අභිධර්ම චන්ද්‍රිකාව - මාතර ශ්‍රී ධර්මවංශ හිමි.pdf
- කතෘ :
- මාතර ශ්‍රී ධර්මවංශ හිමි
- ප්‍රකාශිත වර්ෂය :
- 1981
- පිටු ගණන :
- 507
- බාගත කිරීම් ගණන :
- 2,255
- වෙබ් අඩවියට එක් කළ දිනය :
- 2022-03-12
- ගොනුවේ ප්‍රමාණය :
- 1.0 MB
පොතේ පිටු කිහිපයක ඡායාරූප පහතින් බලන්න.
අභිධර්ම චන්ද්‍රිකාව යනු මාතර වල්පොළ සිරි මංගල පිරිවෙනෙහි ආචාර්ය ධුරය හෙබවූ පණ්ඩිත මාතර ශ්‍රී ධර්මවංශ නාහිමියන් විසින් රචිත අභිධර්ම ග්‍රන්ථයකි. අභිධර්ම මාර්ගය පහසුවෙන් අවබෝධ කරගැනීම පිණිස අභිධර්මාර්ථ සංග්‍රහය ඇසුරින් කරුණු පැහැදිලි කෙරෙන ප්‍රශ්නෝත්තර හා විග්‍රහයන් සහිත ප්‍රකට අත්පොතකි.
කොළඹ තරුණ බෞද්ධ සංගමය (YMBA) මගින් දහම් පාසල් ශිෂ්‍ය ශිෂ්‍යාවන්ගේ සහ ධර්ම විභාගාර්ථීන්ගේ ප්‍රයෝජනය සඳහා මෙම කෘතිය 1981 දී යළි ප්‍රකාශයට පත් කරන ලදී.
මෙහි අභිධර්මයේ මූලික පාද නවයම අන්තර්ගත කොට ඇත:
- පළමු වන චිත්ත පාදය
- දෙවන චෛතසික පාදය
- තුන්වන ප්‍රකීර්ණක පාදය
- සතරවන වීථි පාදය
- පස්වන වීථිමුක්ත පාදය
- සවන රූප පාදය
- සත්වන සමුච්චය පාදය
- අටවන පටිච්චසමුප්පාද පාදය
- නවවන කර්මස්ථාන පාදය
පෙරවදන
දහම් පාසල් විභාග පැවැත්වීම පෙරසේම කරගෙන යාමට කොළඹ තරුණ බෞද්ධ සංගමයට 1978 මාර්තු මස 03 වැනි දින රජය මගින් නැවත පවරන ලදී. ඉකුත් තුන් වසර තුළ දහම් පාසල් අධ්‍යාපනය විධිමත් කොට, එක් එක් ශ්‍රේණියට අවශ්‍ය සියලු පාඩම් සඳහා එක් එක් පොත බැගින් පළකරවන ලදි. එබැවින් දැනට මූලික ශ්‍රේණියේ සිට 9 වැනි ශ්‍රේණිය ඇතුළුව පන්ති පාඩම් පොත් 9 ක් දහම් පාසල්වලට භාවිත වේ.
එහෙත් දහම් පාසල් ශිෂ්‍ය/ශිෂ්‍යාවන්ට අභිධර්මය සරල බසින් ඉගැන්වීමට සුදුසු පොතක් නැතිවීම බලවත් පාඩුවක් ලෙස බොහෝ දෙනා අපට නොයෙක්වර පැමිණිලි කර ඇත. අපරදිග ජනතාව පවා මනෝවිද්‍යාව කෙරෙහි විශාල උනන්දුවක් දක්වන මේ යුගයේ අභිධර්මය ඉගෙන ගැනීමෙන් සිත පිළිබඳව මනා අවබෝධයක් ලබාගෙන ජීවිතය නියමාකාරයෙන් හැඩගස්වා ගැනීමට හැකිවන බව නොඅනුමානයි.
එදිනෙදා ජීවිතයේදී සෑම කෙනෙකුටම විවිධ ප්‍රශ්න හා ගැටළුවලට මුහුණ පෑමට සිදුවේ. මේවා පිළිබඳව නියමාකාර හැඟීමක් තිබෙනම් අවාසනාවන්ත දුක්ඛදායක සිදුවීම්වලින් මිදී ගැටළු නිරාකරණය කර ගැනීමට පහසුවෙනවා ඇත.
ගැඹුරු ධර්මයක් වන අභිධර්මය පාසල් සිසුනට ප්‍රගුණ කරවීමට මේ පොතේ ඇති පාඩම් බෙහෙවින් උපකාර වේයයි සිතමි.
අභිධර්මය හැදෑරීම සම්බන්ධයෙන් උගතුන් වැඩි දෙනෙකුගේ පිළිගැනීම පූජ්‍ය පණ්ඩිත මාතර ශ්‍රී ධර්මවංශ නාහිමියන්ගේ කාණ්ඩ නවයකින් යුක්ත පොත් පෙළ දහම් පාසල් සඳහා සුදුසු බවයි. එබැවින් ඒ පොත් පෙළේ පළමුවන කාණ්ඩය වන මේ පොත පළ කිරීමට අප විසින් තීරණය කරන ලදි.
පූජ්‍ය වලස්ගල පුණ්ණජී මයුරවංශ ස්වාමීන් වහන්සේ මේ පොත් පෙළ පළකිරීමට බලය අප වෙත පැවරීමෙන් කරන ලද අනුග්‍රහය ගැන උන්වහන්සේට අපගේ ගෞරවාදර ස්තූතිය පුදකරමි.
තවද මෙම ග්‍රන්ථය මුද්‍රණය කිරීමට මා දිරි ගැන්වූ අප සංගමයේ ගරු සභාපති තැන්පත් රාජනීතිඥ සිරි පෙරේරා මැතිතුමාටත් මගේ කෘතඥතා පූර්වක ගෞරවය හා ස්තූතිය පුදකරමි.
මෙයට ශාසනස්ථිතිකාමී,
ඩී.සී. ශ්‍රී දිල්ලිමුනි
ධර්ම පරීක්‍ෂණ පිළිබඳ ගරු ලේකම්.
තරුණ බෞද්ධ සංගමය,
කොළඹ 08.
07. 03. 81.