1. 6. 4.
වත්ථුසුත්තං.
[දෙවතා:]
54. කිංසු වත්ථු මනුස්සානං කිං සූධ පරමො සඛා,
කිංසු භූතූපජීවන්ති යෙ පාණා පඨවිංසිතාති.
[භගවා:]
54. පුත්තා වත්ථු මනුස්සානං භරියාව පරමො සඛා,
වුට්ඨිං භූතූපජීවන්ති යෙ පාණා පඨවිංසිතාති.
1. 6. 5.
පඨමජනෙතිසුත්තං
[දෙවතා:]
55. කිංසු ජනෙති පුරිසං කිංසු තස්ස විධාවති,
කිංසු සංසාරමාපාදි කිංසු තස්ස මහබ්භයන්ති.
[භගවා:]
තණ්හා ජනෙති පුරිසං චිත්තමස්ස විධාවති,
සත්තො සංසාරමාපාදි දුක්ඛමස්ස මහබ්භයන්ති.
1. 6. 6.
දුතියජනෙතිසුත්තං
[දෙවතා:]
56. කිංසු ජනෙති පුරිසං කිංසු තස්ස විධාවති,
කිංසු සංසාරමාපාදි කිස්මා න පරිමුච්චතීති.
[භගවා:]
තණ්හා ජනෙති පුරිසං චිත්තමස්ස විධාවති,
සත්තො සංසාරමාපාදි දුක්ඛා න පරිමුච්චතීති.
1. 6. 7.
තතියජනෙතිසුත්තං
[දෙවතා:]
57. කිංසු ජනෙති පුරිසං කිංසු තස්ස විධාවති,
කිංසු සංසාරමාපාදි කිංසු තස්ස පරායණන්ති.
[භගවා:]
තණ්හා ජනෙති පුරිසං චිත්තමස්ස විධාවති,
සත්තො සංසාරමාපාදි කම්මං තස්ස පරායණන්ති.