72. කිං සු රථස්ස පඤ්ඤාණං කිං සු පඤ්ඤාණමග්ගිනො,
කිං සු රට්ඨස්ස පඤ්ඤාණං කිං සු පඤ්ඤාණමිත්ථියාති.

ධජො රථස්ස පඤ්ඤාණං ධූමො පඤ්ඤාණමග්ගිනො,
රාජා රට්ඨස්ස පඤ්ඤාණං භත්තා පඤ්ඤාණමිත්ථියාති.

73. කිං සූධ විත්තං පුරිසස්ස සෙට්ඨං කිං සු සුචිණ්ණො සුඛමාවහාති,
කිං සු හවෙ සාදුතරං රසානං කථංජීවිං ජීවිතමාහු සෙට්ඨන්ති.

සද්ධීධ විත්තං පුරිසස්ස සෙට්ඨං ධම්මො සුචිණ්ණො සුඛමාවහාති,
සච්චං හවෙ සාදුතරං රසානං පඤ්ඤාජීවිං ජීවිතමාහු සෙට්ඨන්ති.

74. කිං සු උප්පතතං සෙට්ඨං කිං සු නිපතතං වරං,
කිං සු පවජමානානං කිං සු පවදතං වරන්ති.

බීජං උප්පතතං සෙට්ඨං වුට්ඨි නිපතතං වරා,
ගාවො පවජමානානං පුත්තො පවදතං වරොති.

විජ්ජා උප්පතතං සෙට්ඨා අවිජ්ජා නිපතතං වරා,
සඞ්ඝො පවජමානානං බුද්ධො පවදතං වරොති.

75. කිං සූ’ධ භීතා ජනතා අනෙකා මග්ගො ච නෙකායතනං පවුත්තො,
පුච්ඡාමි තං ගොතම භූරිපඤ්ඤ කිස්මිං ඨිතො පරලොකං න භායෙති.

වාචං මනඤ්ච පණිධාය සම්මා කායෙන පාපානි අකුබ්බමානො,
බව්හන්නපානං ඝරමාවසන්තො සද්ධො මුදූ සංවිභාගී වදඤ්ඤූ,
එතෙසු ධම්මෙසු ඨිතො චතූසු ධම්මෙ ඨිතො පරලොකං න භායෙති.

76. කිං සු ජීරති කිං න ජීරති කිං සු උප්පථොති වුච්චති,
කිං සු ධම්මානං පරිපන්ථො කිං සු රත්තින්දිවක්ඛයො,
කිං මලං බ්රහ්මචරියස්ස කිං සිනානමනොදකං.

කති ලොකස්මිං ඡිද්දානි යත්ථ චිත්තං න තිට්ඨති,
භගවන්තං පුට්ඨුමාගම්ම කථං ජානෙමු තං මයන්ති.

රූපං ජීරති මච්චානං නාමගොත්තං න ජීරති,
රාගො උප්පථොති වුච්චති ලොභො ධම්මානං පරිපන්ථො
වයො රත්තින්දිවක්ඛයො ඉත්ථිමලං බ්රහ්මචරියස්ස එත්ථායං සජ්ජතෙ පජා,
තපො ච බ්රහ්මචරියඤ්ච තං සිනානමනොදකං.

ඡ ලොකස්මිං ඡිද්දානි යත්ථ විත්තං න තිට්ඨති,
ආලස්සං ච පමාදො ච අනුට්ඨානං අසංයමො,
නිද්දා තන්දි ච තෙ ඡිද්දෙ සබ්බසො තං විවජ්ජයෙති.

77. කිං සු ඉස්සරියං ලොකෙ කිං සු භණ්ඩානමුත්තමං,
කිං සු සත්ථමලං ලොකෙ කිං සු ලොකස්මිං අබ්බුදං.

කිං සු හරන්තං වාරෙන්ති හරන්තො පන කො පියො,
කිං සු පුනප්පුනායන්තං අභිනන්දන්ති පණ්ඩිතාති.