11. 2. 9.
දුතියසක්කනමස්සන සුත්තං
265. සාවත්ථියං–
භූතපුබ්බං භික්ඛවෙ සක්කො දෙවානමින්දො මාතලිසඞ්ගාහකං ආමන්තෙසි: යොජෙහි සම්ම මාතලි, සහස්සයුත්තං ආජඤ්ඤරථං. උය්යානභූමිං ගච්ඡාම සුභූමිං දස්සනායාති.
එවං භද්දන්තවාති ඛො භික්ඛවෙ මාතලිසඞ්ගාහකො සක්කස්ස දෙවානමින්දස්ස පටිස්සුත්වා සහස්සයුත්තං ආජඤ්ඤරථං යොජෙත්වා සක්කස්ස දෙවානමින්දස්ස පටිවෙදෙසි: යුත්තො ඛො තෙ මාරිස, සහස්සයුත්තො ආජඤ්ඤරථො යස්ස දානි කාලං මඤ්ඤසීති.
අථ ඛො භික්ඛවෙ සක්කො දෙවානමින්දො වෙජයන්තපාසාදා ඔරොහන්තො පඤ්ජලිකො සුදං භගවන්තං නමස්සති.
අථ ඛො භික්ඛවෙ මාතලිසඞ්ගාහකො සක්කං දෙවානමින්දං ගාථාය අජ්ඣභාසි:
යං හි දෙවා මනුස්සා ච තං නමස්සන්ති වාසව,
අථ කො නාම සො යක්ඛො යං ත්වං සක්ක නමස්සසීති?
අථ කො නාම සො යක්ඛො යං ත්වං සක්ක නමස්සසීති?
[සක්කො:]
යො ඉධ සම්මාසම්බුද්ධො අස්මිං ලොකෙ සදෙවකෙ,
අනොමනාමං සත්ථාරං තං නමස්සාමි මාතලි.
අනොමනාමං සත්ථාරං තං නමස්සාමි මාතලි.
යෙසං රාගො ච දොසො ච අවිජ්ජා ච විරාජිතා,
ඛීණාසවා අරහන්තො තෙ නමස්සාමි මාතලි.
ඛීණාසවා අරහන්තො තෙ නමස්සාමි මාතලි.
යෙ රාගදොසවිනයා අවිජ්ජාසමතික්කමා,
සෙඛා අපචයාරාමා අප්පමත්තානුසික්ඛරෙ,
තෙ නමස්සාමි මාතලීති.
සෙඛා අපචයාරාමා අප්පමත්තානුසික්ඛරෙ,
තෙ නමස්සාමි මාතලීති.
[මාතලි:]
සෙට්ඨා හි කිර ලොකස්මිං යෙ ත්වං සක්ක නමස්සසි,
අහම්පි තෙ නමස්සාමි යෙ නමස්සසි වාසවාති.
අහම්පි තෙ නමස්සාමි යෙ නමස්සසි වාසවාති.
[ථෙරා:]
ඉදං වත්වාන මඝවා දෙවරාජා සුජම්පති,
භගවන්තං නමස්සිත්වා පමුඛො රථමාරුහීති.
භගවන්තං නමස්සිත්වා පමුඛො රථමාරුහීති.
11. 2. 10.
තතිය සක්ක නමස්සන සුත්තං
266. එවං මෙ සුතං: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තත්ර ඛො භගවා භික්ඛූ ආමන්තෙසි භික්ඛවොති. භදන්තෙති තෙ භික්ඛූ භගවතො පච්චස්සොසුං. භගවා එතදවොච:
භූතපුබ්බං භික්ඛවෙ සක්කො දෙවානමින්දො මාතලිසඞ්ගාහකං ආමන්තෙසි: යොජෙහි සම්ම මාතලි, සහස්සයුත්තං ආජඤ්ඤරථං උය්යානභූමිං ගච්ඡාම සුභූමිං දස්සනායාති.
එවං භද්දන්තවාති ඛො භික්ඛවෙ, මාතලි සඞ්ගාහකො සක්කස්ස දෙවානමින්දස්ස පටිස්සුත්වා, සහස්සයුත්තං ආජඤ්ඤරථං යොජෙත්වා සක්කස්ස දෙවානමින්දස්ස පටිවෙදෙසි: යුත්තො ඛො තෙ මාරිස, සහස්සයුත්තො ආජඤ්ඤරථො, යස්ස’ දානි කාලං මඤ්ඤසීති. අථ ඛො භික්ඛවෙ සක්කො දෙවානමින්දො වෙජයන්තපාසාදා ඔරොහන්තො පඤ්ජලිකො සුදං භික්ඛුසඞ්ඝං නමස්සති. අථ ඛො භික්ඛවෙ මාතලි සඞ්ගාහකො සක්කං දෙවානමින්දං ගාථාහි අජ්ඣභාසි:
තං හි එතෙ නමස්සෙය්යුං පූතිදෙහසයා නරා,
නිමුග්ගා කුණපස්මෙතෙ ඛුප්පිපාසා සමප්පිතා.
නිමුග්ගා කුණපස්මෙතෙ ඛුප්පිපාසා සමප්පිතා.
කින්නු තෙසං පිහයසි අනාගාරාන වාසව,
ආචාරං ඉසිනං බ්රූහි තං සුණොම වචො තවාති.
ආචාරං ඉසිනං බ්රූහි තං සුණොම වචො තවාති.
[සක්කො:]
එතං තෙසං පිහයාමි අනාගාරාන මාතලි,
යම්හා ගාමා පක්කමන්ති අනපෙක්ඛා වජන්ති තෙ.
යම්හා ගාමා පක්කමන්ති අනපෙක්ඛා වජන්ති තෙ.
න තෙසං කොට්ඨෙ ඔපෙන්ති න කුම්භෙ න ඛලොපියං,
පරනිට්ඨිතමෙසානා තෙන යාපෙන්ති සුබ්බතා,
සුමන්තමන්තිනො ධීරා තුණ්හීභූතා සමඤ්චරා.
පරනිට්ඨිතමෙසානා තෙන යාපෙන්ති සුබ්බතා,
සුමන්තමන්තිනො ධීරා තුණ්හීභූතා සමඤ්චරා.
දෙවා විරුද්ධා අසුරෙහි පුථු මච්චා ච මාතලි,
අවිරුද්ධා විරුද්ධෙසු අත්තදණ්ඩෙසු නිබ්බුතා,
සාදානෙසු අනාදානා තෙ නමස්සාමි මාතලීති.
අවිරුද්ධා විරුද්ධෙසු අත්තදණ්ඩෙසු නිබ්බුතා,
සාදානෙසු අනාදානා තෙ නමස්සාමි මාතලීති.
[මාතලි:]
සෙට්ඨා හි කිර ලොකස්මිං යෙ ත්වං සක්ක නමස්සසි,
අහම්පි තෙ නමස්සාමි යෙ නමස්සසි වාසවාති.
අහම්පි තෙ නමස්සාමි යෙ නමස්සසි වාසවාති.
[ථෙරා:]
ඉදං සුත්වාන මඝවා දෙවරාජා සුජම්පති,
භික්ඛුසඞ්ඝං නමස්සිත්වා පමුඛො රථමාරුහීති.
භික්ඛුසඞ්ඝං නමස්සිත්වා පමුඛො රථමාරුහීති.
සත්තවතවග්ගො දුතියො.
තත්රුද්දානං:
වතපදෙන තයො වුත්තා දළිද්දඤ්ච රාමණෙය්යකං,
යජමානඤ්ච වන්දනා තයො සක්කනමස්සනාති.
යජමානඤ්ච වන්දනා තයො සක්කනමස්සනාති.