48. ඉදඤ්හි තං ජෙතවනං ඉසිසඞ්ඝනිසෙවිතං,
ආවුත්ථං ධම්මරාජෙන පීතිසඤ්ජනනං මම.

කම්මං විජ්ජා ච ධම්මො ච සීලං ජීවිතමුත්තමං,
එතෙන මච්චා සුජ්ඣන්ති න ගොත්තෙන ධනෙන වා.

තස්මා හි පණ්ඩිතො පොසො සම්පස්සං අත්ථමත්තනො,
යොනිසො විචිනෙ ධම්මං එවං තත්ථ විසුජ්ඣති.

සාරිපුත්තොව පඤ්ඤාය සීලෙන උපසමෙන ච,
යොපි පාරගතො භික්ඛු එතාව පරමො සියා’ති.

49. යෙ’ධ මච්ඡරිනො ලොකෙ කදරියා පරිභාසකා,
අඤ්ඤෙසං දදමානානං අන්තරායකරා නරා.

කීදිසො තෙසං විපාකො සම්පරායො ච කීදිසො,
භගවන්තං පුට්ඨුමාගම්ම කථං ජානෙමු තං මයන්ති.

යෙ’ධ මච්ඡරිනො ලොකෙ කදරියා පරිභාසකා,
අඤ්ඤෙසං දදමානානං අන්තරායකරා නරා.

නිරයං තිරච්ඡානයොනිං යමලොකඤ්චුපපජ්ජරෙ,
සචෙ එන්ති මනුස්සත්තං දළිද්දෙ ජායරෙ කුලෙ,
චොළං පිණ්ඩො රතී ඛිඩ්ඩා යත්ථ කිච්ඡෙන ලබ්භති.

පරතො ආසිංසරෙ බාලා තම්පි තෙසං නලබ්භති,
දිට්ඨෙ ධම්මෙ සවිපාකො සම්පරායෙ ච දුග්ගතීති.

ඉතිහෙතං විජානාම අඤ්ඤං පුච්ඡාම ගොතම,
යෙ’ධ ලද්ධා මනුස්සත්තං වදඤ්ඤූ වීතමච්ඡරා.
බුද්ධෙ පසන්නා ධම්මෙ ච සඞ්ඝෙ ච තිබ්බගාරවා.

කීදිසො තෙසං විපාකො සම්පරායො ච කීදිසො,
භගවන්තං පුට්ඨුමාගම්ම කථං ජානෙමු තං මයන්ති.

යෙ’ධ ලද්ධා මනුස්සත්තං වදඤ්ඤූ වීතමච්ඡරා,
බුද්ධෙ පසන්නා ධම්මෙ ච සඞ්ඝෙ ච තිබ්බගාරවා,
එතෙ සග්ගෙ පකාසෙන්ති යත්ථ තෙ උපපජ්ජරෙ.

සචෙ එන්ති මනුස්සත්තං අඩ්ඪෙ ආජායරෙ කුලෙ,
චොළං පිණ්ඩො රතී ඛිඩ්ඩා යත්ථාකිච්ඡෙන ලබ්භති.

පරසම්භතෙසු භොගෙසු වසවත්තීව මොදරෙ,
දිට්ඨෙ ධම්මෙ සවිපාකො සම්පරායෙ ච සුග්ගතීති.

50. අවිහං උපපන්නා සෙ විමුත්තා සත්ත භික්ඛවො,
රාගදොසපරික්ඛීණා තිණ්ණා ලොකෙ විසත්තිකන්ති.

කෙ ච තෙ අතරුං සඞ්ගං මච්චුධෙය්යං සුදුත්තරං,
කෙ හිත්වා මානුසං දෙහං දිබ්බං යොගං උපච්චගුං.

උපකො පලගණ්ඩො ච පුක්කුසාති ච තෙ තයො,
භද්දියො භද්දදෙවො ච බාහුදන්තී ච පිඞ්ගියො.
තෙ හිත්වා මානුසං දෙහං දිබ්බං යොගං උපච්චගුන්ති.

කුසලී භාසසි තෙසං මාරපාසප්පහායිනං,
කස්ස තෙ ධම්මමඤ්ඤාය අච්ඡිදුං භවබන්ධනං.