ඛුද්දකපාඨ පාලි සිංහල - බොද්‍ධ සම්මේලනය.pdf
- කතෘ :
- නාරද හිමි
- ප්‍රකාශිත වර්ෂය :
- 1965
- මුද්‍රිත වර්ෂය :
- 1965
- පිටු ගණන :
- 118
- බාගත කිරීම් ගණන :
- 1,240
- වෙබ් අඩවියට එක් කළ දිනය :
- 2020-02-02
- ගොනුවේ ප්‍රමාණය :
- 26 MB
පොතේ පිටු කිහිපයක ඡායාරූප පහතින් බලන්න.
සමස්ත ලංකා බෞද්ධ මහා සම්මේලනයේ ත්‍රිපිටක ග්‍රන්ථ මාලාවෙහි නවවන (IX) වෙළුම ලෙස පළ වූ මෙම කෘතිය, සූත්‍ර පිටකයේ ඛුද්දක නිකායට අයත් ඛුද්දකපාඨ පාළිය සහ එහි සිංහල අනුවාදය ඇතුළත් කර සම්පාදනය කර ඇත.
මෙහි පාළි පෙළ සහ සිංහල පරිවර්තනය මෙන්ම අදාළ පද විස්තර හා සටහන් සම්පාදනය කරන ලද්දේ කොළඹ බම්බලපිටියේ වජිරාරාමාධිපති පුජ්‍යපාද නාරද මහා ස්ථවිරයන් වහන්සේ විසිනි. පෙළ හා පරිවර්තනය සංස්කරණය කරන ලද්දේ මහාචාර්ය ගුණපාල මලලසේකර සූරීන් විසිනි.
ඛුද්දකපාඨයෙහි එන සරණාගමන, දසසික්ඛාපද, දෙතිස් කුණප, කුමාරප්‍රශ්න, මංගල, රතන, තිරෝකුඩ්ඩ, නිධිකණ්ඩ සහ මෙත්ත යන සූත්‍ර හා පාඨ නවය මෙහි ඇතුළත් වන අතර, පොත අවසානයෙහි නාරද හිමියන් විසින් සම්පාදිත වටිනා උපග්‍රන්ථ දෙකක්ද (වචන-වගන්ති විස්තර සහ ත්‍රිපිටක සාරාංශය, අටුවා-ටීකා තොරතුරු) අන්තර්ගත වේ.
ප්‍රකාශකයින්ගේ නිවේදනය
ක්‍රිස්තු වර්‍ෂ 1939 දෙසැම්බර මාසයේදී පැවැත්වු සමස්ත ලංකා බෞද්ධ මහා සම්මේලනයේ විසිඑක්වෙනි සංවත්සරික මහා සභා රැස්වීමේ දී පාළි තුන්පිටකය සිංහල අනුවාදයක් සමඟ සිංහල අකුරෙන් පළකළ යුතුයයි සම්මත කරගන්නා ලද යෝජනාව පරිදි තුන්පිටකයට අයත් පොත් තිස්එක මුද්‍රණයට පිළියෙළකොට එකි සම්මේලනයේ ත්‍රිපිටක මුද්‍රණය භාර මණ්ඩලයේ ප්‍රධාන සම්පාදක තැන්පත් මහාචාර්‍ය්‍ය ගුණපාල මලලසේකර මැතිතුමන් වෙත ලැබෙන සේ සලසන්නටයයි ලංකාවේ නොයෙක් පලාත්වල ධර්‍මධර විනයධර එළු මගධ භාෂාවන්හි මනා පටුත්වය ඇති මහා ස්ථවිරපාදයාණන් වහන්සේලා තිස්තුන් නමකට එකි මණ්ඩලයෙන් කළ ආරාධනාව උන්වහන්සේලා ඉවසා වදාළ සේක.
ඒ ආරාධනයටත් පෙර පිළියෙළ වූ ඛුද්දකපාඨය හා එහි සිංහල පරිවර්තනය මුද්‍රණයකොට දැන් නිකුත් කරමු.
ඛුද්දකපාඨය වනාහි විශාල පොතක් නොවන බැවින් ත්‍රිපිටකයේ පොත්වල විස්තරයක් උපග්‍රන්ථයක් වශයෙන් ඊට යොදා ප්‍රසිද්ධ කිරීමට මෙය සුදුසු ප්‍රස්ථාවයකැයි හැඟීමෙන් අප කළ ආරාධනාව පරිදි විස්තර සහිත උපග්‍රන්ථයක් මෙහි කර්තෘ වූ පූජ්‍ය නාරද මහාස්ථවිරපාදයන් වහන්සේ විසින්ම ලියා දෙන ලදින් එයද මෙහි යෙදුවෙමු.
මෙහි සිංහල අනුවාදයේ විස්තර කළයුතු තැන්වල ඉලක්කම් යොදා ඒ ඒ තැන් එකි ඉලක්කම් පිළිවෙළින් (උන් වහන්සේ විසින්ම ලියන ලද) උපග්‍රන්ථයක විස්තර කොට ඇත.
මේ ග්‍රන්ථය පූජ්‍ය නාරද ස්ථවිරයන් වහන්සේ විසින් සකස් කොට අවුරුදු කීපයක් ගතවනතුරු මුද්‍රණය කරන්නට නොලැබීම ගැන අපි කනගාටුවෙමු. කල්ගියද ත්‍රිපිටකය පිළිබඳ ඉතා වැදගත් උපග්‍රන්ථ දෙකක් සහිතව මෙ ධර්ම ග්‍රන්ථය මෙසේ ප්‍රසිද්ධ කිරීමෙන් ලත් පුණ්‍ය සම්භාරය සියලු සත්ත්වයෝ අනුමෝදන් වෙත්වා!
පී. ඩී. රත්නතුංග 2507 මැදින් අව ජලවක් ලත් (1964 මාර්තු 2) සඳු දින, කොළඹ වැල්ලවත්තේදිය.
(සමස්ත ලංකා බෞද්ධ මහා සම්මේලනයේ ත්‍රිපිටක මුද්‍රණය භාර මණ්ඩලයේ කෘත්‍යාධිකාරි සභාවේ සභාපති තැන.)
සංඥාපනය
මෙ ඛුද්දකපාඨය හා එහි සිංහල අනුවාදය බෞද්ධ මහා සම්මේලනයේ ත්‍රිපිටක ග්‍රන්ථමාලාවෙහි නව (ix) වෙනි ග්‍රන්ථයයි. සූත්‍ර පිටකයට අයත් ඛුද්දකනිකාය නමින් හැඳින්වෙන ධර්ම ග්‍රන්ථයන් අතුරෙන් පළමුවන ග්‍රන්ථය සේ දැක්වෙන ඛුද්දකපාඨය පිළිබඳ විස්තර මෙ පොතෙහි අන් තැනෙක පළවන බැවින් ඒ ගැන විශේෂයෙන් යමක් මෙහි සඳහන් කිරීම නුවුවමනා සේ සලකමු.
ඛුද්දකපාඨයෙහි පෙළ හා සිංහල අනුවාදය අපගේ ආරාධනාව පරිදි පිළියෙල කරන ලද්දේ කොළඹ වජිරාරාමාධිපති පූජ්‍ය නාරද මහා ස්ථවිරපාදයන් වහන්සේ විසිනි. උන්වහන්සේ විසින්ම සම්පාදිත උපග්‍රන්ථ දෙකක්ද පොත අගට යොදා ඇත. මෙසේ පෙළත්, පරිවර්තනයත්, ත්‍රිපිටක ධර්මය හැදෑරීමෙහිදී අතිශයින් උපකාරිවන උප ග්‍රන්ථයනුත් සකස්කොට දීමෙන් කරන ලද උසස් ශාසන සේවය ගැන පූජ්‍ය නාරද මහා ස්ථවිරයන් වහන්සේට අපේ ගෞරවාදර පුරස්සර කෘතඥතාව පිරිනමමු. ස්වදේශීය හා විදේශීය ධර්මප්‍රචාරය ඇතුළු මහත්වූද විවිධවූද කාර්යභාරයන් මධ්‍යයෙහි කරන ලද ඉල්ලීම පිළිගෙන ඒ සිදුකිරීමෙන් කරන ලද්දේ බලවත් අනුග්‍රහයෙකි, ධර්ම ශාස්ත්‍ර සංග්‍රහයෙකි.
මේ පොත සම්පූර්ණකොට අවුරුදු කීපයක් ගතවූ නමුත් නොවැළැක්විය හැකි හේතූන් නිසා ඒ පළකිරීම මෙතෙක් පමාවීම ගැන කනගාටුවෙමු.
වෙනදාමෙන්ම මෙ පොත මුද්‍රණය කරවීමේදීද ඇතිවූ කුදුමහත් කටයුතු ඉවසීමෙන් හා පරිශ්‍රමයෙන් සොයා බලා ඒ සියල්ල නොපිරිහෙළා සම්පූර්ණයෙන් කිරීම ගැන බෞද්ධ සම්මේලනයේ ත්‍රිපිටක භාරයේ කෘත්‍යාධිකාරි සභාවේ සභාපති තැන්පත් පි. ඩ. රත්නතුංග මුදලිතුමා අපගේ විශේෂ ප්‍රශංසාවට හිමිවේ. එතුමාට දිගාසිරි ලැබේවා!
පොතේ මුද්‍රණය ඉක්මනින් හා ශෝභන ලෙසින් කරදුන් ඩබ්ලිව්. ඩී. ජේ. රත්නායක අනුල මුද්‍රණාලයේ කළමනාකාර මහතාටද ස්තූති කළ යුතුවේ.
ගුණපාල මලලසේකර,
ප්‍රධාන සම්පාදක. 2507/1964 ජනවාරි 15 වෙනිද, ලන්ඩනයේදීය.