මාන මද නිරෝධය - පැලෑණේ වජිරඥාන හිමි 1954.pdf

මාන මද නිරෝධය යනු අග්ගමහා පණ්ඩිත, කොළඹ බම්බලපිටියේ වජිරාරාමාධිපතිව වැඩවිසූ අතිපූජ්‍ය පැලෑණේ සිරි වජිරඤාණ මහානායක මාහිමිපාණන් වහන්සේ විසින් සම්පාදිත වටිනා ධර්ම ග්‍රන්ථයකි.

පෘථග්ජන සත්වයන්ගේ සන්තාන තුළ නිරන්තරයෙන් හටගන්නා මානය සහ මදය පිළිබඳවත්, එයින් මිදීමේ ප්‍රතිපදාවත් සවිස්තරාත්මකව මෙහි පැහැදිලි කෙරේ. මානය ප්‍රභේද වශයෙන් සෙය්‍යමාන, සදිසමාන, හීනමාන ආදී ආකාරයෙන්ද, අභිමානය, මානාතිමානය, ඔමානය, අධිමානය, අස්මිමානය, මිච්ඡාමානය ආදී සත් වැදෑරුම් ආකාරයෙන්ද බෙදා ධර්මානුකූලව විග්‍රහ කර ඇත.

කෙලෙස් යටපත් කොට සිත දමනය කරගැනීමට වෙහෙසෙන ධර්මකාමී සැදැහැවතුන්ට සහ භාවනායෝගීන්ට ප්‍රායෝගික වශයෙන් අත්පොතක් වන අයුරින් සරල සුගම බසින් මෙම ග්‍රන්ථය සම්පාදනය කර තිබේ.

මාන මද නිරෝධය

පෘථග්ජන සන්තානයන්හි අයෝනිසෝමනසිකාරයෙන් නොයෙක්විට පැනැ නැගෙන යුහුසුලු කෙලෙසෙකි මානය නම්. එය ම උත්සන්න වූ කලැ මද යැ යි කියනු ලැබේ. මෙය සම්පූර්ණයෙන් නැසෙන්නේ රහත්මග නුවණිනි. ඉන් යටැ තුන්මග නුවණින් ම නැසෙන්නේ සාවශේෂ වශයෙනි. එබැවින් රහත්මග නුවණ ‘’මානාභිසමය’’ යැ යි කියනු ලැබේ. පුහුදුන් සතන්හි මෙය ඉතා ම හැඩිදැඩි සේ ඇවිස්සෙමින් පැවැතෙන හෙයින්, එයිනුත් අඥ වූ බාල ජනසන්තානයන්හි වැඩියක් බලපවත්වන හෙයින්, ඔවුනට වැඩ සඳහා අප විසින් මේ බණපොත් පොඩිය සැකැසුණේ මෙයට විසි වසකටත් පෙරා යැ. පින්කැමැති බෞදු සමිති දෙකෙකින් දෙවරක් ම මුද්‍රණය කරවා නොමිලයේ විසුරුවා හරන ලද මුත්, දැන් ඉන් පිටපතක් සොයා ගැනීම උගහට වී තිබෙන හෙයින් මේ තුන්වන වර ත් වෙසක් දහම් ප්‍රචාරක සමිතිය විසින් මුද්‍රණය කරවා විසුරුවනු ලබන්නේ පින් පිණිසැ යැ. එබැවින් මින් පිටපතක් ලැබුණු හැම දෙන ම විසින් සාදරයෙන් කියවා බලා, නැවැතැ නැවැතැ සිතා බලා, සිය සතන්හි නැගෙන මානමදයන් මර්දනය කැරැ ගැනීමට උත්සාහ දැරියැ යුතු වේ.

සියලු සත්ත්වයෝ සුවපත් වෙත්වා!

මීට - ලෝවැඩ කැමැති, පැලෑණේ වජිරඤාණ මහානායක ස්ථවිරයෝ වම්හ. ශ්‍රී බු. ව. 2497 ක්‍රි. ව. 1954 මාර්තු මස 01 වන සඳුදා බම්බලපිටියේ වජිරාරාමයේ දී යැ.