4. 1. 7.
සොප්පසිසුත්තං.
143. එකං සමයං භගවා රාජගහෙ විහරති වෙළුවනෙ කලන්දකනිවාපෙ. අථ ඛො භගවා බහුදෙවරත්තිං අබ්භොකාසෙ චඞ්කමිත්වා රත්තියා පච්චූසසමයං පාදෙ පක්ඛාලෙත්වා විහාරං පවිසිත්වා දක්ඛිණෙන පස්සෙන සීහසෙය්යං කප්පෙසි, පාදෙ පාදං අච්චාධාය සතො සම්පජානො උට්ඨානසඤ්ඤං මනසි කරිත්වා.
අථ ඛො මාරො පාපිමා යෙන භගවා තෙනුපසඞ්කමි. උපසඞ්කමිත්වා භගවන්තං ගාථාය අජ්ඣභාසි:
කිං සොප්පසි කින්නු සොප්පසි කිමිදං සොප්පසි දුබ්භගො විය,
සුඤ්ඤමගාරන්ති සොප්පසි කිමිදං සොප්පසි සූරියෙ උග්ගතෙ.
සුඤ්ඤමගාරන්ති සොප්පසි කිමිදං සොප්පසි සූරියෙ උග්ගතෙ.
[භගවා:]
යස්ස ජාලිනී විසත්තිකා තණ්හා නත්ථි කුහිඤ්චි නෙතවෙ,
සබ්බූපධීනං පරික්ඛයා බුද්ධො සොප්පති කිං තවෙත්ථ මාරාති.
සබ්බූපධීනං පරික්ඛයා බුද්ධො සොප්පති කිං තවෙත්ථ මාරාති.
අථ ඛො මාරො පාපිමා ජානාති මං භගවා, ජානාති මං සුගතොති දුක්ඛී දුම්මනො තත්ථෙවන්තරධායීති.
4. 1. 8.
නන්දතිසුත්තං.
144. එවං මෙ සුතං: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. අථ ඛො මාරො පාපිමා යෙන භගවා තෙනුපසඞ්කමි. උපසඞ්කමිත්වා භගවතො සන්තිකෙ ඉමං ගාථං අභාසි:
නන්දති පුත්තෙහි පුත්තිමා ගොමිකො ගොහි තථෙව නන්දති,
උපධී හි නරස්ස නන්දනා න හි සො නන්දති යො නිරූපධීති.
උපධී හි නරස්ස නන්දනා න හි සො නන්දති යො නිරූපධීති.
[භගවා:]
සොචති පුත්තෙහි පුත්තිමා ගොමිකො ගොහි තථෙව සොචති,
උපධීහි නරස්ස සොචනා න හි සො සොචති යො නිරූපධීති.
උපධීහි නරස්ස සොචනා න හි සො සොචති යො නිරූපධීති.
අථ ඛො මාරො පාපිමා ජානාති මං භගවා -පෙ- තත්ථෙවන්තරධායීති.
4. 1. 9.
පඨමආයුසුත්තං.
145. එවං මෙ සුතං: එකං සමයං භගවා රාජගහෙ විහරති වෙළුවනෙ කලන්දකනිවාපෙ. තත්ර ඛො භගවා භික්ඛූ ආමන්තෙසි, භික්ඛවොති. භදන්තෙති තෙ භික්ඛූ භගවතො පච්චස්සොසුං. භගවා එතදවොච:
අප්පමිදං භික්ඛවෙ මනුස්සානං ආයු, ගමනීයො සම්පරායො, කත්තබ්බං කුසලං, චරිතබ්බං බ්රහ්මචරියං, නත්ථි ජාතස්ස අමරණං. යො භික්ඛවෙ චිරං ජීවති, සො වස්සසතං අප්පං වා භිය්යොති.
අථ ඛො මාරො පාපිමා යෙන භගවා තෙනුපසඞ්කමි. උපසඞ්කමිත්වා භගවන්තං ගාථාය අජ්ඣභාසි:
දීඝමායු මනුස්සානං න නං හීළෙ සුපොරිසො,
චරෙය්ය ඛීරමත්තොව නත්ථි මච්චුස්ස ආගමොති.
චරෙය්ය ඛීරමත්තොව නත්ථි මච්චුස්ස ආගමොති.
[භගවා:]
අප්පමායු මනුස්සානං හීළෙය්ය නං සුපොරිසො,
චරෙය්යාදිත්තසීසොව නත්ථි මච්චුස්ස නාගමොති.
චරෙය්යාදිත්තසීසොව නත්ථි මච්චුස්ස නාගමොති.
අථ ඛො මාරො පාපිමා -පෙ- තත්ථෙවන්තරධායීති.
4. 1. 10.
දුතියආයුසුත්තං.
146. එවං මෙ සුතං: එකං සමයං භගවා රාජගහෙ විහරති වෙළුවනෙ කලන්දකනිවාපෙ. තත්ර ඛො භගවා භික්ඛූ ආමන්තෙසි, භික්ඛවොති. භදන්තෙති තෙ භික්ඛූ භගවතො පච්චස්සොසුං. භගවා එතදවොච:
අප්පමිදං භික්ඛවෙ මනුස්සානං ආයු. ගමනීයො සම්පරායො, කත්තබ්බං කුසලං, චරිතබ්බං බ්රහ්මචරියං. නත්ථි ජාතස්ස අමරණං. යො භික්ඛවෙ චිරං ජීවති, සො වස්සසතං අප්පං වා භිය්යොති.
අථ ඛො මාරො පාපිමා යෙන භගවා තෙනුපසඞ්කමි. උපසඞ්කමිත්වා භගවන්තං ගාථාය අජ්ඣභාසි:
නාච්චයන්ති අහොරත්තා ජීවිතං නොපරුජ්ඣති,
ආයු අනුපරියාති මච්චානං නෙමීව රථකුබ්බරං.
ආයු අනුපරියාති මච්චානං නෙමීව රථකුබ්බරං.
[භගවා:]
අච්චයන්ති අහොරත්තා ජීවිතං උපරුජ්ඣති,
ආයු ඛීයති මච්චානං කුන්නදීනංව ඔදකන්ති.
ආයු ඛීයති මච්චානං කුන්නදීනංව ඔදකන්ති.