික්ඛවෙ, සක්කායන්තො.
කතමො ච භික්ඛවෙ, සක්කායසමුදයන්තො,
යායං තණ්හා පොනොභවිකා නන්දිරාගසහගතා තත්රතත්රාභිනන්දිනී, සෙය්යථිදං: කාමතණ්හා, භවතණ්හා, විභවතණ්හා. අයං වුච්චති භික්ඛවෙ, සක්කායසමුදයන්තො.
කතමො ච භික්ඛවෙ, සක්කායනිරොධන්තො,
යො තස්සා යෙව තණ්හාය අසෙසවිරාගනිරොධො චාගො පටිනිස්සග්ගො මුත්ති අනාලයො. අයං වුච්චති භික්ඛවෙ, සක්කායනිරොධන්තො.
කතමො ච භික්ඛවෙ, සක්කායනිරොධගාමිනීපටිපදන්තො,
අයමෙ ව අරියො අට්ඨඞ්ගිකො මග්ගො. සෙය්යථිදං: සම්මාදිට්ඨි, සම්මාසඞ්කප්පො, සම්මාවාචා, සම්මාකම්මන්තො, සම්මාආජීවො, සම්මාවායාමො, සම්මාසති, සම්මාසමාධි. අයං වුච්චති භික්ඛවෙ, සක්කායනිරොධගාමිනීපටිපදන්තො. ඉමෙ ඛො භික්ඛවෙ, චත්තාරො අන්තාති.
1. 3. 1. 2.
දුක්ඛ සුත්තං
104. සාවත්ථියං:
දුක්ඛඤ්ච වො භික්ඛවෙ, දෙසිස්සාමි දුක්ඛසමුදයඤ්ච දුක්ඛනිරොධඤ්ච දුක්ඛනිරොධගාමිනිඤ්ච පටිපදං. තං සුණාථ.
කතමඤ්ච භික්ඛවෙ, දුක්ඛං:
පඤ්චුපාදානක්ඛන්ධාතිස්ස වචනීයං.
කතමෙ පඤ්ච,
සෙය්යථිදං: රූපුපාදානක්ඛන්ධො -පෙ- විඤ්ඤාණුපාදානක්ඛන්ධො. ඉදං වුච්චති භික්ඛවෙ, දුක්ඛං.
කතමො ච භික්ඛවෙ, දුක්ඛසමුදයො:
යායං තණ්හා පොනොභවිකා නන්දිරාගසහගතා තත්රතත්රාභිනන්දිනී, සෙය්යථිදං: කාමතණ්හා, භවතණ්හා, විභවතණ්හා. අයං වුච්චති භික්ඛවෙ, දුක්ඛසමුදයො.
කතමො ච භික්ඛවෙ, දුක්ඛනිරොධො:
යො තස්සායෙව තණ්හාය අසෙසවිරාගනිරොධො චාගො පටිනිස්සග්ගො මුත්ති අනාලයො, අයං වුච්චති භික්ඛවෙ, දුක්ඛනිරොධො.
කතමො ච භික්ඛවෙ, දුක්ඛනිරොධගාමිනීපටිපදා:
අයමෙව අරියො අට්ඨඞ්ගිකො මග්ගො. සෙය්යථිදං: සම්මාදිට්ඨි -පෙ- සම්මාසමාධි. අයං වුච්චති භික්ඛවෙ, දුක්ඛනිරොධගාමිනී පටිපදාති.
1. 3. 1. 3.
සක්කාය සුත්තං
105. සාවත්ථියං:
සක්කායඤ්ච වො භික්ඛවෙ, දෙසිස්සාමි සක්කායසමුදයඤ්ච සක්කායනිරොධඤ්ච සක්කායනිරොධගාමිනිඤ්ච පටිපදං. තං සුණාථ.
කතමො ච භික්ඛවෙ, සක්කායො:
පඤ්චුපාදානක්ඛන්ධාතිස්ස වචනීයං.
කතමෙ පඤ්ච,
සෙය්යථිදං: රූපුපාදානක්ඛන්ධො, -පෙ- විඤ්ඤාණුපාදානක්ඛන්ධො. අයං වුච්චති, භික්ඛවෙ, සක්කායො.