8. 1. 12.
වඞ්ගීසසුත්තං
220. එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන ආයස්මා වඞ්ගීසො අචිරඅරහත්තප්පත්තො හොති විමුත්තිසුඛපටිසංවෙදී. තායං වෙලායං ඉමා ගාථායො අභාසි.
කාවෙය්යමත්තා විචරිම්හ පුබ්බෙ ගාමා ගාමං පුරා පුරං,
අථද්දසාම සම්බුද්ධං සද්ධා නො උදපජ්ජථ.
සො මෙ ධම්මමදෙසෙසි ඛන්ධායතනධාතුයො,
තස්සාහං ධම්මං සුත්වාන පබ්බජිං අනගාරියං.
බහුන්නං වත අත්ථාය බොධිං අජ්ඣගමා මුනි,
භික්ඛූනං භික්ඛුනීනඤ්ච යෙ නියාමගතද්දසා.
ස්වාගතං වත මෙ ආසි මම බුද්ධස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.
පුබ්බෙනිවාසං ජානාමි දිබ්බචක්ඛුං විසොධිතං,
තෙවිජ්ජො ඉද්ධිපත්තොම්හි චෙතොපරියාය කොවිදොති.
වඞ්ගීසවග්ගො පඨමො.
තත්රුද්දානං:
නික්ඛන්තං අරති චෙව පෙසලා අතිමඤ්ඤනා,
ආනන්දෙන සුභාසිතා සාරිපුත්ත පවාරණා,
පරොසහස්සං කොණ්ඩඤ්ඤො මොග්ගල්ලානෙන ගග්ගරා
වඞ්ගීසෙන ද්වාදසාති.
වඞ්ගීසසංයුත්තං සමත්තං
9. වනසංයුත්තං
1. වනවග්ගො
9. 1. 1.
විවෙකසුත්තං
221. එවං මෙ සුතං: එකං සමයං අඤ්ඤතරො භික්ඛු කොසලෙසු විහරති අඤ්ඤතරස්මිං වනසණ්ඩෙ. තෙන ඛො පන සමයෙන සො භික්ඛු දිවාවිහාරගතො පාපකෙ අකුසලෙ විතක්කෙ විතක්කෙති ගෙහනිස්සිතෙ.
අථ ඛො යා තස්මිං වනසණ්ඩෙ අධිවත්ථා දෙවතා තස්ස භික්ඛුනො අනුකම්පිකා අත්ථකාමා තං භික්ඛුං සංවෙජෙතුකාමා යෙන සො භික්ඛු තෙනුපසඞ්කමි. උපසඞ්කමිත්වා තං භික්ඛුං ගාථාහි අජ්ඣභාසි:
විවෙකකාමොසි වනං පවිට්ඨො අථ තෙ මනො නිච්ඡරතී බහිද්ධා,
ජනො ජනස්මිං විනයස්සු ඡන්දං තතො සුඛී හොහිසි වීතරාගො.
අරතිං පජහාසි සතො භවාසි සතං තං සාදයාමසෙ,
පාතාලරජො හි දුත්තරො මා තං කාමරජො අවාහරි.
සකුණො යථා පංසුකුණ්ඩිතො විධුතං පාතයති සිතං රජං,
එවං භික්ඛු පධානවා සතිමා විධුනං පාතයති සිතං රජන්ති.
අථ ඛො සො භික්ඛු තාය දෙවතාය සංවෙජිතො සංවෙගමාපාදීති.
9. 1. 2.
උපට්ඨානසුත්තං
222. එකං සමයං අඤ්ඤතරො භික්ඛු කොසලෙසු විහරති අඤ්ඤතරස්මිං වනසණ්ඩෙ. තෙන ඛො පන සමයෙන සො භික්ඛු දිවාවිහාරගතො සුපති. අථ ඛො යා තස්මිං වනසණ්ඩෙ අධිවත්ථා දෙවතා තස්ස භික්ඛුනො අනුකම්පිකා අත්ථකාමා තං භික්ඛුං සංවෙජෙතුකාමා යෙන සො භික්ඛු තෙනුපසඞ්කමි.