2. 1. 4.
මාගධසුත්තං
85. සාවත්ථියං–
එකමන්තං ඨිතො ඛො මාගධො දෙවපුත්තො භගවන්තං ගාථාය අජ්ඣභාසි:
කති ලොකස්මිං පජ්ජොතා යෙහි ලොකො පකාසති,
භවන්තං පුට්ඨුමාගම්ම කථං ජානෙමු තං මයන්ති.
[භගවා:]
චත්තාරො ලොකෙ පජ්ජොතා පඤ්චමෙත්ථ න විජ්ජති,
දිවා තපති ආදිච්චො රත්තිං ආභාති චන්දිමා.
අථ අග්ගි දිවාරත්තිං තත්ථ තත්ථ පකාසති,
සම්බුද්ධො තපතං සෙට්ඨො එසා ආභා අනුත්තරාති.
2. 1. 5.
දාමලිසුත්තං
86. සාවත්ථියං–
අථ ඛො දාමලි දෙවපුත්තො අභික්කන්තාය රත්තියා අභික්කන්තවණ්ණො කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතො ඛො දාමලි දෙවපුත්තො භගවතො සන්තිකෙ ඉමං ගාථං අභාසි:
කරණීය මෙතං බ්රාහ්මණෙන පධානමකිලාසුනා,
කාමානං විප්පහාණෙන න තෙනාසිංසතෙ භවන්ති.
නත්ථි කිච්චං බ්රාහ්මණස්ස (දාමලීති භගවා) කතකිච්චො හි බ්රාහ්මණො,
යාව න ගාධං ලභති නදීසු ආයූහති සබ්බගත්තෙභි ජන්තු
ගාධඤ්ච ලද්ධාන ථලෙ ඨිතො සො නායූහති පාරගතො හි සොති.
එසූපමා දාමලි බ්රාහ්මණස්ස ඛීණාසවස්ස නිපකස්ස ඣායිනො,
පප්පුය්ය ජාතිමරණස්ස අන්තං නායූහති පාරගතො හි සොති.
2. 1. 6.
කාමදසුත්තං
87. සාවත්ථියං–
එකමන්තං ඨිතො ඛො කාමදො දෙවපුත්තො භගවන්තං එතදවොච: දුක්කරං භගවා සුදුක්කරං භගවාති.
දුක්කරං වාපි කරොන්ති (කාමදාති භගවා)
සෙඛා සීලසමාහිතා,
ඨිතත්තා අනගාරියුපෙතස්ස
තුට්ඨි හොති සුඛාවහාති.
දුල්ලභා භගවා. යදිදං තුට්ඨීති.
දුල්ලභං වාපි ලභන්ති (කාමදාති භගවා)
චිත්තවූපසමෙ රතා,
යෙසං දිවා ච රත්තො ච
භාවනාය රතො මනොති.
දුස්සමාදහං භගවා යදිදං චිත්තන්ති.
දුස්සමාදහං වාපි සමාදහන්ති (කාමදාති භගවා)
ඉන්ද්රියූපසමෙ රතා,
තෙ ඡෙත්වා මච්චුනො ජාලං
අරියා ගච්ඡන්ති කාමදාති.
දුග්ගමො භගවා විසමො මග්ගොති.
[භගවා:]
දුග්ගමෙ විසමෙ වාපි
අරියා ගච්ඡන්ති කාමද,
අනරියා විසමෙ මග්ගෙ
පපතන්ති අවංසිරා,
අරියානං සමො මග්ගො
අරියා හි විසමෙ සමාති.