50. අවිහං උපපන්නා සෙ විමුත්තා සත්ත භික්ඛවො,
රාගදොසපරික්ඛීණා තිණ්ණා ලොකෙ විසත්තිකන්ති.

කෙ ච තෙ අතරුං සඞ්ගං මච්චුධෙය්යං සුදුත්තරං,
කෙ හිත්වා මානුසං දෙහං දිබ්බං යොගං උපච්චගුං.

උපකො පලගණ්ඩො ච පුක්කුසාති ච තෙ තයො,
භද්දියො භද්දදෙවො ච බාහුදන්තී ච පිඞ්ගියො.
තෙ හිත්වා මානුසං දෙහං දිබ්බං යොගං උපච්චගුන්ති.

කුසලී භාසසි තෙසං මාරපාසප්පහායිනං,
කස්ස තෙ ධම්මමඤ්ඤාය අච්ඡිදුං භවබන්ධනං.

න අඤ්ඤත්ර භගවතා නාඤ්ඤත්ර තව සාසනා,
යස්ස තෙ ධම්මමඤ්ඤාය අච්ඡිදුං භවබන්ධනං.

යත්ථ නාමඤ්ච රූපඤ්ච අසෙසං උපරුජ්ඣති,
තං තෙ ධම්මං ඉධඤ්ඤාය අච්ඡිදුං භවබන්ධනන්ති.

ගම්භීරං භාසසි වාචං දුබ්බිජානං සුදුබ්බුධං,
කස්ස ත්වං ධම්මමඤ්ඤාය වාචං භාසසි ඊදිසන්ති.

කුම්භකාරො පුරෙ ආසිං වෙහලිඞ්ගෙ ඝටීකරො,
මාතාපෙත්තිභරො ආසිං කස්සපස්ස උපාසකො.

විරතො මෙථුනා ධම්මා බ්රහ්මචාරී නිරාමිසො,
අහුවා තෙ සගාමෙය්යො අහුවා තෙ පුරෙ සඛා.

සො’හං එතෙ පජානාමි විමුත්තෙ සත්ත භික්ඛවො,
රාගදොසපරික්ඛීණෙ තිණ්ණෙ ලොකෙ විසත්තිකන්ති.

එවමෙතං තදා ආසි යථා භාසසි භග්ගව,
කුම්භකාරො පුරෙ ආසි වෙහලිඞ්ගෙ ඝටීකරො,
මාතාපෙත්තිභරො ආසි කස්සපස්ස උපාසකො.

විරතො මෙථුනා ධම්මා බ්රහ්මචාරී නිරාමිසො,
අහුවා මෙ සගාමෙය්යො අහුවා මෙ පුරෙ සඛාති.

එවමෙතං පුරාණානං සහායානං අහු සඞ්ගමො,
උභින්නං භාවිතත්තානං සරීරන්තිමධාරිනන්ති.

ආදිත්තං කිංදදං අන්නං එකමූලඅනොමියං,
අච්ඡරාවනජෙතෙන මච්ඡරෙන ඝටීකරො’ති.