බෞද්ධයාගේ අත්පොත.pdf

බෞද්ධයාගේ අත්පොත යනු අතිපූජ්‍ය රේරුකානේ චන්ද්‍රවිමල මහානායක ස්වාමීන්ද්‍රයන් වහන්සේ විසින් සම්පාදිත ප්‍රකට ධර්ම ග්‍රන්ථයකි. බෞද්ධයෙකු විසින් තම ආගමික කටයුතු මහත්ඵල මහානිසංස වන පරිදි කර ගැනීමටත්, බෞද්ධ ප්‍රතිපත්ති නිසි ලෙස පිරීමටත් අවශ්‍ය වන මූලික කරුණු මෙම කෘතියෙන් සරල බසින් පහදා දී ඇත.

මෙම කෘතිය සම්පාදනය කිරීම පිළිබඳව කතුවර හිමියන් පවසන්නේ බෞද්ධයන් බොහෝ දෙනෙකු ආගම දහම නිසි ලෙස නොදැනීම හේතුවෙන් පින්කම් කිරීමේදී හා සිල් රැකීමේදී සිදු වන අඩුපාඩු වළක්වා, ඔවුන්ගේ යහපත පිණිස මෙය සකස් කළ බවයි. බුද්ධ, ධම්ම, සංඝ යන ත්‍රිවිධ රත්නය සහ තිසරණය, උපාසක ගුණාංග, දස අකුසල්, දස පුණ්‍ය ක්‍රියා (දාන, ශීල, භාවනා ආදී) සහ කර්ම ඵල විපාක පිළිබඳව මෙහිදී විස්තරාත්මකව සාකච්ඡා කෙරේ.

පොතෙහි අන්තර්ගත ප්‍රධාන මාතෘකා අතර:

• තිසරණය සහ රත්නත්‍රය ඇදහීම
• උපාසකත්වය සහ උපාසක ගුණ දහය
• දශ අකුශල කර්ම විවරණය
• දාන, ශීල, භාවනා ඇතුළු දශ පුණ්‍ය ක්‍රියා
• කර්ම විපාක සහ සසර පැවැත්ම
• කල්‍යාණ මිත්‍ර සේවනය සහ පවුල් ජීවිතය

සංඥාපනය

මතු ඵල ලබනු සඳහා කරන සෑම දෙයකින් ම උසස් ලෙස ඵල ලැබිය හැකි වන්නේ ඒ ඒ දෙය ගැන මනා දැනුම ඇති ව කරන තැනැත්තාට ය. කරන දෙය ගැන හොඳ දැනුමක් නැති ව වැඩ කරන්නහුගේ වියදම හා මහන්සිය බොහෝ සෙයින් නිෂ්ඵල වේ. එසේ කරන දෙයකින් ඵලයක් ලැබෙතත් ලැබෙන්නේ වියදමට මහන්සියට නො සරිලන අල්ප ඵලයෙකි. වරදවා කරන ප්‍රතිකාරයෙන් සමහර විට රෝගියා මිය යන්නාක් මෙන් නො දැන කරන වැඩවලින් සමහර විට විපතක් ද සිදු වේ. බුද්ධාගම ඇදහීම වනාහි උසස් ලෞකික ලෝකෝත්තර ඵල ලබනු සඳහා කරන්නකි. ආගම ඇදහීමෙන් ලැබිය හැකි ඒ උසස් ඵල ආගම ගැන දැනුම නැති ව නො මනා ලෙස ආගම අදහන බෞද්ධයාට නො ලැබී යන්නේ ය.

මේ කල වෙසෙන බෞද්ධයන්ගෙන් බොහෝ දෙනෙක් ම සෑහෙන පමණට ආගම ධර්‍මය නො දන්නෝය. එ බැවින් ඇතැම් බෞද්ධයෝ පින් කෙත් වූ රත්නත්‍රය ඇසුරු කිරීමෙන් ද නොයෙක් විට පව් සිදුකර ගනිති. ලෙහෙසියෙන් කළහැකි ව තිබෙන ඇතැම් උසස් පින්කම් ලඝුකොට සිතා නො කර හරිති. සමහර විට පිනය යන හැඟීමෙන් පව් කරති. පවය යන හැඟීමෙන් ඇතැම් පින්කම් නොකර හරිති. ඇතැම් බරපතල පව් කම් ද ලඝු කොට සිතා කරති. බොහෝ වියදම් කොට බොහෝ වෙහෙසී දුබල පිනක් සිදු වන ලෙස දන් දෙති. නො මනා කොට සිල් රකිති. මහන්සිය නිෂ්ඵල වන සැටියට භාවනා කරති. මනා කොට ආගම නො දැනීම නිසා සමහර කරුණුවල දී සමහර විට පැවිද්දන් ද නො මග යනු දක්නා ලැබේ.

ආගම සම්බන්ධ කරුණුවලදී බොහෝ බෞද්ධයන් නොයෙක් විට වරදවා ක්‍රියා කරනු දුටු අපට ඔවුන්ගේ ප්‍රයෝජනය පිණිස බෞද්ධයාගේ අත් පොත නමැති මේ පොත සම්පාදනය කිරීමේ අදහස අවුරුදු පසළොසකටත් ඉහතදී ඇතිවිය. මෙහි බෞද්ධයකුට තමාගේ ආගමික කටයුතු මහත්ඵල වන පරිද්දෙන් කරගත හැකිවීමට හා බෞද්ධ ප්‍රතිපත්ති මනාකොට පිරිය හැකි වීමටත් අවශ්‍යයෙන් දත යුතු නිතර දැන සිටිය යුතු බොහෝ කරුණු කාහටත් පහසුවෙන් තේරුම් ගත හැකි ලිහිල් බසින් හැකිතාක් නිරවුල් කොට විස්තර කර ඇත්තේ ය. ඒ කරුණු මෙහි පටුන කියවා දත හැකි ය. බෞද්ධයන් විසින් නිතර භාවිත කළ යුතු පොතක් බැවින් මෙයට බෞද්ධයාගේ අත් පොත යන නම තබන ලදී.

මේ බඳු පොතකට වන්දනා ගාථා හා පිරිත් ද ඇතුළු විය යුතු නමුත් ඒවා ඇති පොත් රටේ සුලභ බැවින් මෙයට ඒවා ඇතුළු නො කරන ලදී.

මෙයට - ශාසනස්ථිතිකමී,
රේරුකානේ චන්දවිමල මහා ස්ථවිර
නොවැම්බර් මස 18 වෙනි දින
2485/1949
පොකුණුවිට ශ්‍රී විනයාලංකාරාරාමයේ දී ය.