සත්තියා විය ඔමට්ඨො ඩය්හමානොව මත්ථකෙ,
කාමරාගප්පහාණාය සතො භික්ඛු පරිබ්බජෙ’ති.

සත්තියා විය ඔමට්ඨො ඩය්හමානොව මත්ථකෙ,
සක්කායදිට්ඨිප්පහානාය සතො භික්ඛු පරිබ්බජෙ’ති.

නාඵුසන්තං ඵුසති ච ඵුසන්තං ච තතො ඵුසෙ,
තස්මා ඵුසන්තං ඵුසති අප්පදුට්ඨප්පදොසිනන්ති.

යො අප්පදුට්ඨස්ස නරස්ස දුස්සති,
සුද්ධස්ස පොසස්ස අනඞ්ගණස්ස,
තමෙව බාලං පච්චෙති පාපං,
සුඛුමො රජො පටිවාතංව ඛිත්තො’ති.

අන්තො ජටා බහි ජටා ජටාය ජටිතා පජා,
තං තං ගොතම පුච්ඡාමි කො ඉමං විජටයෙ ජටන්ති.

සීලෙ පතිට්ඨාය නරො සපඤ්ඤො චිත්තං පඤ්ඤඤ්ච භාවයං,
ආතාපි නිපකො භික්ඛු සො ඉමං විජටයෙ ජටන්ති.

යෙසං රාගො ච දොසො ච අවිජ්ජා ච විරාජිතා,
ඛීණාසවා අරහන්තො තෙසං විජටිතා ජටා.

යත්ථ නාමඤ්ච රූපඤ්ච අසෙසං උපරුජ්ඣති,
පටිඝං රූපසඤ්ඤා ච එත්ථෙසා ඡිජ්ජතෙ ජටාති.

යතො යතො මනො නිවාරයෙ
න දුක්ඛමෙති නං තතො තතො,
ස සබ්බතො මනො නිවාරයෙ
ස සබ්බතො දුක්ඛා පමුච්චතීති.

න සබ්බතො මනො නිවාරයෙ
මනො යතත්තමාගතං,
යතො යතො ච පාපකං
තතො තතො මනො නිවාරයෙ’ති.