කති ලොකස්මිං පජ්ජොතා යෙහි ලොකො පකාසති,
භගවන්තං පුට්ඨුමාගම්ම කථං ජානෙමු තං මයං.

චත්තාරො ලොකෙ පජ්ජොතා පඤ්චමෙත්ථ න විජ්ජති,
දිවා තපති ආදිච්චො රත්තිං ආභාති චන්දිමා,
අථ අග්ගි දිවාරත්තිං තත්ථ තත්ථ පකාසති,
සම්බුද්ධො තපතං සෙට්ඨො එසා ආභා අනුත්තරා’ති.

එකමන්තං ඨිතා ඛො සා දෙවතා භගවන්තං ගාථාය අජ්ඣභාසි:

කුතො සරා නිවත්තන්ති. කත්ථ වට්ටං න වත්තති,
කත්ථ නාමඤ්ච රූපඤ්ච අසෙසං උපරුජ්ඣතීති.

යත්ථ ආපො ච පඨවී තෙජො වායො න ගාධති,
අතො සරා නිවත්තන්ති එත්ථ වට්ටං න වත්තති,
එත්ථ නාමඤ්ච රූපඤ්ච අසෙසං උපරුජ්ඣතී’ති.

මහද්ධනා මහාභොගා රට්ඨවන්තො’පි ඛත්තියා,
අඤ්ඤමඤ්ඤාභිගිජ්ඣන්ති කාමෙසු අනලඞ්කතා
තෙසු උස්සුක්කජාතෙසු භවසොතානුසාරිසු,
කෙධ තණ්හං පජහිංසු කෙ ලොකස්මිං අනුස්සුකාති.

හිත්වා අගාරං පබ්බජිතා හිත්වා පුත්තං පසුං පියං,
හිත්වා රාගඤ්ච දොසඤ්ච අවිජ්ජඤ්ච විරාජිය
ඛීණාසවා අරහන්තො තෙ ලොකස්මිං අනුස්සුකා’ති.

චතුචක්කං නවද්වාරං පුණ්ණං ලොභෙන සංයුතං,
පඞ්කජාතං මහාවීර කථං යාත්රා භවිස්සති.

ඡෙත්වා නද්ධිං වරත්තඤ්ච ඉච්ඡාලොභඤ්ච පාපකං,
සමූලං තණ්හං අබ්බුය්හ එවං යාත්රා භවිස්සතී’ති.