2. 2. 7.
සුබ්රහ්මසුත්තං.
98. සාවත්ථියං–
එකමන්තං ඨිතො ඛො සුබ්රහ්මා දෙවපුත්තො භගවන්තං ගාථාය අජ්ඣභාසි:–
නිච්චං උත්රස්තමිදං චිත්තං නිච්චං උබ්බිග්ගමිදං මනො
අනුප්පන්නෙසු කිච්ඡෙසු අථො උප්පතිතෙසු ච
සචෙ අත්ථි අනුත්රස්තං තංමෙ අක්ඛාහි පුච්ඡිතො ති.
[භගවා:]
නාඤ්ඤත්ර බොජ්ඣඞ්ගා තපසා නාඤ්ඤත්ර ඉන්ද්රියසංවරා,
නාඤ්ඤත්ර සබ්බනිස්සග්ගා සොත්ථිං පස්සාමි පාණිනන්ති.
2. 2. 8.
කකුධසුත්තං.
99. සාවත්ථියං–
එවං මෙ සුතං එකං සමයං භගවා සාකෙතෙ විහරති අඤ්ජනවනෙ මිගදායෙ. අථ ඛො කකුධො දෙවපුත්තො අභික්කන්තාය රත්තියා අභික්කන්තවණ්ණො කෙවලකප්පං අඤ්ජනවනං ඔභාසෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතො ඛො කකුධො දෙවපුත්තො භගවන්තං එතදවොච:
නන්දසි සමණාති? කිං ලද්ධා ආවුසොති? තෙන හි සමණ සොචසීති? කිං ජීයිත්ථ ආවුසොති? තෙන හි සමණ නෙව නන්දසි නෙව සොචසීති? එවමාවුසොති.
කච්චි ත්වං අනඝො භික්ඛු කච්චි නන්දි න විජ්ජති,
කච්චි තං එකමාසීනං අරතී නාභිකීරතීති.
[භගවා:]
අනීඝො වෙ අහං යක්ඛ අථො නන්දි න විජ්ජති,
අථො මං එකමාසීනං අරතී නාභිකීරතීති.
[දෙවපුත්තො:]
කථං ත්වං අනඝො භික්ඛු කථං නන්දි න විජ්ජති,
කථං තං එකමාසීනං අරතී නාභිකීරතීති.
[භගවා:]
අඝජාතස්ස වෙ නන්දි නන්දිජාතස්ස වෙ අඝං,
අනන්දි අනඝො භික්ඛු එවං ජානාහි ආවුසොති.
[දෙවපුත්තො:]
චිරස්සං වත පස්සාමි බ්රාහ්මණං පරිනිබ්බුතං,
අනන්දිං අනඝං භික්ඛුං තිණ්ණං ලොකෙ විසත්තිකන්ති.
2. 2. 9.
උත්තරසුත්තං.
100. රාජගෙහ –
එකමන්තං ඨිතො ඛො උත්තරො දෙවපුත්තො භගවතො සන්තිකෙ ඉමං ගාථං අභාසි:
උපනීයති ජීවිතමප්පමායු ජරූපනීතස්ස න සන්ති තාණා,
එතං භයං මරණෙ පෙක්ඛමානො පුඤ්ඤානි කයිරාථ සුඛාවහානි.
[භගවා:]
උපනීයති ජීවිතමප්පමායු ජරූපනීතස්ස න සන්ති තාණා,
එතං භයං මරණෙ පෙක්ඛමානො ලොකාමිසං පජහෙ සන්තිපෙක්ඛොති.
2. 2. 10.
අනාථපිණ්ඩිකසුත්තං.
101. සාවත්ථියං–
එකමන්තං ඨිතො ඛො අනාථපිණ්ඩිකො දෙවපුත්තො භගවතො සන්තිකෙ ඉමා ගාථායො අභාසි:
ඉදං හි තං ජෙතවනං ඉසිසඞ්ඝනිසෙවිතං,
ආවුත්ථං ධම්මරාජෙන පීතිසඤ්ජනනං මම.
කම්මං විජ්ජා ච ධම්මො ච සීලං ජීවිතමුත්තමං,
එතෙන මච්චා සුජ්ඣන්ති න ගොත්තෙන ධනෙන වා.
තස්මා හි පණ්ඩිතො පොසො සම්පස්සං අත්ථමත්තනො,
යොනිසො විචිනෙ ධම්මං එවං තත්ථ විසුජ්ඣති.