55. කිංසු ජනෙති පුරිසං කිංසු තස්ස විධාවති,
කිංසු සංසාරමාපාදි කිංසු තස්ස මහබ්භයන්ති.

තණ්හා ජනෙති පුරිසං චිත්තමස්ස විධාවති,
සත්තො සංසාරමාපාදි දුක්ඛමස්ස මහබ්භයන්ති.

56. කිංසු ජනෙති පුරිසං කිංසු තස්ස විධාවති,
කිංසු සංසාරමාපාදි කිස්මා න පරිමුච්චතීති.

තණ්හා ජනෙති පුරිසං චිත්තමස්ස විධාවති,
සත්තො සංසාරමාපාදි දුක්ඛා න පරිමුච්චතීති.

57. කිංසු ජනෙති පුරිසං කිංසු තස්ස විධාවති,
කිංසු සංසාරමාපාදි කිංසු තස්ස පරායණන්ති.

තණ්හා ජනෙති පුරිසං චිත්තමස්ස විධාවති,
සත්තො සංසාරමාපාදි කම්මං තස්ස පරායණන්ති.

58. කිංසු උප්පථො අක්ඛාතො කිංසු රත්තින්දිවක්ඛයො,
කිං මලං බ්රහ්මචරියස්ස කිං සිනානමනොදකන්ති.

රාගො උප්පථො අක්ඛාතො වයො රත්තින්දිවක්ඛයො,
ඉත්ථි මලං බ්රහ්මචරියස්ස එත්ථායං සජ්ජතෙ පජා,
තපො ච බ්රහ්මචරියඤ්ච තං සිනානමනොදකන්ති.

59. කිංසු දුතියා පුරිසස්ස හොති කිංසු චෙනං පසංසති,
කිස්ස චාභිරතො මච්චො සබ්බදුක්ඛා පමුච්චතීති.

සද්ධා දුතියා පුරිසස්ස හොති පඤ්ඤා චෙනං පසංසති,
නිබ්බාණාභිරතො මච්චො සබ්බදුක්ඛා පමුච්චතීති.

60. කිංසු නිදානං ගාථානං කිංසු තාසං වියඤ්ජනං,
කිංසු සන්නිස්සිතා ගාථා කිංසු ගාථානමාසයො.

ඡන්දො නිදානං ගාථානං අක්ඛරා තාසං වියඤ්ජනං,
නාමසන්නිස්සිතා ගාථා කවි ගාථානමාසයො.

ජරා අජරසා මිත්තං වත්ථු තීණි ජනෙති ච,
උප්පථො ච දුතියො ච කවිනා පූරිතො වග්ගොති.