කිං සු ඣත්වා සුඛං සෙති කිංසු ඣත්වා න සොචති,
කිස්සස්ස එකධම්මස්ස වධං රොචෙසි ගොතමාති.

කොධං ඣත්වා සුඛං සෙති කොධං ඣත්වා න සොචති,
කොධස්ස විසමූලස්ස මධුරග්ගස්ස දෙවතෙ,
වධං අරියා පසංසන්ති තං හි ඣත්වා න සොචතීති.

72. කිං සු රථස්ස පඤ්ඤාණං කිං සු පඤ්ඤාණමග්ගිනො,
කිං සු රට්ඨස්ස පඤ්ඤාණං කිං සු පඤ්ඤාණමිත්ථියාති.

ධජො රථස්ස පඤ්ඤාණං ධූමො පඤ්ඤාණමග්ගිනො,
රාජා රට්ඨස්ස පඤ්ඤාණං භත්තා පඤ්ඤාණමිත්ථියාති.

73. කිං සූධ විත්තං පුරිසස්ස සෙට්ඨං කිං සු සුචිණ්ණො සුඛමාවහාති,
කිං සු හවෙ සාදුතරං රසානං කථංජීවිං ජීවිතමාහු සෙට්ඨන්ති.

සද්ධීධ විත්තං පුරිසස්ස සෙට්ඨං ධම්මො සුචිණ්ණො සුඛමාවහාති,
සච්චං හවෙ සාදුතරං රසානං පඤ්ඤාජීවිං ජීවිතමාහු සෙට්ඨන්ති.

74. කිං සු උප්පතතං සෙට්ඨං කිං සු නිපතතං වරං,
කිං සු පවජමානානං කිං සු පවදතං වරන්ති.

බීජං උප්පතතං සෙට්ඨං වුට්ඨි නිපතතං වරා,
ගාවො පවජමානානං පුත්තො පවදතං වරොති.

විජ්ජා උප්පතතං සෙට්ඨා අවිජ්ජා නිපතතං වරා,
සඞ්ඝො පවජමානානං බුද්ධො පවදතං වරොති.