1. 4. 10.
චුල්ලපජ්ජුන්නධීතුසුත්තං
40. එවං මෙ සුතං: එකං සමයං භගවා වෙසාලියං විහරති මහාවනෙ කූටාගාරසාලායං. අථ ඛො චුල්ලකොකනදා පජ්ජුන්නස්ස ධීතා අභික්කන්තාය රත්තියා අභික්කන්තවණ්ණා කෙවලකප්පං මහාවනං ඔභාසෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතා ඛො චුල්ලකොකනදා පජ්ජුන්නස්ස ධීතා භගවතො සන්තිකෙ ඉමා ගාථායො අභාසි:
ඉධාගමා විජ්ජුපභාසවණ්ණා
කොකනදා පජ්ජුන්නස්ස ධීතා,
බුද්ධඤ්ච ධම්මඤ්ච නමස්සමානා
ගාථා චිමා අත්ථවතී අභාසි.
බහුනාපි ඛො තං විභජෙය්යං
පරියායෙන තාදිසො ධම්මො,
සංඛිත්තමත්තං ලපයිස්සාමි
යාවතා මෙ මනසා පරියත්තං.
පාපං න කයිරා වචසා මනසා
කායෙන වා කිඤ්චන සබ්බලොකෙ,
කාමෙ පහාය සතිමා සම්පජානො
දුක්ඛං න සෙවෙථ අනත්ථසංහිතන්ති.
සතුල්ලපකායිකවග්ගො චතුත්ථො.
තත්රුද්දානං:
සබ්භි මච්ඡරිනා සාධු නසන්තුජ්ඣානසඤ්ඤිනො,
සද්ධා සමයො සකලිකං උභො පජ්ජුන්නධීතරො’ති.
5. ආදිත්තවග්ගො
1. 5. 1.
ආදිත්තසුත්තං.
41. එවං මෙ සුතං: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. අථ ඛො අඤ්ඤතරා දෙවතා අභික්කන්තාය රත්තියා අභික්කන්තවණ්ණා කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතා ඛො සා දෙවතා භගවතො සන්තිකෙ ඉමා ගාථායො අභාසි:
ආදිත්තස්මිං අගාරස්මිං යං නීහරති භාජනං,
තං තස්ස හොති අත්ථාය නො ච යං තත්ථ ඩය්හති.
එවමාදිපිතො ලොකො ජරාය මරණෙන ච,
නීහරෙථෙව දානෙන දින්නං හොති සුනීහතං.
දින්නං සුඛඵලං හොති නාදින්නං හොති තං තථා,
චොරා හරන්ති රාජානො අග්ගි ඩහති නස්සති.
අථ අන්තෙන ජහති සරීරං සපරිග්ගහං,
එතදඤ්ඤාය මෙධාවී භුඤ්ජෙථ ච දදෙථ ච.
දත්වා ච භුත්වා ච යථානුභාවං අනින්දිතො සග්ගමුපෙති ඨානන්ති.
1. 5. 2.
කිංදදසුත්තං.
[දෙවතා:]
42. කිංදදො බලදො හොති කිංදදො හොති වණ්ණදො.
කිංදදො සුඛදො හොති කිංදදො හොති චක්ඛුදො.
යො ච සබ්බදදො හොති තං මෙ අක්ඛාහි පුච්ඡිතොති.
[භගවා:]
අන්නදො බලදො හොති වත්ථදො හොති වණ්ණදො,
යානදො සුඛදො හොති දීපදො හොති චක්ඛුදො.
සො ච සබ්බදදො හොති යො දදාති උපස්සයං,
අමතංදදො ච සො හොති යො ධම්මමනුසාසතීති.