55 පට්ඨාන ප්‍රකරණ 1 - අභිධම්ම.pdf
- ප්‍රකාශිත වර්ෂය :
- 2006
- මුද්‍රිත වර්ෂය :
- 2006
- පිටු ගණන :
- 593
- බාගත කිරීම් ගණන :
- 3,823
- වෙබ් අඩවියට එක් කළ දිනය :
- 2015-10-18
- ගොනුවේ ප්‍රමාණය :
- 16 MB
වෙනත් සංස්කරණ
- පට්ඨානප්පකරණං - දෙඩම්පහල කවිධජ හිමි 1942
දෙඩම්පහල කවිධජ හිමි · 1942
- පට්ඨානප්පකරණ පාළි - ශ්‍රීපාද
කිරිඇල්ලේ ඤාණවිමල හිමි · 1954
පොතේ පිටු කිහිපයක ඡායාරූප පහතින් බලන්න.
බුද්ධ ජයන්ති ත්‍රිපිටක ග්‍රන්ථ මාලාවේ 50 වැනි වෙළුම (අභිධම්මපිටකයේ 11 වන ග්‍රන්ථය) වන මෙයින් පට්ඨානප්පකරණ ප්‍රථම භාගය ඉදිරිපත් කෙරේ. අභිධර්ම පිටකයේ අවසන් මෙන්ම අතිශය ගැඹුරු වූ මහා ප්‍රකරණය වන පට්ඨාන ප්‍රකරණයෙහි මූලික කොටස් මෙහි අඩංගු වේ.
අග්ගමහාපණ්ඩිත බලංගොඩ ආනන්දමෛත්‍රෙය මහානායක ස්වාමීන්ද්‍රයන් වහන්සේගේ අනුශාසනා පරිදි, රාජකීය පණ්ඩිත කරහම්පිටිගොඩ ශ්‍රී සුමනසාර ස්ථවිරයන් වහන්සේ විසින් බොහෝ දුරට සංස්කරණය කරන ලදුව, පසුව රාජකීය පණ්ඩිත බෙල්ලන ඥානවිමල නායක ස්ථවිරයන් වහන්සේ ප්‍රමුඛ ත්‍රිපිටක සම්පාදක මණ්ඩලය විසින් පාඨශෝධනය කර නිමවා ඇත. මෙහි සම්පූර්ණ සිංහල පරිවර්තනයක් වෙනුවට බෙල්ලන ඥානවිමල හිමියන් විසින් සම්පාදිත දීර්ඝ ‘පට්ඨාන නය නිරූපණය’ ඇතුළත් කොට ඇත.
මෙහි අන්තර්ගත ප්‍රධාන අංග:
- සංස්කාරක නිවේදනය හා සංඥාපනය
- පට්ඨාන නය නිරූපණය
- පච්චය උද්දෙස, පච්චය නිද්දෙස ඇතුළු පට්ඨාන පාලි මූලය
සංස්කාරක නිවේදනය
දෙදහස්පන්සිය වැනි සම්බුද්ධ පරිනිර්වාණ වර්ෂය අනුස්මරණය සඳහා එවක අගමැති වැ සිටි ශ්‍රීමත් ජෝන් කොතලාවල මැතිතුමාණන්ගේ ප්‍රමුඛත්වයෙන් පිහිටුවන ලද ලංකා බෞද්ධ මණ්ඩලය මගින් ත්‍රිපිටක ග්‍රන්ථ සියල්ල සංශෝධන කොට සිංහල බෞද්ධ ජනතාවගේ ධර්මඥානය සඳහා සිංහලභාෂාවෙන් තැබිය යුතු යයි සම්මත කරන ලද්දාවූ ඒ ඒ ග්‍රන්ථ පරිවර්තනය හා සංස්කරණය සඳහා සුදුසු මහ තෙරවරුන් තහාගෙන සංස්කාරක හා පරිවර්තක මණ්ඩල පිහිටුවන ලද්දේය. ඒ මණ්ඩලයන් පිළිබඳවැ කියයුතු කරුණු මුලින් මුද්‍රණය වූ ග්‍රන්ථවල දී නිවේදනය කරන ලද්දේය.
ත්‍රිපිටක ග්‍රන්ථයන් අතුරෙහි ප්‍රමාණයෙන් මහත් වූ ද දුර්ඝටිත වූ ද ග්‍රන්ථය වූ පට්ඨානප්පකරණය කාණ්ඩ තුනකින් මුද්‍රණය කළ යුතු යයි සම්මතකොට එහි කාර්ය්‍යභාරය බලන්ගොඩ ශ්‍රී ආනන්ද-මෛත්‍රෙය මහානායක ස්වාමීන්ද්‍රයන් වහන්සේට පවරා දෙන ලද්දේය. උන්වහන්සේ යථාකාලයෙහි ස්වකාර්ය්‍යය නිමහම් කළහ. එහෙත් අන්‍යත් ග්‍රන්ථවල මෙන් ඡායානුවාදයක් පට්ඨානයට අවශ්‍ය නොවන බව පෙනෙන හෙයින් දහම්නය දෘෂ්ටියනට එලවත්වුනු සඳහා සැකෙවින් පට්ඨාන නය නිරූපණය කොට දේශනාපාලිය සකස් කොට පළකිරීමට සම්මත විය.
ත්‍රිපිටක සම්පාදක මණ්ඩලයේ ජ්‍යෙෂ්ඨ සභිකයකු වූ සතරකෝරළ මහදිශාවේ ප්‍රධාන සංඝනායක ධුරීණ රාජකීය පණ්ඩිත කරහම්පිටි-ගොඩ සුමනසාර ස්ථවිරයන් වහන්සේ දිවාරැයෙහි වෙහෙසෙමින් පට්ඨාන ප්‍රකරණයේ ප්‍රථම භාගය බොහෝදුරට සංස්කරණය කරන ලද්දේය. උන්වහන්සේගේ ආකස්මික අභාවය නිසා ත්‍රිපිටක සංස්කාරක මණ්ඩලය බෙහෙවින් ගෙවීගියේය.
මේ අඩුව පිරිමසාලීම සඳහා ත්‍රිපිටක ධර්මය පිළිබඳව මනා පරිචය ඇති විද්‍යොදය පිරිවෙන්හි ආචාර්‍ය්‍ය රාජකීය පණ්ඩිත ශාස්ත්‍රපති බෙල්ලන ශ්‍රී ඥානවිමල නායක ස්ථවිරයන් වහන්සේ යැ, විද්‍යොදය පිරිවෙන්හි උපප්‍රධානාචාර්‍ය්‍ය රාජකීය පණ්ඩිත ශාස්ත්‍රපති හෑගොඩ සිරි ඛෙමානන්ද නායක ස්ථවිරයන් වහන්සේ යැ, රාජකීය පණ්ඩිත නරවානේ බුද්ධරක්ඛිත ස්ථවිරයන් වහන්සේ යැ යන තුන්නම පත්කරගන්නා ලදහ.
මෙතෙක් ත්‍රිපිටක සංස්කාරක මණ්ඩලයෙහි ක්‍රියා කරමින් සිට අභාවප්‍රාප්ත වූ මහතෙරවරුන්ද මේ සත්කාර්‍ය්‍යයට නන්අයුරින් සහාය වූ ගිහි පැවිදි සුධීන් ද මෙහිදී කෘතවේදී වැ සඳහන් කරම්හ. ශ්‍රී ලංකා ප්‍රජාතාන්ත්‍රික සමාජවාදී ජනරජයේ අතිගරු ජනාධිපති තැන්පත් ශ්‍රීමත් ජේ. ආර්. ජයවර්ධන උතුමාණන්ගේ කාරුණික අනුග්‍රහය ද, සංස්කෘතික කටයුතු හා දේශීය වෛද්‍ය අමාත්‍ය ගරු වි. ජ. මු. ලොකුබණ්ඩාර මැතිතුමාණන් හා ගරු ඩබ්ලිව්. ඇම්. පී. බණ්ඩා නියෝජ්‍ය ඇමතිතුමාණන් ඇතුළු සංස්කෘතික අමාත්‍යාංශයද තිසර මුද්‍රණාලයාධිකාරීහු ද මේ සඳහා නන් අයුරින් උපස්තම්භක වූ හැම සුධීහු ද මෙම ධර්මදානමය කුශලයෙන් සුඛභාගී වෙත්වයි ආශංසනය කරම්හ.
මීවගම,
ලබුගම ලංකානන්ද
මහානායකස්ථවිර
ත්‍රිපිටක සම්පාදක මණ්ඩලයේ
සභාපති හා ප්‍රධාන සම්පාදක.
1988 සැප්තැම්බර් මස
02 වැනි දින
ප්‍රවචනොදය පිරිවෙන
මොල්ලීගොඩ.
සංඥාපනය
පරමාර්ථ ධර්මප්‍රවර්තක වූ තිලෝගුරු සම්මා සම්බුදුරජාණන් වහන්සේ බුද්ධත්වයෙන් පසු සතරවන සතියෙහි රත්නාඝරයෙහි වැඩැ-හිඳ තමන්වහන්සේ ප්‍රතිවෙධ කළ පරමාර්ථ ධර්මයන් සම්මර්ශනය පටන්ගත්සේක. ධම්මසංගණීප්පකරණය ආදිකොට ඇති ඒ ඒ ප්‍රකරණයන් සිම්පදිමින් පට්ඨානප්‍රකරණයට පැමිණ එහි අනන්ත වූ නය විස්තාර සම්මර්ශන කරත් කරත්ම ප්‍රණීත බවට පැමිණි බුද්ධකාය ප්‍රීතිවේගයෙන් උතුරාගිය ආලොක ධාරාවෙන් මුළුලොව එකාලොක විය. ප්‍රස්තාවනා සඳහා මෙහිලා පවසනුයේ මෙතෙකි.
බුදුරදුන් තව්තිසාවෙහි පඬුඇඹුල් සලඅසුන්හි වැඩහිඳ අනෙක නය සතසහස්‍රයෙන් වදාළ පට්ඨානප්පකරණය අගසව් සැරියුත් මහ රහතුන් වහන්සේ ඒ මහාප්‍රකරණය වාචනාමාර්ගයට නඟා සිය අතැවැසියන්ගේ මාර්ගයෙන් මිනිසුන් අතරැ ව්‍යාප්ත කළ සේක. මේ ගම්භීරවූ ප්‍රකරණය පිළිබඳවැ දක්වාලියැ යුතු කරුණු මෙහි සංස්කාරක නිවේදනයෙන් හා පට්ඨාන නය නිරූපණයෙන් ද පවසන ලද්දේය.
පට්ඨානප්පකරණය මුද්‍රණයෙහි ශ්‍රී ලංකා සමාජවාදී ජනරජයේ අනුග්‍රහයද, සංස්කෘතික කටයුතු පිළිබඳ ඇමැතිතුමාණන් හා එම දෙපාර්තමේන්තුවේ සුධීහු ද ත්‍රිපිටක ධර්මප්‍රවර්තනය සඳහා ළැ දී ක්‍රියාකරන හැම සුධීහු ද සද්ධර්මයාගේ ව්‍යාප්තිය හේතුවෙන් ජනිත වූ කුශලඵලයෙන් සුඛභාගී වෙත්වයි ආශංසනය කරම්හ.
මීවගම, ශාසනොදයකාරී,
ලබුගම ලංකානන්ද
මහානායක ස්ථවිර
ත්‍රිපිටක සම්පාදක මණ්ඩලයේ
සභාපති හා ප්‍රධාන සම්පාදක.
2531/1988 සැප්තැම්බර් 10 වැනි දින
115, මහානායක වාසස්ථානයෙහි
ත්‍රිපිටක සම්පාදක මණ්ඩලය
විජේරාම මාවත,
කොළඹ 7.