1. 4. 3.
සාධුසුත්තං
33. සාවත්ථියං–
අථ ඛො සම්බහුලා සතුල්ලපකායිකා දෙවතායො අභික්කන්තාය රත්තියා අභික්කන්තවණ්ණා කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමිංසු. උපසඞ්කමිත්වා භගවන්තං අභිවාදෙත්වා එකමන්තං අට්ඨංසු. එකමන්තං ඨිතා ඛො එකා දෙවතා භගවතො සන්තිකෙ ඉමං උදානං උදානෙසි:
සාධු ඛො මාරිස දානං.
මච්ඡෙරා ච පමාදා ච එවං දානං න දීයති,
පුඤ්ඤමාකඞ්ඛමානෙන දෙය්යං හොති විජානතාති.
අථ ඛො අපරා දෙවතා භගවතො සන්තිකෙ ඉමං උදානං උදානෙසි:
සාධු ඛො මාරිස දානං. අපි ච අප්පස්මිම්පි සාධු දානං.
අප්පස්මෙකෙ පවෙච්ඡන්ති බහුනෙකෙ න දිච්ඡරෙ,
අප්පස්මා දක්ඛිණා දින්නා සහස්සෙන සමං මිතාති.
අථ ඛො අපරා දෙවතා භගවතො සන්තිකෙ ඉමං උදානං උදානෙසි:
සාධු ඛො මාරිස දානං. අප්පස්මිම්පි සාධු දානං. අපි ච සද්ධායපි සාධු දානං.
දානඤ්ච යුද්ධඤ්ච සමානමාහු අප්පාපි සන්තා බහුකෙ ජිනන්ති,
අප්පම්පි චෙ සද්දහානො දදාති තෙනෙව සො හොති සුඛී පරත්ථාති.
අථ ඛො අපරා දෙවතා භගවතො සන්තිකෙ ඉමං උදානං උදානෙසි:
සාධු ඛො මාරිස දානං. අප්පස්මිම්පි සාධු දානං. සද්ධායපි සාධු දානං. අපි ච ධම්මලද්ධස්සපි සාධු දානං.
යො ධම්මලද්ධස්ස දදාති දානං උට්ඨානවීරියාධිගතස්ස ජන්තු,
අතික්කම්ම සො වෙතරණිං යමස්ස දිබ්බානි ඨානානි උපෙති මච්චොති.
අථ ඛො අපරා දෙවතා භගවතො සන්තිකෙ ඉමං උදානං උදානෙසි:
සාධු ඛො මාරිස දානං. අප්පස්මිම්පි සාධු දානං. සද්ධායපි සාධු දානං. ධම්මලද්ධස්ස පි සාධු දානං. අපි ච විචෙය්ය දානම්පි සාධු.
විචෙය්ය දානං සුගතප්පසත්ථං
යෙ දක්ඛිණෙය්යා ඉධ ජීවලොකෙ,
එතෙසු දින්නානි මහප්ඵලානි
බීජානි වුත්තානි යථා සුඛෙත්තෙති.
අථ ඛො අපරා දෙවතා භගවතො සන්තිකෙ ඉමං උදානං උදානෙසි:
සාධු ඛො මාරිස දානං. අප්පස්මිම්පි සාධු දානං. සද්ධායපි සාධු දානං. ධම්මලද්ධස්සපි සාධු දානං. විචෙය්ය දානම්පි සාධු. අපි ච පාණෙසුපි සාධු සංයමො.
යො පාණභූතෙසු අහෙඨයං චරං පරූපවාදා න කරොති පාපං,
භීරුං පසංසන්ති න හි තත්ථ සූරං භයා හි සන්තො න කරොන්ති පාපන්ති.
අථ ඛො අපරා දෙවතා භගවන්තං එතදවොච: කස්ස නු ඛො භගවා සුභාසිතන්ති?
[භගවා:]
සබ්බාසං වො සුභාසිතං පරියායෙන. අපි ච මමාපි සුණාථ:
සද්ධාහි දානං බහුධා පසත්ථං
දානා ච ඛො ධම්මපදංව සෙය්යො,
පුබ්බෙ ච හි පුබ්බතරෙ ච සන්තො
නිබ්බාණමෙවජ්ඣගමුං සපඤ්ඤාති.
1. 4. 4.
නසන්තිසුත්තං.
34. එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ.