1. 4. 9.
පජ්ජුන්නධීතුසුත්තං
39. එවං මෙ සුතං එකං සමයං භගවා වෙසාලියං විහරති මහාවනෙ කූටාගාරසාලායං. අථ ඛො කොකනදා පජ්ජුන්නස්ස ධීතා අභික්කන්තාය රත්තියා අභික්කන්තවණ්ණා කෙවලකප්පං මහාවනං ඔභාසෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතා ඛො කොකනදා පජ්ජුන්නස්ස ධීතා භගවතො සන්තිකෙ ඉමා ගාථායො අභාසි.
වෙසාලියං වනෙ විහරන්තං
අග්ගං සත්තස්ස සම්බුද්ධං,
කොකනදාහමස්මි අභිවන්දෙ
කොකනදා පජ්ජුන්නස්ස ධීතා.
සුතමෙව මෙ පුරෙ ආසි
ධම්මො චක්ඛුමතානුබුද්ධො,
සාහංදානි සක්ඛී ජානාමි
මුනිනො දෙසයතො සුගතස්ස.
යෙ කෙචි අරියධම්මං
විගරහන්තා චරන්ති දුම්මෙධා,
උපෙන්ති රොරුවං ඝොරං
චිරරත්තං දුක්ඛමනුභවන්ති.
යෙ ච ඛො අරියධම්මෙ
ඛන්තියා උපසමෙන උපෙතා,
පහාය මානුසං දෙහං
දෙවකායං පරිපූරෙස්සන්තී’ති.
1. 4. 10.
චුල්ලපජ්ජුන්නධීතුසුත්තං
40. එවං මෙ සුතං: එකං සමයං භගවා වෙසාලියං විහරති මහාවනෙ කූටාගාරසාලායං. අථ ඛො චුල්ලකොකනදා පජ්ජුන්නස්ස ධීතා අභික්කන්තාය රත්තියා අභික්කන්තවණ්ණා කෙවලකප්පං මහාවනං ඔභාසෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතා ඛො චුල්ලකොකනදා පජ්ජුන්නස්ස ධීතා භගවතො සන්තිකෙ ඉමා ගාථායො අභාසි:
ඉධාගමා විජ්ජුපභාසවණ්ණා
කොකනදා පජ්ජුන්නස්ස ධීතා,
බුද්ධඤ්ච ධම්මඤ්ච නමස්සමානා
ගාථා චිමා අත්ථවතී අභාසි.
බහුනාපි ඛො තං විභජෙය්යං
පරියායෙන තාදිසො ධම්මො,
සංඛිත්තමත්තං ලපයිස්සාමි
යාවතා මෙ මනසා පරියත්තං.
පාපං න කයිරා වචසා මනසා
කායෙන වා කිඤ්චන සබ්බලොකෙ,
කාමෙ පහාය සතිමා සම්පජානො
දුක්ඛං න සෙවෙථ අනත්ථසංහිතන්ති.
සතුල්ලපකායිකවග්ගො චතුත්ථො.
තත්රුද්දානං:
සබ්භි මච්ඡරිනා සාධු නසන්තුජ්ඣානසඤ්ඤිනො,
සද්ධා සමයො සකලිකං උභො පජ්ජුන්නධීතරො’ති.