78. කිමත්ථකාමො න දදෙ කිං මච්චො න පරිච්චජෙ,
කිං සු මුඤ්චෙය්ය කල්යාණං පාපිකඤ්ච න මොචයෙති.

අත්තානං න දදෙ පොසො අත්තානං න පරිච්චජෙ,
වාචං මුඤ්චෙය්ය කල්යාණං පාපිකඤ්ච න මොචයෙති.

79. කිං සු බන්ධති පාථෙය්යං කිං සු භොගානමාසයො,
කිං සු නරං පරිකස්සති කිං සු ලොකස්මිං දුජ්ජහං,
කිස්මිං බද්ධා පුථු සත්තා පාසෙන සකුණී යථාති.

සද්ධා බන්ධති පාථෙය්යං සිරී භොගානමාසයො,
ඉච්ඡා නරං පරිකස්සති ඉච්ඡා ලොකස්මිං දුජ්ජහා,
ඉච්ඡාබද්ධා පුථුසත්තා පාසෙන සකුණී යථාති.

80. කිං සු ලොකස්මිං පජ්ජොතො කිං සු ලොකස්මිං ජාගරො,
කිං සු කම්මෙ සජීවානං කිමස්ස ඉරියාපථො.

කිං සු අලසං අනලසඤ්ච මාතා පුත්තංව පොසති,
කිං සු භූතූපජීවන්ති යෙ පාණා පඨවිංසිතාති.

පඤ්ඤා ලොකස්මිං පජ්ජොතො සති ලොකස්මිං ජාගරො,
ගාවො කම්මෙ සජීවානං සීතස්ස ඉරියාපථො.

වුට්ඨි අලසං අනලසඤ්ච මාතා පුත්තංව පොසති,
වුට්ඨිං භූතූපජීවන්ති යෙ පාණා පඨවිංසිතාති.

81. කෙ සූධ අරණා ලොකෙ කෙසං වුසිතං න නස්සති,
කෙධ ඉච්ඡං පරිජානන්ති කෙසං භොජිස්සියං සදා.

කිං සු මාතා පිතා භාතා වන්දන්තී නං පතිට්ඨිතං,
කිං සු ඉධ ජාතිහීනං අභිවාදෙන්ති ඛත්තියාති.

සමණීධ අරණා ලොකෙ සමණානං වුසිතං න නස්සති,
සමණා ඉච්ඡං පරිජානන්ති සමණානං භොජිස්සියං සදා.

ඣත්වා රථඤ්ච චිත්තඤ්ච වුට්ඨි භීතා න ජීරති,
ඉස්සරං කාමං පාථෙය්යං පජ්ජොතො අරණෙනචාති.