2. 1. 6.
කාමදසුත්තං
87. සාවත්ථියං–
එකමන්තං ඨිතො ඛො කාමදො දෙවපුත්තො භගවන්තං එතදවොච: දුක්කරං භගවා සුදුක්කරං භගවාති.
දුක්කරං වාපි කරොන්ති (කාමදාති භගවා)
සෙඛා සීලසමාහිතා,
ඨිතත්තා අනගාරියුපෙතස්ස
තුට්ඨි හොති සුඛාවහාති.
දුල්ලභා භගවා. යදිදං තුට්ඨීති.
දුල්ලභං වාපි ලභන්ති (කාමදාති භගවා)
චිත්තවූපසමෙ රතා,
යෙසං දිවා ච රත්තො ච
භාවනාය රතො මනොති.
දුස්සමාදහං භගවා යදිදං චිත්තන්ති.
දුස්සමාදහං වාපි සමාදහන්ති (කාමදාති භගවා)
ඉන්ද්රියූපසමෙ රතා,
තෙ ඡෙත්වා මච්චුනො ජාලං
අරියා ගච්ඡන්ති කාමදාති.
දුග්ගමො භගවා විසමො මග්ගොති.
[භගවා:]
දුග්ගමෙ විසමෙ වාපි
අරියා ගච්ඡන්ති කාමද,
අනරියා විසමෙ මග්ගෙ
පපතන්ති අවංසිරා,
අරියානං සමො මග්ගො
අරියා හි විසමෙ සමාති.
2. 1. 7.
පඤ්චාලචණ්ඩසුත්තං
88. සාවත්ථියං–
එකමන්තං ඨිතො ඛො පඤ්චාලචණ්ඩො දෙවපුත්තො භගවතො සන්තිකෙ ඉමං ගාථං අභාසි:
සම්බාධෙ වත ඔකාසං අවින්දි භූරිමෙධසො,
යො ඣානමබුධා බුද්ධො පතිලීනනිසභො මුනීති.
සම්බාධෙ වාපි වින්දන්ති (පඤ්චාලචණ්ඩාති භගවා) ධම්මං නිබ්බාණපත්තියා,
යෙ සතිං පච්චලත්ථුං සු සම්මා තෙ සුසමාහිතාති.
2. 1. 8.
තායනසුත්තං
89. සාවත්ථියං–
අථ ඛො තායනො දෙවපුත්තො පුරාණතිත්ථකරො අභික්කන්තාය රත්තියා අභික්කන්තවණ්ණො කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතො ඛො තායනො දෙවපුත්තො භගවතො සන්තිකෙ ඉමා ගාථායො අභාසි:
ඡින්ද සොතං පරක්කම්ම කාමෙ පනුද බ්රාහ්මණ,
නප්පහාය මුනී කාමෙ නෙකත්තමුපපජ්ජති.
කයිරා චෙ කයිරාථෙනං දළ්හමෙනං පරක්කමෙ,
සිථිලො හි පරිබ්බාජො භිය්යො ආකිරතෙ රජං.
අකතං දුක්කතං සෙය්යො පච්ඡා තපති දුක්කතං,
කතඤ්ච සුකතං සෙය්යො යං කත්වා නානුතප්පති.
කුසො යථා දුග්ගහිතො හත්ථමෙවානුකන්තති,
සාමඤ්ඤං දුප්පරාමට්ඨං නිරයායූපකඩ්ඪති.
යං කිඤ්චි සිථිලං කම්මං සංකිලිට්ඨඤ්ච යං වතං
සංකස්සරං බ්රහ්මචරියං න තං හොති මහප්ඵලන්ති.
ඉදමවොච තායනො දෙවපුත්තො. ඉදං වත්වා භගවන්තං අභිවාදෙත්වා පදක්ඛිණං කත්වා තත්ථෙවන්තරධායීති.