එවං මෙ සුතං. එකං සමයං භගවා රාජගහෙ විහරති වෙළුවනෙ කලන්දකනිවාපෙ. තෙන ඛො පන සමයෙන ආයස්මා රාහුලො අම්බලට්ඨිකායං විහරති. අථ ඛො භගවා සායන්හසමයං පටිසල්ලානා වුට්ඨිතො යෙන අම්බලට්ඨිකා යෙනායස්මා රාහුලො තෙනුපසඞ්කමි. අද්දසා ඛො ආයස්මා රාහුලො භගවන්තං දූරතොව ආගච්ඡන්තං. දිස්වාන ආසනං පඤ්ඤාපෙසි උදකඤ්ච පාදානං. නිසීදි භගවා පඤ්ඤත්තෙ ආසනෙ. නිසජ්ජ පාදෙ පක්ඛාලෙසි. ආයස්මාපි ඛො රාහුලො භගවන්තං අභිවාදෙත්වා එකමන්තං නිසීදි.

අථ ඛො භගවා පරිත්තං උදකාවසෙසං උදකාධානෙ ඨපෙත්වා ආයස්මන්තං රාහුලං ආමන්තෙසි ‘පස්සසි නො ත්වං රාහුල ඉමං පරිත්තං උදකාවසෙසං උදකාධානෙ ඨපිත’න්ති. එවම්භන්තෙ, එවං පරිත්තං ඛො රාහුල තෙසං සාමඤ්ඤං යෙසං නත්ථි සම්පජානමුසාවාදෙ ලජ්ජාති.

අථ ඛො භගවා පරිත්තං උදකාවසෙසං ඡඩ්ඩෙත්වා ආයස්මන්තං රාහුලං ආමන්තෙසි පස්සසි නො ත්වං රාහුල තං පරිත්තං උදකාවසෙසං ඡඩ්ඩිත’න්ති. එවම්භන්තෙති. එවං ඡඩ්ඩිතං ඛො රාහුල තෙසං සාමඤ්ඤං යෙසං නත්ථි සම්පජානමුසාවාදෙ ලජ්ජාති.

අථ ඛො භගවා තං උදකාධානං නික්කුජ්ජිත්වා ආයස්මන්තං රාහුලං ආමන්තෙසි පස්සසි නො ත්වං රාහුල ඉමං උදකාධානං නික්කුජ්ජිත’න්ති. එවම්භන්තෙ, එවං නික්කුජ්ජිතං ඛො රාහුල තෙසං සාමඤ්ඤං, යෙසං නත්ථි සම්පජානමුසාවාදෙ ලජ්ජාති.

අථ ඛො භගවා තං උදකාධානං උක්කුජ්ජිත්වා ආයස්මන්තං රාහුලං ආමන්තෙසි. පස්සසි නො ත්වං රාහුල ඉමං උදකාධානං රිත්තං තුච්ඡන්ති. එවම්භන්තෙ. එවං රිත්තං තුච්ඡං ඛො රාහුල තෙසං සාමඤ්ඤං යෙසං නත්ථි සම්පජානමුසාවාදෙ ලජ්ජාති.

සෙය්යථාපි රාහුල රඤ්ඤො නාගො ඊසාදන්තො උබ්බූළ්හවා අභිජාතො සඞ්ගාමාවචරො. සො සඞ්ගාමගතො පුරිමෙහිපි පාදෙහි කම්මං කරොති, පච්ඡිමෙහිපි පාදෙහි කම්මං කරොති, පුරිමෙනපි කායෙන කම්මං කරොති, පච්ඡිමෙනපි කායෙන කම්මං කරොති, සීසෙනපි කම්මං කරොති, කණ්ණෙහිපි කම්මං කරොති, දන්තෙහිපි කම්මං කරොති, නඞ්ගුට්ඨෙනපි කම්මං කරොති, රක්ඛතෙව සොණ්ඩං. තත්ථ හත්ථාරොහස්ස එවං හොති: අයං ඛො රඤ්ඤො නාගො ඊසාදන්තො උබ්බූළ්හවා අභිජාතො සඞ්ගාමාවචරො සඞ්ගාමගතො පුරිමෙහිපි පාදෙහි කම්මං කරොති, පච්ඡිමෙහිපි පාදෙහි කම්මං කරොති, පුරිමෙනපි කායෙන කම්මං කරොති, පච්ඡිමෙනපි කායෙන කම්මං කරොති, සීසෙනපි කම්මං කරොති, කණ්ණෙහිපි කම්මං කරොති, දන්තෙහිපි කම්මං කරොති, නඞ්ගුට්ඨෙනපි කම්මං කරොති, රක්ඛතෙව සොණ්ඩං, අපරිච්චත්තං ඛො රඤ්ඤො නාගස්ස ජීවිතන්ති. යතො ඛො රාහුල

රඤ්ඤො නාගො ඊසාදන්තො උබ්බූළ්හවා අභිජාතො සඞ්ගාමාවචරො සඞ්ගාමගතො -පෙ- නඞ්ගුට්ඨෙනපි කම්මං කරොති. සොණ්ඩායපි කම්මං කරොති. තත්ථ හත්ථාරොහස්ස එවං හොති: අයං ඛො රඤ්ඤො නාගො ඊසාදන්තො උබ්බූළ්හවා අභිජාතො සඞ්ගාමාවචරො සඞ්ගාමගතො -පෙ- නඞ්ගුට්ඨෙනපි කම්මං කරොති. සොණ්ඩායපි කම්මං කරොති. පරිච්චත්තං ඛො රඤ්ඤො නාගස්ස ජීවිතං, නත්ථිදානි කිඤ්චි රඤ්ඤො නාගස්ස කරණීයන්ති. එවමෙව ඛො රාහුල යස්ස කස්සචි සම්පජානමුසාවාදෙ නත්ථි ලජ්ජා, නාහං තස්ස කිඤ්චි පාපං අකරණීයන්ති වදාමි. තස්මාතිහ රාහුල හස්සාපි න මුසා භණිස්සාමී’ති එවං හි තෙ රාහුල සික්ඛිතබ්බං.

තං කිම්මඤ්ඤසි රාහුල කිමත්ථියො ආදාසොති. පච්චවෙක්ඛණත්ථො භන්තෙති. එවමෙව ඛො රාහුල පච්චවෙක්ඛිත්වා පච්චවෙක්ඛිත්වා කායෙන කම්මං කාතබ්බං, පච්චවෙක්ඛිත්වා පච්චවෙක්ඛිත්වා වාචාය කම්මං කාතබ්බං, පච්චවෙක්ඛිත්වා පච්චවෙක්ඛිත්වා මනසා කම්මං කාතබ්බං

යදෙව ත්වං රාහුල කායෙන කම්මං කත්තුකාමො අහොසි තදෙව තෙ කායකම්මං පච්චවෙක්ඛිතබ්බං: යන්නු ඛො අහං ඉදං කායෙන කම්මං කත්තුකාමො, ඉදං මෙ කායකම්මං අත්තව්යාබාධායපි සංවත්තෙය්ය, පරව්යාබාධායපි සංවත්තෙය්ය, උභයව්යාබාධායපි සංවත්තෙය්ය, අකුසලං ඉදං කායකම්මං දුක්ඛුද්රයං දුක්ඛවිපාකන්ති. සචෙ ත්වං රාහුල පච්චවෙක්ඛමානො එවං ජානෙය්යාසි: යං ඛො අහං ඉදං කායෙන කම්මං කත්තුකාමො ඉදම්මෙ කායකම්මං අත්තව්යාබාධායපි සංවත්තෙය්ය, පරව්යාබාධායපි සංවත්තෙය්ය, උභයව්යාබාධායපි සංවත්තෙය්ය, අකුසලං ඉදං කායකම්මං දුක්ඛුද්රයං දුක්ඛවිපාකන්ති. එවරූපං තෙ රාහුල කායෙන කම්මං සසක්කං න කරණීයං සචෙ පන ත්වං රාහුල පච්චවෙක්ඛමානො එවං ජානෙය්යාසි: යං ඛො අහං ඉදං කායෙන කම්මං කත්තුකාමො, ඉදං මෙ කායකම්මං නෙවත්තව්යාබාධාය සංවත්තෙය්ය, න පරව්යාබාධාය සංවත්තෙය්ය, න උභයව්යාබාධාය සංවත්තෙය්ය, කුසලං ඉදං කායකම්මං සුඛුද්රයං සුඛවිපාකන්ති. එවරූපං තෙ රාහුල කායෙන කම්මං කරණීයං.

කරොන්තෙනපි තෙ රාහුල කායෙන කම්මං තදෙව තෙ කායකම්මං පච්චවෙක්ඛිතබ්බං: යන්නු ඛො අහං ඉදං කායෙන කම්මං කරොමි. ඉදම්මෙ කායකම්මං අත්තව්යාබාධායපි සංවත්තති, පරව්යාබාධායපි සංවත්තති, උභයව්යාබාධායපි සංවත්තති, අකුසලං ඉදං කායකම්මං දුක්ඛුද්රයං දුක්ඛවිපාකන්ති. සචෙ ත්වං රාහුල පච්චවෙක්ඛමානො එවං ජානෙය්යාසි: යං ඛො අහං ඉදං කායෙන කම්මං කරොමි, ඉදම්මෙ කායකම්මං අත්තව්යාබාධායපි සංවත්තති, පරව්යාබාධායපි සංවත්තති, උභයව්යාබාධායපි සංවත්තති, අකුසලං ඉදං කායකම්මං දුක්ඛුද්රයං දුක්ඛවිපාකන්ති. පටිසංහරෙය්යාසි ත්වං රාහුල එවරූපං කායකම්මං. සචෙ පන ත්වං රාහුල පච්චවෙක්ඛමානො එවං ජානෙය්යාසි: යං ඛො අහං ඉදං කායෙන කම්මං කරොමි, ඉදම්මෙ කායකම්මං නෙවත්තව්යාබාධාය සංවත්තති, න පරව්යාබාධාය සංවත්තති, න උභයව්යාබාධාය සංවත්තති, කුසලං ඉදං කායකම්මං සුඛුද්රයං සුඛවිපාකන්ති. අනුපදජ්ජෙය්යාසි ත්වං රාහුල එවරූපං කායකම්මං.