41 අපදාන පාලි - භික්ඛූනී අපදාන - සූත්‍ර.pdf

බුද්ධ ජයන්ති ත්‍රිපිටක ග්‍රන්ථ මාලාවේ 37(ii) වන වෙළුම (සූත්‍රාන්ත පිටකයේ 32 වන ග්‍රන්ථය) ලෙස පළ වූ අපදානපාළි ද්විතීය භාගයෙහි දෙවන කාණ්ඩයයි (ථෙරීඅපදාන). මෙහි පාලි පාඨය සහ ඊට අදාළ සිංහල පරිවර්තනය ඇතුළත් වේ.

මූලික පරිවර්තන කටයුතු රාජකීය පණ්ඩිත වෙඬරුවේ සිරි අනෝමදස්සී අනුනායක ස්ථවිරයන් වහන්සේ විසින් සිදු කරන ලද අතර අවසාන කොටස් කිහිපය ත්‍රිපිටක සම්පාදක මණ්ඩලයේ ප්‍රධාන සම්පාදක අග්ගමහාපණ්ඩිත ලබුගම ලංකානන්ද මහානායක හිමියන්ගේ මූලිකත්වයෙන් සම්පාදනය විය. ථෙරීඅපදානයට අයත් ප්‍රධාන වර්ග 4 කින් යුත් රහත් මෙහෙණින් වහන්සේලාගේ අතීත චරිතාපදාන මෙහි අන්තර්ගතය.

• සුමෙධාවග්ගො
• එකුපොසථිකාවග්ගො
• කුණ්ඩලකෙසීවග්ගො
• ඛත්තියාවග්ගො

සංස්කාරක නිවේදනය

සූත්‍රාන්ත පිටකයෙහි ඛුද්දක නිකායට අයත් ඛුද්දකපාඨාදි පසළොස් ග්‍රන්ථයන් කෙරෙහි අපදානපාළිය තෙළෙස්වැනි ග්‍රන්ථය යි. බුද්ධජයන්ති ත්‍රිපිටක ග්‍රන්ථමාලාවෙහි ලා අපදානපාළිය කාණ්ඩ දෙකක් වශයෙන් ගෙන 36-37 වැනි ග්‍රන්ථයන් ලෙස මුද්‍රණය කරවීමට සම්මත කරන ලද්දේ ය. ලංකාබෞද්ධ මණ්ඩලයේ ආරාධනයෙන් රාජකීය පණ්ඩිත තලල්ලේ ධම්මානන්ද නායක ස්ථවිරයන් වහන්සේ නායක ස්ථවිරයන් වහන්සේ විසින් අපදාන පාළිය සපුරා හෙළ බසින් පරිවර්තන කොට ඇතැයි කියනුදු යසොධරාපදානයෙහි පටන් අවසාන කොටස ත්‍රිපිටක සම්පාදක මණ්ඩලයට නො ලැබුණු හෙයින් ථේරාපදානයෙහි යසඅපදානය ද ථෙරී අපදානය ද නැවත පරිවර්තන කරන්නට සිදුවිය. එහෙයින් ත්‍රිපිටක සම්පාදක මණ්ඩලයේ සම්මතය පරිදි එකී ග්‍රන්ථශෙෂය පරිවර්තන කරනු සඳහා වෙඬරුවේ සිරි අනොමදස්ස්‍යභිධාන අනුනායක ස්ථවිරයන් වහන්සේට පවරා දෙන ලද්දේ ය.

සම්පාදකමණ්ඩලයේ සම්මතය ඉතා සතුටින් පිළිගත් අනුනායක ස්ථවිරයන් වහන්සේ පාඨ ශෝධනය ද කරමින් අටුවාවක් හෝ ටීකාවක් වැනි පරිවාර ග්‍රන්ථයකුදු නැති ථේරිඅපදාන පාළිය මැනවින් සිංහල භාෂාවට පරිවර්තන කළහ. එහිදු අවසානයෙහි අපදාන කිහිපයක් අපගේ පරිවර්තන වෙයි.

සංස්කෘතික අමාත්‍යාංශයේ අතිරේක ලේකම් අතිරේක ලේකම් තැන්පත් සෝමපාල ජයවර්ධන මහතාණන්ගේ ක්‍රියා සංවිධානය ඇති වැ සමාජවාදී ප්‍රජාතාන්ත්‍රික ජනරජයේ අනුග්‍රහයෙන් දෙහිවල තිසර මුද්‍රණාලයෙහි මුද්‍රණය කරවන ලද්දේ විය. සම්බුද්ධ ශාසනයාගේ උද්දීප්තියට කාරණ වූ ත්‍රිපිටක ධර්ම ප්‍රචාරයෙන් ජනිත වූ කුශලය මෙ මැ අධිකාරයෙහි සහාය වූ හැම දෙනකුන්ට මැ ආයුරාරෝග්‍යාදි සම්පත් හා සගමොක් සුව පිණිස පවතිවා යි ආශංසනය කරම්හ.

මේ වගට, ශාසනොදයකාරී,
ලබුගම ලංකානන්ද
මහානායක ස්ථවිර
ත්‍රිපිටක මණ්ඩලයේ ප්‍රධාන සම්පාදක

2526 / 1983 ජූලි 10 වැනි දින
ත්‍රිපිටක කාර්යාලය
මහානායක චාරිකාරාමය
115, විජේරාම මාවත,
කොළඹ 7.