1. 3. 9.
චතුචක්කසුත්තං
29. සාවත්ථියං–
[දෙවතා:]
චතුචක්කං නවද්වාරං පුණ්ණං ලොභෙන සංයුතං,
පඞ්කජාතං මහාවීර කථං යාත්රා භවිස්සති.
පඞ්කජාතං මහාවීර කථං යාත්රා භවිස්සති.
[භගවා:]
ඡෙත්වා නද්ධිං වරත්තඤ්ච ඉච්ඡාලොභඤ්ච පාපකං,
සමූලං තණ්හං අබ්බුය්හ එවං යාත්රා භවිස්සතී’ති.
සමූලං තණ්හං අබ්බුය්හ එවං යාත්රා භවිස්සතී’ති.
1. 3. 10.
එණිජඞ්ගසුත්තං.
30. සාවත්ථියං–
[දෙවතා:]
එණිජඞ්ඝං කිසං වීරං අප්පාහාරං අලොලුපං,
සීහං වෙකචරං නාගං කාමෙසු අනපෙක්ඛිනං,
උපසඞ්කම්ම පුච්ඡාම කථං දුක්ඛා පමුච්චතීති.
සීහං වෙකචරං නාගං කාමෙසු අනපෙක්ඛිනං,
උපසඞ්කම්ම පුච්ඡාම කථං දුක්ඛා පමුච්චතීති.
[භගවා:]
පඤ්ච කාම ගුණාලොකෙ මනොඡට්ඨා පවෙදිතා,
එත්ථ ඡන්දං විරාජෙත්වා එවං දුක්ඛා පමුච්චතීති.
එත්ථ ඡන්දං විරාජෙත්වා එවං දුක්ඛා පමුච්චතීති.
සත්තිවග්ගො තතියො.
තත්රුද්දානං:
සත්තියා ඵුසති චෙව ජටා මනො නිවාරණා,
අරහන්තෙන පජ්ජොතො සරා මහද්ධනෙන ච,
චතුචක්කෙන නවමං එණිජඞ්ඝෙන තෙ දසාති.
අරහන්තෙන පජ්ජොතො සරා මහද්ධනෙන ච,
චතුචක්කෙන නවමං එණිජඞ්ඝෙන තෙ දසාති.
4. සතුල්ලපකායිකවග්ගො
1. 4. 1.
සබ්හිසුත්තං
31. එවං මෙ සුතං එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ.
අථ ඛො සම්බහුලා සතුල්ලපකායිකා දෙවතායො අභික්කන්තාය රත්තියා අභික්කන්තවණ්ණා කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමිංසු. උපසඞ්කමිත්වා භගවන්තං අභිවාදෙත්වා එකමන්තං අට්ඨංසු.
එකමන්තං ඨිතා ඛො එකා දෙවතා භගවතො සන්තිකෙ ඉමං ගාථං අභාසි:
සබ්භිරෙව සමාසෙථ සබ්භි කුබ්බෙථ සන්ථවං,
සතං සද්ධම්මමඤ්ඤාය සෙය්යො හොති න පාපියොති.
සතං සද්ධම්මමඤ්ඤාය සෙය්යො හොති න පාපියොති.
අථ ඛො අපරා දෙවතා භගවතො සන්තිකෙ ඉමං ගාථං අභාසි: