11. 2. 6.
යජමානසුත්තං
262. එකං සමයං භගවා රාජගහෙ විහරති ගිජ්ඣකූටෙ පබ්බතෙ. අථ ඛො සක්කො දෙවානමින්දො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතො ඛො සක්කො දෙවානමින්දො භගවන්තං ගාථාය අජ්ඣභාසි:
යජමානානං මනුස්සානං පුඤ්ඤපෙක්ඛාන පාණීනං,
කරොතං ඔපධිකං පුඤ්ඤං කත්ථ දින්නං මහප්ඵලන්ති.
කරොතං ඔපධිකං පුඤ්ඤං කත්ථ දින්නං මහප්ඵලන්ති.
[භගවා:]
චත්තාරො ච පටිපන්නා චත්තාරො ච ඵලෙ ඨිතා,
එස සඞ්ඝො උජුභූතො පඤ්ඤාසීලසමාහිතො.
එස සඞ්ඝො උජුභූතො පඤ්ඤාසීලසමාහිතො.
යජමානානං මනුස්සානං පුඤ්ඤපෙක්ඛාන පාණිනං,
කරොතං ඔපධිකං පුඤ්ඤං සඞ්ඝෙ දින්නං මහප්ඵලන්ති.
කරොතං ඔපධිකං පුඤ්ඤං සඞ්ඝෙ දින්නං මහප්ඵලන්ති.
11. 2. 7.
වන්දනාසුත්තං.
263. සාවත්ථියං–
තෙන ඛො පන සමයෙන භගවා දිවාවිහාරගතො හොති, පටිසල්ලීනො. අථ ඛො සක්කො ච දෙවානමින්දො බ්රහ්මා ච සහම්පතී යෙන භගවා තෙනුපසඞ්කමිංසු, උපසඞ්කමිත්වා පච්චෙකං ද්වාරබාහං නිස්සාය අට්ඨංසු. අථ ඛො සක්කො දෙවානමින්දො භගවතො සන්තිකෙ ඉමං ගාථං අභාසි:
උට්ඨෙහි වීර විජිතසඞ්ගාම පන්නභාර අනණ විචර ලොකෙ,
චිත්තඤ්ච තෙ සුවිමුත්තං චන්දො යථා පණ්ණරසාය රත්තින්ති.
චිත්තඤ්ච තෙ සුවිමුත්තං චන්දො යථා පණ්ණරසාය රත්තින්ති.
[භගවා:]
න ඛො දෙවානමින්ද තථාගතා එවං වන්දිතබ්බා. එවඤ්ච ඛො දෙවානමින්ද තථාගතා වන්දිතබ්බා:
උට්ඨෙහි වීර විජිතසඞ්ගාම සත්ථවාහ අනණ විචර ලොකෙ,
දෙසස්සු භගවා ධම්මං අඤ්ඤාතාරො භවිස්සන්තීති.
දෙසස්සු භගවා ධම්මං අඤ්ඤාතාරො භවිස්සන්තීති.
11. 2. 8.
සක්ක නමස්සන සුත්තං
264. සාවත්ථියං–
භූතපුබ්බං භික්ඛවෙ සක්කො දෙවානමින්දො මාතලිං සඞ්ගාහකං ආමන්තෙසි: යොජෙහි සම්ම මාතලි, සහස්සයුත්තං ආජඤ්ඤරථං. උය්යානභූමිං ගච්ඡාම සුභූමිං දස්සනායාති.
එවං භද්දන්තවාති ඛො භික්ඛවෙ මාතලි සඞ්ගාහකො සක්කස්ස දෙවානමින්දස්ස පටිස්සුත්වා සහස්සයුත්තං ආජඤ්ඤරථං යොජෙත්වා සක්කස්ස දෙවානමින්දස්ස පටිවෙදෙසි: යුත්තො ඛො තෙ මාරිස, සහස්සයුත්තො ආජඤ්ඤරථො. යස්ස දානි කාලං මඤ්ඤසීති.
අථ ඛො භික්ඛවෙ සක්කො දෙවානමින්දො වෙජයන්තපාසාදා ඔරොහන්තො පඤ්ජලිකො සුදං පුථුද්දිසා නමස්සති. අථ ඛො භික්ඛවෙ මාතලිසඞ්ගාහකො සක්කං දෙවානමින්දං ගාථාය අජ්ඣභාසි:
තං නමස්සන්ති තෙවිජ්ජා සබ්බෙ භුම්මා ච ඛත්තියා,
චත්තාරො ච මහාරාජා තිදසා ච යසස්සිනො,
අථ කො නාම සො යක්ඛො යං ත්වං සක්ක නමස්සසීති.
චත්තාරො ච මහාරාජා තිදසා ච යසස්සිනො,
අථ කො නාම සො යක්ඛො යං ත්වං සක්ක නමස්සසීති.
[සක්කො:]
මං නමස්සන්ති තෙවිජ්ජා සබ්බෙ භුම්මා ච ඛත්තියා,
චත්තාරො ච මහාරාජා තිදසා ච යසස්සිනො.
චත්තාරො ච මහාරාජා තිදසා ච යසස්සිනො.
අහඤ්ච සීලසම්පන්නෙ චිරරත්තසමාහිතෙ,
සම්මාපබ්බජිතෙ වන්දෙ බ්රහ්මචරියපරායනෙ.
සම්මාපබ්බජිතෙ වන්දෙ බ්රහ්මචරියපරායනෙ.
යෙ ගහට්ඨා පුඤ්ඤකරා සීලවන්තො උපාසකා,
ධම්මෙන දාරං පොසෙන්ති තෙ නමස්සාමි මාතලීති.
ධම්මෙන දාරං පොසෙන්ති තෙ නමස්සාමි මාතලීති.
[මාතලි:]
සෙට්ඨා හි කිර ලොකස්මිං යෙ ත්වං සක්ක නමස්සසි,
අහම්පි තෙ නමස්සාමි යෙ නමස්සසි වාසවාති.
අහම්පි තෙ නමස්සාමි යෙ නමස්සසි වාසවාති.
[ථෙරා:]
ඉදං වත්වාන මඝවා දෙවරාජා සුජම්පති,
පුථුද්දිසා නමස්සිත්වා පමුඛො රථමාරුහීති.
පුථුද්දිසා නමස්සිත්වා පමුඛො රථමාරුහීති.