යතො යතො මනො නිවාරයෙ
න දුක්ඛමෙති නං තතො තතො,
ස සබ්බතො මනො නිවාරයෙ
ස සබ්බතො දුක්ඛා පමුච්චතීති.

න සබ්බතො මනො නිවාරයෙ
මනො යතත්තමාගතං,
යතො යතො ච පාපකං
තතො තතො මනො නිවාරයෙ’ති.

යො හොති භික්ඛු අරහං කතාවී
ඛීණාසවො අන්තිමදෙහධාරී,
අහං වදාමීතිපි සො වදෙය්ය
මමං වදන්තීතිපි සො වදෙය්යාති

යො හොති භික්ඛු අරහං කතාවී
ඛීණාසවො අන්තිමදෙහධාරී,
අහං වදාමීතිපි සො වදෙය්ය
මමං වදන්තීතිපි සො වදෙය්ය
ලොකෙ සමඤ්ඤං කුසලො විදිත්වා,
වොහාරමත්තෙන සො වොහරෙය්යාති.

යො හොති භික්ඛු අරහං කතාවී
ඛීණාසවො අන්තිමදෙහධාරී,
මානං නු ඛො සො උපගම්ම භික්ඛු,
අහං වදාමීතිපි සො වදෙය්ය
මමං වදන්තීතිපි සො වදෙය්යාති.

පහීණමානස්ස න සන්ති ගන්ථා,
විධූපිතා මානගන්ථස්ස සබ්බෙ,
සො වීතිවත්තො මඤ්ඤනං සුමෙධො
අහං වදාමීතිපි සො වදෙය්ය.
මමං වදන්තීතිපි සො වදෙය්ය,
ලොකෙ සමඤ්ඤං කුසලො විදිත්වා
වොහාරමත්තෙන සො වොහරෙය්යා’ති.

කති ලොකස්මිං පජ්ජොතා යෙහි ලොකො පකාසති,
භගවන්තං පුට්ඨුමාගම්ම කථං ජානෙමු තං මයං.

චත්තාරො ලොකෙ පජ්ජොතා පඤ්චමෙත්ථ න විජ්ජති,
දිවා තපති ආදිච්චො රත්තිං ආභාති චන්දිමා,
අථ අග්ගි දිවාරත්තිං තත්ථ තත්ථ පකාසති,
සම්බුද්ධො තපතං සෙට්ඨො එසා ආභා අනුත්තරා’ති.