11. 2. 10.
තතිය සක්ක නමස්සන සුත්තං
266. එවං මෙ සුතං: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තත්ර ඛො භගවා භික්ඛූ ආමන්තෙසි භික්ඛවොති. භදන්තෙති තෙ භික්ඛූ භගවතො පච්චස්සොසුං. භගවා එතදවොච:
භූතපුබ්බං භික්ඛවෙ සක්කො දෙවානමින්දො මාතලිසඞ්ගාහකං ආමන්තෙසි: යොජෙහි සම්ම මාතලි, සහස්සයුත්තං ආජඤ්ඤරථං උය්යානභූමිං ගච්ඡාම සුභූමිං දස්සනායාති.
එවං භද්දන්තවාති ඛො භික්ඛවෙ, මාතලි සඞ්ගාහකො සක්කස්ස දෙවානමින්දස්ස පටිස්සුත්වා, සහස්සයුත්තං ආජඤ්ඤරථං යොජෙත්වා සක්කස්ස දෙවානමින්දස්ස පටිවෙදෙසි: යුත්තො ඛො තෙ මාරිස, සහස්සයුත්තො ආජඤ්ඤරථො, යස්ස’ දානි කාලං මඤ්ඤසීති. අථ ඛො භික්ඛවෙ සක්කො දෙවානමින්දො වෙජයන්තපාසාදා ඔරොහන්තො පඤ්ජලිකො සුදං භික්ඛුසඞ්ඝං නමස්සති. අථ ඛො භික්ඛවෙ මාතලි සඞ්ගාහකො සක්කං දෙවානමින්දං ගාථාහි අජ්ඣභාසි:
තං හි එතෙ නමස්සෙය්යුං පූතිදෙහසයා නරා,
නිමුග්ගා කුණපස්මෙතෙ ඛුප්පිපාසා සමප්පිතා.
කින්නු තෙසං පිහයසි අනාගාරාන වාසව,
ආචාරං ඉසිනං බ්රූහි තං සුණොම වචො තවාති.
[සක්කො:]
එතං තෙසං පිහයාමි අනාගාරාන මාතලි,
යම්හා ගාමා පක්කමන්ති අනපෙක්ඛා වජන්ති තෙ.
න තෙසං කොට්ඨෙ ඔපෙන්ති න කුම්භෙ න ඛලොපියං,
පරනිට්ඨිතමෙසානා තෙන යාපෙන්ති සුබ්බතා,
සුමන්තමන්තිනො ධීරා තුණ්හීභූතා සමඤ්චරා.
දෙවා විරුද්ධා අසුරෙහි පුථු මච්චා ච මාතලි,
අවිරුද්ධා විරුද්ධෙසු අත්තදණ්ඩෙසු නිබ්බුතා,
සාදානෙසු අනාදානා තෙ නමස්සාමි මාතලීති.
[මාතලි:]
සෙට්ඨා හි කිර ලොකස්මිං යෙ ත්වං සක්ක නමස්සසි,
අහම්පි තෙ නමස්සාමි යෙ නමස්සසි වාසවාති.
[ථෙරා:]
ඉදං සුත්වාන මඝවා දෙවරාජා සුජම්පති,
භික්ඛුසඞ්ඝං නමස්සිත්වා පමුඛො රථමාරුහීති.
සත්තවතවග්ගො දුතියො.
තත්රුද්දානං:
වතපදෙන තයො වුත්තා දළිද්දඤ්ච රාමණෙය්යකං,
යජමානඤ්ච වන්දනා තයො සක්කනමස්සනාති.