එවං මෙ සුතං. එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. අථ ඛො ආයස්මතො මාලුඞ්ක්යපුත්තස්ස රහොගතස්ස පතිසල්ලීනස්ස එවං චෙතසො පරිවිතක්කො උදපාදි: යානි’මානි දිට්ඨිගතානි භගවතා අබ්යාකතානි ඨපිතානි පටික්ඛිත්තානි. සස්සතො ලොකො ඉතිපි, අසස්සතො ලොකො ඉතිපි, අන්තවා ලොකො ඉතිපි, අනන්තවා ලොකො ඉතිපි, තං ජීවං තං සරීරං ඉතිපි, අඤ්ඤං ජීවං අඤ්ඤං සරීරං ඉතිපි, හොති තථාගතො පරම්මරණා ඉතිපි, න හොති තථාගතො පරම්මරණා ඉතිපි, හොති ච න ච හොති තථාගතො පරම්මරණා ඉතිපි, නෙව හොති න න හොති තථාගතො පරම්මරණා ඉතිපි, තානි මෙ භගවා න බ්යාකරොති, යානි මෙ භගවා න බ්යාකරොති, තම්මෙ න රුච්චති, තම්මෙ න ඛමති. සො’හං භගවන්තං උපසඞ්කමිත්වා එතමත්ථං පුච්ඡිස්සාමි. සචෙ මෙ භගවා බ්යාකරිස්සති: සස්සතො ලොකොති වා, අසස්සතො ලොකොති වා, අන්තවා ලොකොති වා, අනන්තවා ලොකොති වා, තං ජීවං තං සරීරන්ති වා, අඤ්ඤං ජීවං අඤ්ඤං සරීරන්ති වා, හොති තථාගතො පරම්මරණාති වා, න හොති තථාගතො පරම්මරණාති වා, හොති ච න ච හොති තථාගතො පරම්මරණාති වා, නෙව හොති න න හොති තථාගතො පරම්මරණාති වා, එවා’හං භගවති බ්රහ්මචරියං චරිස්සාමි. නො චෙ මෙ භගවා බ්යාකරොති: සස්සතො ලොකොති වා, අසස්සතො ලොකොති වා -පෙ- නෙව හොති න න හොති තථාගතො පරම්මරණාති වා, එවාහං සික්ඛං පච්චක්ඛාය හීනායාවත්තිස්සාමීති.

අථ ඛො ආයස්මා මාලුඞ්ක්යපුත්තො සායන්හසමයං පතිසල්ලානා වුට්ඨිතො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො ආයස්මා මාලුඞ්ක්යපුත්තො භගවන්තං එතදවොච:

ඉධ මය්හං භන්තෙ, රහොගතස්ස පතිසල්ලීනස්ස එවං චෙතසො පරිවිතක්කො උදපාදි: යානිමානි දිට්ඨිගතානි භගවතා අබ්යාකතානි ඨපිතානි පටික්ඛිත්තානි: සස්සතො ලොකො ඉතිපි, අසස්සතො ලොකො ඉතිපි -පෙ- නෙව හොති න න හොති තථාගතො පරම්මරණා ඉතිපි, තානි මෙ භගවා න බ්යාකරොති. යානි මෙ භගවා න බ්යාකරොති, තම්මෙ න රුච්චති, තම්මෙ න ඛමති. සොහං භගවන්තං උපසඞ්කමිත්වා එතමත්ථං පුච්ඡිස්සාමි. සචෙ මෙ භගවා බ්යාකරිස්සති: සස්සතො ලොකොති වා, අසස්සතො ලොකොති වා -පෙ- නෙව හොති න න හොති තථාගතො පරම්මරණාති වා, එවාහං භගවති බ්රහ්මචරියං චරිස්සාමි. නො චෙ මෙ භගවා බ්යාකරිස්සති: සස්සතො ලොකොති වා, අසස්සතො ලොකොති වා -පෙ- නෙව හොති න න හොති තථාගතො පරම්මරණාති වා, එවාහං සික්ඛං පච්චක්ඛාය හීනායාවත්තිස්සාමීති.

සචෙ භගවා ජානාති, ‘සස්සතො ලොකො’ති, සස්සතො ලොකොති මෙ භගවා බ්යාකරොතු. සචෙ භගවා ජානාති, ‘අසස්සතො ලොකො’ති, අසස්සතො ලොකොති මෙ භගවා බ්යාකරොතු. නො චෙ භගවා ජානාති, ‘සස්සතො ලොකොති වා අසස්සතො ලොකොති වා, අජානතො ඛො පන අපස්සතො එතදෙව උජුකං හොති යදිදං, ‘න ජානාමි, න පස්සාමී’ති.

සචෙ භගවා ජානාති ‘අන්තවා ලොකො’ති. අන්තවා ලොකොති මෙ භගවා බ්යාකරොතු. සචෙ භගවා ජානාති ‘අනන්තවා ලොකො’ති. අනන්තවා ලොකොති මෙ භගවා බ්යාකරොතු. නො චෙ භගවා ජානාති ‘අන්තවා ලොකො’ති වා අනන්තවා ලොකොති වා. අජානතො ඛො පන අපස්සතො එතදෙව උජුකං හොති යදිදං ‘න ජානාමි න පස්සාමී’ති.

සචෙ භගවා ජානාති ‘තං ජීවං තං සරීර’න්ති. තං ජීවං තං සරීරන්ති මෙ භගවා බ්යාකරොතු. සචෙ භගවා ජානාති ‘අඤ්ඤං ජීවං අඤ්ඤං සරීර’න්ති. අඤ්ඤං ජීවං අඤ්ඤං සරීරන්ති මෙ භගවා බ්යාකරොතු. නො චෙ භගවා ජානාති ‘තං ජීවං තං සරීරන්ති වා අඤ්ඤං ජීවං අඤ්ඤං සරීර’න්ති වා, අජානතො ඛො පන අපස්සතො එතදෙව උජුකං හොති යදිදං ‘න ජානාමි, න පස්සාමී’ති.

සචෙ භගවා ජානාති ‘හොති තථාගතො පරම්මරණා’ති. හොති තථාගතො පරම්මරණාති මෙ භගවා බ්යාකරොතු. සචෙ භගවා ජානාති ‘න හොති තථාගතො පරම්මරණා’ති. න හොති තථාගතො පරම්මරණාති මෙ භගවා බ්යාකරොතු. නො චෙ භගවා ජානාති හොති තථාගතො පරම්මරණාති වා න හොති තථාගතො පරම්මරණාති වා අජානතො ඛො පන අපස්සතො එතදෙව උජුකං හොති යදිදං ‘න ජානාමි න පස්සාමී’ති.

සචෙ භගවා ජානාති ‘හොති ච න ච හොති තථාගතො පරම්මරණා’ති. හොති ච න ච හොති තථාගතො පරම්මරණාති මෙ භගවා බ්යාකරොතු. සචෙ භගවා ජානාති ‘නෙව හොති න න හොති තථාගතො පරම්මරණා’ති. නෙව හොති න න හොති තථාගතො පරම්මරණාති මෙ භගවා බ්යාකරොතු. නො චෙ භගවා ජානාති හොති ච න ච හොති තථාගතො පරම්මරණාති වා, නෙව හොති න න හොති තථාගතො පරම්මරණාති වා, අජානතො ඛො පන අපස්සතො එතදෙව උජුකං හොති, යදිදං න ජානාමි න පස්සාමී’ති.

කින්නු තාහං මාලුඞ්ක්යපුත්ත, එවං අවචං: එහි ත්වං මාලුඞ්ක්යපුත්ත මයි බ්රහ්මචරියං චර, අහන්තෙ බ්යාකරිස්සාමි: සස්සතො ලොකොති වා අසස්සතො ලොකොති වා -පෙ- නෙව හොති න න හොති තථාගතො පරම්මරණාති වාති. - නො හෙතං භන්තෙ. ත්වං වා පන මං එවං අවච: අහං භන්තෙ භගවති බ්රහ්මචරියං චරිස්සාමි, භගවා මෙ බ්යාකරිස්සති: සස්සතො ලොකොති වා අසස්සතො ලොකොති වා -පෙ- නෙව හොති න න හොති තථාගතො පරම්මරණාති වාති. නො හෙතං භන්තෙ.