40 අපදාන පාලි - භික්ඛූ අපදාන 2 - සූත්‍ර.pdf
- ප්‍රකාශිත වර්ෂය :
- 2006
- මුද්‍රිත වර්ෂය :
- 2006
- පිටු ගණන :
- 461
- බාගත කිරීම් ගණන :
- 3,188
- වෙබ් අඩවියට එක් කළ දිනය :
- 2015-10-18
- ගොනුවේ ප්‍රමාණය :
- 13 MB
පොතේ පිටු කිහිපයක ඡායාරූප පහතින් බලන්න.
බුද්ධ ජයන්ති ත්‍රිපිටක ග්‍රන්ථ මාලාවේ 37(i) වන වෙළුම ලෙස පළ වූ මෙය සූත්‍රන්ත පිටකයේ ඛුද්දක නිකායට අයත් අපදාන පාලි ද්විතීය භාගයේ පළමුවන කාණ්ඩයයි. බුද්ධ ශ්‍රාවක මහරහතන් වහන්සේලාගේ අතීත චරිතාපදාන ඇතුළත් මෙම කෘතිය, ලංකා බෞද්ධ මණ්ඩලයේ ආරාධනයෙන් ශාස්ත්‍රපති රාජකීය පණ්ඩිත තලල්ලේ සිරි ධම්මානන්ද නායක ස්ථවිරයන් වහන්සේ විසින් සිංහලයට පරිවර්තනය කරන ලදී.
මෙහි සංස්කාරක නිවේදනයට අනුව මුල් පරිවර්තනයෙන් කොටසක් මුද්‍රණාලයකදී අස්ථානගත වීම නිසා ‘යසත්ථෙරාපදානයෙහි’ පටන් කොටස පසුව වෙඩරුවේ සිරි අනෝමදස්සී නායක ස්ථවිරයන් වහන්සේ ලවා සම්පාදනය කරවා ගෙන ඇත. ථෙරාපදානයේ අවසානය දක්වා වූ මෙත්තෙය්‍ය, භද්දාලි, සකිං සම්මජ්ජක ආදී වග්ග රැසක අපදාන මෙහි පාලි පෙළ හා සිංහල පරිවර්තනය වශයෙන් අන්තර්ගත වේ.
සංස්කාරක නිවේදනය
සූත්‍රන්ත පිටකයෙහි ඛුද්දක සඟියට අයත් ඛුද්දක පාඨාදි පසළොස් ග්‍රන්ථයන් කෙරෙහි තෙළෙස් වැන්න වූයේ අපදාන පාළියයි. එය බුද්ධ ජයන්ති ත්‍රිපිටක ග්‍රන්ථ මාලායෙහි 36, 37 ග්‍රන්ථ වශයෙන් පළ කරවීමට සම්මත විය. එයින් අපදාන පාළියෙහි ප්‍රථම භාගය 1961 දී මුද්‍රණයෙන් පළ විය.
ලංකා බෞද්ධ මණ්ඩලයේ ආරාධනය පරිදි කොළඹ දෙමටගොඩ ජයශෙඛරාරාමාධිපති ශාස්ත්‍රපති රාජකීය පණ්ඩිත තලල්ලේ ධම්මානන්ද නායකස්ථවිරයන් වහන්සේ විසින් අපදානපාළිය සිංහල භාෂාවෙන් සපුරා පරිවර්තනය කරන ලද්දේ ය. ප්‍රථම භාගය මුද්‍රණයට පැමිණි සමනන්තරව මැ මෙම ද්විතීය භාගය ද එක්තරා මුද්‍රණාලයකට භාරදී තිබිණි. එහි ‘යසත්ථෙරාපදානය’ මුද්‍රණය වූ පසු අප නොදන්නා කවර හේතුවකින් හෝ මුද්‍රණය නැවතී ලිඛිත වූ අත් පිටපත් එකකුදු සොයාගත නොහෙන සේ වැනසී ගියේ යැ. එහෙයින් ‘යසත්ථෙරාපදානයෙහි’ පටන් නැවත පරිවර්තනය කරන්නට සිදු විය. මුල දී මෙහි සිංහල පරිවර්තනය ලියූ තලල්ලේ ධම්මානන්ද නායකස්ථවිරයන් වහන්සේට ම මේ සඳහා අයදුම් කළ නමුත් උන්වහන්සේට මේ කාර්යයෙහි ව්‍යාපෘත වීමට අවකාශ නොවුයෙන් විද්‍යොදය පිරිවෙන්හි ආචාර්‍ය්‍ය ශාස්ත්‍රපති විද්‍යා විශාරද, රාජකීය පණ්ඩිත වෙඩරුවේ සිරි අනෝමදස්සී නායකස්ථවිරයන් වහන්සේ එම පරිවර්තන කාර්‍ය්‍යය භාරගත්හ. එය ධර්මකාමීන්ගේ ප්‍රීතියට හේතු වෙතැයි සිතම්හ.
අපදානපාළි ද්විතීය භාගය එක් මැ ග්‍රන්ථයක් ලෙස මුද්‍රණය කළ යුතුව ඇත ද ග්‍රන්ථ පරිහරණ පහසුව සලකා සපනස් වන යසවග්ගයෙන් ථෙරාපදානය අවසානය දක්වා ද්විතීය භාගයේ පළමු වන කාණ්ඩය ලෙස ද, ථෙරී අපදානය දෙවැනි කාණ්ඩය ලෙස ද ප්‍රකාශයට පැමිණෙනු ඇත.
තවද මුද්‍රිත වැ ඇති බොහෝ අපදානපාළි ග්‍රන්ථයන්හි යසවග්ගාවසානයෙහි ‘රට්ඨපාල, උපවාන’ යන අපදාන දෙක යොදා ඇත ද, අපදානපාළියෙහි අටළොස් වැනි රට්ඨපාල ථෙරාපදානය ද දෙවිසි වැනි උපවාන ථෙරාපදානය ද (ප්‍රථමභාග - 112, 124 පිටු) නො වෙනස් වැ යෙදී ඇති හෙයින් ඒ අපදාන දෙක නැවත නොයෙදූ බව සලකනු මැනැවි.
මුද්‍රණයෙහි අවසානය නොදැක අභාවප්‍රාප්ත වැ තුබූ මේ ග්‍රන්ථ භාගය ද සංස්කෘතික සහකාර අධ්‍යක්ෂ සෝමපාල ජයවර්ධන මහතාණන්ගේ කටයුතු සංවිධානයත් නියර මුද්‍රණාලයාධිකාරීන්ගේ සහයෝගයත් හේතු කොටගෙන මෙසේ ප්‍රකාශයට පැමිණීම ශාසනොදයකාමීන්ගේ ප්‍රමෝදයට හේතු වේ යයි සිතම්හ.
‘‘සබ්බෙ සත්තා භවන්තු සුඛිතත්තා’’
මෙවගට - ශාසනොදයකාරී
ලබුගම ලංකානන්ද ස්ථවිර
ශ්‍රීපිටකමණ්ඩලයේ ප්‍රධාන සම්පාදක
1977, ජුලි 10,
ශ්‍රීපිටක කාර්ය්‍යාලය
මහානායක චාරිකාරාමය,
115, විජේරාම මාවත,
කොළඹ 7.