පට්ඨාන ත්‍රි රාශිය - නාඋයනේ අරියධම්ම හිමි, කඩුවෙල අතුලඤාණ හිමි 2022.pdf
- කතෘ :
- ඌ ජනකාභිවංස හිමි
- ප්‍රකාශිත වර්ෂය :
- 2022
- මුද්‍රිත වර්ෂය :
- 2022
- පිටු ගණන :
- 165
- බාගත කිරීම් ගණන :
- 2,665
- වෙබ් අඩවියට එක් කළ දිනය :
- 2022-10-16
- ගොනුවේ ප්‍රමාණය :
- 3.2 MB
පොතේ පිටු කිහිපයක ඡායාරූප පහතින් බලන්න.
පට්ඨාන ත්‍රි රාශිය යනු අභිධර්ම පිටකයේ අතිශය ගම්භීර වූ පට්ඨාන මහාප්‍රකරණය පහසුවෙන් හදාරනු පිණිස බුරුම ජාතික අතිපූජ්‍ය භදන්ත ඌ ජනකාභිවංස මහාස්ථවිරයන් වහන්සේ විසින් රචිත ‘පට්ඨාන තුන්පේසු’ නම් ප්‍රකට බුරුම අභිධර්ම ග්‍රන්ථයේ සිංහල පරිවර්තනයයි.
මෙහි ප්‍රථම භාගය අතිපූජ්‍ය නා උයනේ අරියධම්ම මහානාහිමියන් විසින් පරිවර්තනය කරන ලද අතර, අඤ්ඤමඤ්ඤ ප්‍රත්‍යයේ සිට ඉදිරියට වූ දෙවන භාගය ත්‍රිපිටකාචාර්ය පූජ්‍ය කඩුවෙල අතුලඤාණ හිමියන් විසින් පරිවර්තනය කොට සමස්ත ග්‍රන්ථය ම සම්පාදනය කර ඇත.
මෙම කෘතිය 2022 වර්ෂයේ දී මහාවිහාරය බෞද්ධ ප්‍රකාශන (නෙළුම්ගල, බඹරගස්වැව) මඟින් මාලබේ පියසිරි මුද්‍රණාලයේ මුද්‍රණය කරවා ප්‍රකාශයට පත් කරන ලද්දකි.
පූර්විකාව
‘පට්ඨාන ත්‍රි රාශිය’ නමින් අද දින අංග සම්පූර්ණ පරිවර්තනයකට බඳුන් වන මේ ග්‍රන්ථය බුරුම ජාතික මහාගන්ධායොං විහාරාධිවාසී අතිපූජ්‍යපාද ඌ ජනකාභිවංස මාහිමිපාණන් අතින් විරචිත අගනා ග්‍රන්ථයකි.
අභිධර්මය ත්‍රිපිටක පාළියෙහි ඇතුලත් පරම ගම්භිර ධර්මය යි. ඒ අතුරින් ද; පට්ඨාන ප්‍රකරණය අතිශය සියුම් නය ක්‍රම ඇතුලත් බැවින් ඉගෙනීම දුෂ්කර ය. මේ දුෂ්කර බව මගහරවා ශිෂ්‍යයන්ට සුබාවබෝධය ඇති කරවීම පිණිස රචිත බොහෝ පරිවාර ග්‍රන්ථ ඇත.
බුරුම රටෙහි එවැනි ග්‍රන්ථ බහුලව දැකිය හැක. එනමුත් ලංකාවෙහි අභිධර්මයට ලියැවුණු පරිවාර ග්‍රන්ථ ඇත්තේ දෙකතුනක් පමණකි. මේ දුලභත්වය ගැඹුරු අර්ථ සුවසේ අවබෝධ කරගැනීම ට මහත් බාධාවකි.
විශේෂයෙන් ම පට්ඨාන මහාප්‍රකරණය ඉගෙන ගැනීමට පෙරාතුව හැදෑරීමට සුදුසු ම පරිවාර ග්‍රන්ථයක් ලෙස අද දින අංග සම්පූර්ණ පරිවර්තනයකට බඳුන් වන ‘පට්ඨාන ත්‍රි රාශිය’ නම් මේ ග්‍රන්ථය හඳුන්වා දිය හැක. බුරුම ජාතික මහාගන්ධායොං විහාරාධිවාසී අතිපූජ්‍යපාද ඌ ජනකාභිවංස මහාස්ථවිරයන් වහන්සේ අතින් බුරුම භාෂාවෙන් විරචිතව ඇති එම ග්‍රන්ථය, සිංහල ශිෂ්‍ය භික්ෂූන් වහන්සේට ද ප්‍රයෝජනවත් වන ආකාරයෙන් පරිවර්තනය වීම සසුන් දියුණුව පිණිස හේතු වනවා නොඅනුමාන ය.
ග්‍රන්ථ කරණයට වඩා ග්‍රන්ථ පරිවර්තනය අතිශය දුෂ්කර කාර්යයකි. විෂය දැනුම සේ ම රචිත හා පරිවර්තන යන භාෂා දෙක පිළිබඳව ම සුවිශේෂී දැනුමක් පරිවර්තකයා සතු විය යුතු ය. ඒ මතු ද නොව පරාධ්‍යාශ හොඳින් හඳුනන්නෙකු ද විය යුතු ය.
මහාවිහාරවංශාලංකාර, අභිධර්මඥෙය්‍යාභිධජ, ශාසන ජෝතික, ථේරවාදී ධර්ම අධ්‍යයන පීඨයේ කථිකාචාර්ය, ත්‍රිපිටකාචාර්ය කඩුවෙල අතුලඤාණ ස්ථවිරයන්වහන්සේ අවුරුදු කිහිපයක් පුරාවට බුරුම රට පරියත්ති මධ්‍යස්ථානයන් හි සැරිසරමින් ඒ ඒ තැනින් උගත යුතු ධර්ම කොටස් මනාව හදාරමින් විශේෂයෙන් ම අභිධර්මය පිළිබඳ විශේෂඥ දැනුමක් ඇතිකරගත් යතිවරයෙකි. උන්වහන්සේ බුරුම දේශයට වැඩම කරනුයේත්, එම දේශයේ දී ඉගෙන ගැනීම් කටයුතු කරනුයේත් ගුරුවරුන්ගේ ආරාධනා හා ආශිර්වාදය ඇතිව වීමත් විශේෂත්වයකි. ගතින් සැතපුම් දහස් ගණනකින් ඈත සිට මේ කටයුතුවල නියුතු වූ ඒ සත්පුරුෂ ශිෂ්‍යවරයා, සිතින් ගුරුශිෂ්‍ය සබඳතා කිසි ලෙසකින්වත් අත්නොහළේය. හැකි සෑම විට ගුරුන් විමසා කටයුතු කිරීමට වගබලාගත් බව ද කිවමනාය.
එබඳු සත්පුරුෂ උගතෙකු අතින් ම මේ කටයුත්ත සිදුවීම පරිවර්තන කටයුත්ත පිළිබඳ විශ්වසනීයත්වය තහවුරුකිරීමට ප්‍රාමාණික සාධක වෙයි.
කර්තෘන්වහන්සේගේ මේ වෑයම සම්බුදු සසුනේ චිරස්ථිතිය පිණිස ඒකාන්තයෙන් හේතුවන බව පවසනුයේ හදපිරි සොම්ණසිනි. එය සහශ්‍ර සංඛ්‍යාත සිසුන් පිරිසකට පට්ඨාන මහාප්‍රකරණය පහසුවෙන් ඉගෙනීමට මහත් පිටුවහලක් වනු නොඅනුමාන යි. ග්‍රන්ථපරිවර්තන වෑයම සර්වප්‍රකාරයෙන් මල්ඵල ගැන්වෙනුයේ එදිනට ය.
කඩුවෙල අතුලඤාණ ස්ථවිරයන්වහන්සේගේ ධර්මඥාන හා ශාස්ත්‍රඥාන තවතවත් දියුණු වේවා! ලක්දිව බුදු සසුනට එය ආලෝකයක් වේවා!
මෙයට සසුන් දියුණුව පතන මා, නුවරඑළියේ ඤාණසීල මහාස්ථවිර.
මෙයට සසුන් දියුණුව පතන මා,
නුවරඑළියේ ඤාණසීල මහාස්ථවිර.
පෙරවදන
“නමෝ තස්ස භගවතෝ අරහතෝ සම්මා සම්බුද්ධස්ස”
ධම්මාරාමො ධම්මරතො - ධම්මං අනුවිචින්තයං ධම්මං අනුස්සරං භික්ඛු - සද්ධම්මා න පරිහායති (ධම්මපදය - භික්ඛු වග්ග)
හද මැදුර ධර්ම මන්දිරයක් බවට පත්කොට ධර්මයෙහි ම සිත පිනවන, නැවත නැවත ධර්මය සිතන, ධර්මය මෙනෙහි කරන බෞද්ධයා නව ලොවුතුරා ධර්මයෙන් නො පිරිහෙයි.
ධර්මය - අභිධර්මය, විනය, අභිවිනය නමින් ධර්ම විනය සතරාකාර වෙයි. සූත්‍ර පිටකය ධර්මය ය, අභිධර්ම පිටකය - අභිධර්මය ය. විනය පිටකයෙහි පාරාජිකා පාලි පාචිත්තිය පාලි ග්‍රන්ථ දෙක විනය ය. මහාවග්ග, චුල්ලවග්ග, පරිවාර ග්‍රන්ථ තුන අභිවිනය ය.
විනය අභිවිනය - ආඥාදේශනයකි. යථාපරාධ ශාසනයකි. සංවරාසංවර කථාවකි. සූත්‍ර පිටකය ව්‍යවහාර දේශනයකි. යථානුලෝම ශාසනයකි. දෘෂ්ටි ගතියන් නිරාකරණ කථාවකි. අභිධර්මය පරමාර්ථ ධර්ම දේශනයකි. යථාධර්ම ශාසනයකි. නාමරූප පරිච්ඡේද කථාවකි.
විනය උගෙන ශීලයෙහි පිහිටයි. සූත්‍ර උගෙන ධ්‍යාන සමාපත්ති අභිඥාබල වඩයි. අභිධර්මය උගෙන නාමරූප පරමාර්ථ ධර්ම විදර්ශනා වඩා මග ඵල නිවන සාක්ෂාත් කරයි. මෙසේ ධර්ම විනය මගින් සීල සමාධි ප්‍රඥා වඩා නිවන්මග ආලෝකවත් කරනු පිණිස පැරණි උතුමෝ සුවිසුද්ධ වූ ත්‍රිපිටක ධර්මය ඉගෙන ගත්හ, උගැන්වූහ, ලියා තැබූහ, පාලි භාෂාව නොදත් අයට පහසුව පිණිස තම තමන්ගේ භාෂාවනට පරිවර්තනය ද කළහ.
බුරුම රටේ මන්ඩලේ අමරපුර නුවර මහාගණ්ඩායොං මහා පරිවේණාධිපතිව වැඩ විසූ මහා ග්‍රන්ථකාරක අතිපූජ්‍ය ජනකාභිවංස මහා නාහිමියන් වහන්සේ විසින් බුරුම බසින් ලියා මුද්‍රණය කරවන ලද (වීථි භාසාරීකා) චිත්ත වීථි - රූප වීථි විභාගය සහ (පට්ඨාන තුන්පේසු) පට්ඨාන ත්‍රිරාශිය නැමැති දහම් පොත් දෙක මා විසින් සිංහල බසට පරිවර්තනය කරන ලද්දේ 1964 අගෝස්තු මාසයේ දී අතිපූජ්‍ය භදන්ත අග්ගමහා පණ්ඩිත ඤාණින්ද නාහිමියන් වහන්සේගේ කාරුණික අනුග්‍රහයෙනි.
ආධුනිකව අභිධර්මය හදාරන ශිෂ්‍යයන්ට උපකාර පිණිස මේ දහම් පොත් දෙක එකතු කොට මුද්‍රණය කරවා ධර්ම දානය කරන ලෙස සත්ගුණවත් ලසන්ත අලගියවන්න ඇමතිතුමාත්, එම අමා ජයසිංහ අලගියවන්න මැතිතුමියත් සිහිපත් කරන ලද්දේ පූජ්‍ය නාගපොකුණේ අරියසීල ස්වාමින් වහන්සේ විසිනි. මෙය ඉතාමත් සතුටෙන් පිළිගත පින්වත් අමා ජයසිංහ අලගියවන්න මැතිතුමියත්, පින්වත් ලසන්ත අලගියවන්න ඇමතිතුමාත් මුද්‍රණය කරවා පිරිනමනුයේ ධර්ම දානමය පුණ්‍ය සම්භාරයේ අගය අමිල බව දැන ඉමහත් ගෞරවයෙනි.
තව ද සම්බුද්ධත්ව ජයන්තිය (2600) නිමිත්තෙන් සහ ශ්‍රී කල්‍යාණී යෝගාශ්‍රම සංස්ථාවේ සමසැට (60) වසර නිමිත්තෙන් අනුරපුර රුවන්මැලි මහා සෑ මළුවේ දී (2011.06.06 සහ 05) දෙදින තුළ සිදු කෙරෙන සාරාණීය පුණ්‍ය මහෝත්සවයේ දී පිරිනැමෙන මෙම ධර්ම දානය ද බුද්ධ පූජාවක් ම වේවා යන ප්‍රසාදනීය භක්තියෙනි.
මෙම ධර්මදානමය කුශලානුභාවය සම්බුද්ධ ශාසන චිරස්ථිතිය පිණිස වේවා. මෙහි ප්‍රථම කර්තෘවර අතිගරු පූජනීය මහාගණ්ඩායුං සෙයාඩෝ නම් වූ ජනකාභිවංස නාහිමිපාණන්ට සහ පරිවර්තනයට අනුග්‍රාහකත්ව දැක්වූ අතිගරු පූජනීය භදන්ත අග්ගමහා පණ්ඩිත ඤාණින්ද නාහිමිපාණන්ටත් පැතූ උතුම් බෝධියෙන් අමා මහා නිවන් සුව පිණිස හේතු වේවා. පින්වත් ලසන්ත අලගියවන්න ඇමතිතුමාගේ සහ එම මැතිනියගේ පියවරු දෙදෙනා, පරලෝ සැපත් සියලු ඥාති මිත්‍රාදීන්ටත්, අමා මහ නිවන් සුව පිණිස හේතු වේවා. ජීවත්ව සිටින ආදරණීය මවුවරු දෙදෙනාට ද ආයුරාරෝග්‍ය සැප බල ප්‍රඥාවත්, දෙලොව සුබ සෙතත්, ශාන්ත නිවන් සුව පිණිසත් වාසනා වේවා. සිතූ පැතූ සංකල්පනා සියල්ල සමෘද්ධ වේවා.
“සබ්බෙ සත්තා භවන්තු සුඛිතත්තා”
මෙයට, මෙත්ඇති, නාඋයනේ අරියධම්ම ස්ථවිර නාඋයන ආරණ්‍ය සේනාසනය
මෙයට,
මෙත්ඇති,
නාඋයනේ අරියධම්ම ස්ථවිර
නාඋයන ආරණ්‍ය සේනාසනය
ඇදුරු පරපුරේ ආශීර්වාදය
තුන් ලෝ වැසි සත්ත්වයාගේ ඒකායන සැපය පිණිස මයි ලොවුතුරු බුදුරජාණන් වහන්සේලා මේ ලොවට පහළ වන්නේ, තම ජීවිතය පාරමී නැමැති මහා සාගරයේ ගිල්වා ලෝක සත්ත්වයා වෙනුවෙන් මෙලොවට පහළ වූ අප භාග්‍යවත් ගෞතම බුදුරජාණන් වහන්සේ ලොවුතුරු බුද්ධත්වයෙන් සත්වසක් ගිය තැන දෙවුලොව දී උතුම් අභිධර්මය දේශනා කළ සේක. බුදුරජාණන් වහන්සේගේ ශ්‍රී මුඛයෙන් වදාළ මිහිරි ශ්‍රී සද්ධර්මයේ අති ගාම්භීර කොටස මෙම අභිධර්ම පිටකය තුළ විදහා දක්වයි.
එසේ වදාළ උතුම් ගම්භීර ම ධර්ම කොටස පට්ඨාන ප්‍රකරණය නැමැති රන් කොපුවෙහි ගිල්වා අතීතයේ පටන් වර්තමානය දක්වා ම මෙම රන් කොපුව ආරක්ෂා කළේ මහා සංඝයා වහන්සේ විසිනි. එසේ ම ආරක්ෂා කළ උතුම් ධර්මය (විචිත්තමතිගම්භීර-මනන්තනයමණ්ඩිතං) අතිශය අලංකාර යි, ඉතාමත් ගැඹුරු යි, ඒ වගේම අනන්ත නය ක්‍රමයකින් සමන්නාගත යි. අප භාග්‍යවතුන් වහන්සේ මෙම උතුම් ගාම්භීර ධර්මය විමල වූ පිරිසිදු ඥානයකින් සම්මිශ්‍රණය කරන අවස්ථාවේ (යස්සදෙහා නික්ඛමංසු සුභාඡබ්බණ්ණරංසියො) ශ්‍රී ශරීරයෙන් අලංකාර ෂඩ්වර්ණ රශ්මීන් නිකුත් විය. මෙසේ ප්‍රතිහාර්ය දක්වන මෙම උතුම් ගාම්භීර ධර්මය විනාශය කරා නො ගොස් නැවත නැවතත් ඉගෙනීමෙන් සහ ධාරණයෙන් ආරක්ෂා කරන උතුම් භික්ෂු පරපුරක් වර්තමානයේ සිටීම ගැන අතිශය කෘතඥව සිහි කරමු. බුරුම රට තුළ බුදු සසුන ආරක්ෂා කිරීමෙහි ලා මහත් කැපවීමක් කළ මහ තෙරුන් වහන්සේ නමක් වන ඌ. ජනකාභිවංස සයාඩෝ විසින් බුරුම බසින් සම්පාදිත පට්ඨාන ත්‍රි රාශිය නැමැති උතුම් ග්‍රන්ථය සිංහල ධර්මකාමීන්ට මනාසේ හැදෑරීමට එය සිංහල බසට පරිවර්තනය කළේ 1964 දී අතිපූජ්‍ය භදන්ත අග්ගමහාපණ්ඩිත ඤාණින්ද නාහිමියන් වහන්සේගේ කාරුණික උපකාරය මත ශ්‍රී ලංකා රාමඤ්ඤ මහානිකායේ අනුනායක, මහෝපාධ්‍යාය, ශ්‍රී කල්‍යාණී යෝගාශ්‍රම සංස්ථාධිපති හා ප්‍රධාන අනුශාසක ව වැඩසිටි මහාකම්මට්ඨානාචාර්ය අතිපූජ්‍ය නාඋයනේ ශ්‍රී අරියධම්ම මහා ස්වාමීන් වහන්සේ විසිනි. අඤ්ඤමඤ්ඤ ප්‍රත්‍යයේ සිට ග්‍රන්ථයේ අවසානය දක්වා එම පරිවර්තනය පූජ්‍ය කඩුවෙල අතුලඤාණ භික්ෂුව විසින් සිදු කල බව මෙත් සිතින් ඉතා අගය කරමි. එසේ ම ලෝක සත්ත්වයා කෙරෙහි අනුකම්පාවෙන් මෙම සිදු කළ ධර්ම සේවය අතිශය ප්‍රශස්ත ය.
මෙම පොත සම්පාදනයේ පටන් පරිවර්තනය මුද්‍රණය යන කටයුතු දක්වා ම වෙහෙසූන කැපවුණ මහා තෙරුන් වහන්සේලා ප්‍රධාන සැමට නිවන් පසක් වේවා. උපකාර කළ සැමටත් පරිශීලනය කරන සැමටත් මෙය දැක සාදු සිත් ඇති කර ගත් සැමටත් අමා මහ නිවන ම පසක් වේවා!
මෙයට, මෙත්ැති, පහලවිටියල ජනානන්ද ස්ථවිර ශ්‍රී ලංකා රාමඤ්ඤ නිකායේ මහෝපාධ්‍යාය, ශ්‍රී කල්‍යාණී යෝගාශ්‍රමාධිපති ප්‍රධාන අනුශාසක හා ප්‍රධානාචාර්ය ශ්‍රී කල්‍යාණධර්ම ආශ්‍රමය, කොළඹ 07.
මෙයට,
මෙත්ඇති,
පහලවිටියල ජනානන්ද ස්ථවිර
ශ්‍රී ලංකා රාමඤ්ඤ නිකායේ මහෝපාධ්‍යාය,
ශ්‍රී කල්‍යාණී යෝගාශ්‍රමාධිපති
ප්‍රධාන අනුශාසක හා ප්‍රධානාචාර්ය
ශ්‍රී කල්‍යාණධර්ම ආශ්‍රමය,
කොළඹ 07.
“පට්ඨාන ත්‍රි රාශිය” සුභාශංසනය
උතුම් ශ්‍රී සම්බුද්ධ දේශනාවේ ඇතුලත් 84,000 ක් ධර්මස්කන්ධය අතුරෙහි 42,000 වූ ධර්ම කොට්ඨාශයන් ඇතුළත් පරම ගම්භීර දේශනාව වන අභිධර්ම දේශනාව උගෙනීම බොහෝ සෙයින් මාර්ග ඵල නිවන් සුව අවබෝධය පිණිස කටයුතු කරන සැමට නාම රූප, පරමාර්ථ ධර්ම විදර්ශනා වශයෙන් දියුණු කිරීම උදෙසා මහත් පිටුවහලක් වන්නේය.
මෙම උතුම් අරමුණ මත ක්‍රියාත්මක වෙමින් ආධුනිකයන් ලෙස අභිධර්මය හදාරන ශිෂ්‍යයන් උපකාර පිණිස ලියවුණ “පට්ඨාන ත්‍රි රාශිය” නම් වූ උතුම් ග්‍රන්ථයෙහි පළමුවන කොටස ශ්‍රී කල්‍යාණී යෝගාශ්‍රම සංස්ථාධිපතිව වැඩ සිට අපවත් වී වදාළ අති පූජනීය නා උයනේ අරියධම්ම මහාස්වාමීන් වහන්සේ විසින් සිංහල භාෂාවට පරිවර්තනය කරන ලද අතර එහි දෙවන කොටස සිංහලයට පරිවර්තනය කොට නව ග්‍රන්ථයක් ලෙසින් ලෝකවාසී බෞද්ධ ජන පිරිස වෙනුවෙන් ගෞරවයෙන් යුක්තව පුද කිරීමට ශ්‍රී කළ්‍යාණි යෝගාශ්‍රමීය භික්ෂුවක් වන දිද්දෙණිය, රණගිරිලෙන සේනාසනවාසී