8. 1. 11.
ගග්ගරාසුත්තං
219. එකං සමයං භගවා චම්පායං විහරති ගග්ගරාය පොක්ඛරණියා තීරෙ මහතා භික්ඛුසඞ්ඝෙන සද්ධිං පඤ්චමත්තෙහි භික්ඛුසතෙහි සත්තහි ච උපාසකසතෙහි අනෙකෙහි ච දෙවතාසහස්සෙහි. ත්යාස්සුදං භගවා අතිරොචති වණ්ණෙන චෙව යසසා ච.
අථ ඛො ආයස්මතො වඞ්ගීසස්ස එතදහොසි: අයං ඛො භගවා චම්පායං විහරති ගග්ගරාය පොක්ඛරණියා තීරෙ මහතා භික්ඛුසඞ්ඝෙන සද්ධිං පඤ්චමත්තෙහි භික්ඛුසතෙහි සත්තහි ච උපාසකසතෙහි අනෙකෙහි දෙවතාසහස්සෙහි. ත්යාස්සුදං භගවා අතිරොචති වණ්ණෙන චෙව යසසා ච. යන්නූනාහං භගවන්තං සම්මුඛා සරූපාය ගාථාය අභිත්ථවෙය්යන්ති.
අථ ඛො ආයස්මා වඞ්ගීසො උට්ඨායාසනා එකංසං උත්තරාසඞ්ගං කරිත්වා යෙන භගවා තෙනඤ්ජලිම්පණාමෙත්වා භගවන්තං එතදවොච: පටිභාති මං භගවා පටිභාති මං සුගතාති. පටිභාතු තං වඞ්ගීසාති භගවා අවොච.
අථ ඛො ආයස්මා වඞ්ගීසො භගවන්තං සම්මුඛා සරූපාය ගාථාය අභිත්ථවි:
චන්දො යථා විගතවලාහකෙ නභෙ
විරොචති විගතමලො ව භාණුමා,
එවම්පි අඞ්ගීරස ත්වං මහාමුනි
අතිරොචසි යසසා සබ්බලොකන්ති.
8. 1. 12.
වඞ්ගීසසුත්තං
220. එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන ආයස්මා වඞ්ගීසො අචිරඅරහත්තප්පත්තො හොති විමුත්තිසුඛපටිසංවෙදී. තායං වෙලායං ඉමා ගාථායො අභාසි.
කාවෙය්යමත්තා විචරිම්හ පුබ්බෙ ගාමා ගාමං පුරා පුරං,
අථද්දසාම සම්බුද්ධං සද්ධා නො උදපජ්ජථ.
සො මෙ ධම්මමදෙසෙසි ඛන්ධායතනධාතුයො,
තස්සාහං ධම්මං සුත්වාන පබ්බජිං අනගාරියං.
බහුන්නං වත අත්ථාය බොධිං අජ්ඣගමා මුනි,
භික්ඛූනං භික්ඛුනීනඤ්ච යෙ නියාමගතද්දසා.
ස්වාගතං වත මෙ ආසි මම බුද්ධස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.
පුබ්බෙනිවාසං ජානාමි දිබ්බචක්ඛුං විසොධිතං,
තෙවිජ්ජො ඉද්ධිපත්තොම්හි චෙතොපරියාය කොවිදොති.
වඞ්ගීසවග්ගො පඨමො.