38 පටිසම්භිදාමග්ගප්පකරණ 2 - සූත්‍ර.pdf
- ප්‍රකාශිත වර්ෂය :
- 2006
- මුද්‍රිත වර්ෂය :
- 2006
- පිටු ගණන :
- 266
- බාගත කිරීම් ගණන :
- 2,715
- වෙබ් අඩවියට එක් කළ දිනය :
- 2015-10-18
- ගොනුවේ ප්‍රමාණය :
- 10 MB
පොතේ පිටු කිහිපයක ඡායාරූප පහතින් බලන්න.
මෙම ග්‍රන්ථය බුද්ධ ජයන්ති ත්‍රිපිටක ග්‍රන්ථ මාලාවේ 35 වන වෙළුමේ දෙවන භාගය (35 ii) ලෙස ප්‍රකාශිත, සූත්‍ර පිටකයේ ඛුද්දක නිකායට අයත් පටිසම්භිදාමග්ගප්පකරණ දෙවන කොටසයි.
ප්‍රකරණයේ විශාලත්වය හේතුවෙන් කොටස් දෙකකට බෙදා පළ කර ඇති අතර, මෙහි යුගනද්ධවග්ගය සහ පඤ්ඤාවග්ගය යන ප්‍රධාන වර්ග ද්වය (විසි කථාවක්) ඇතුළත් වේ. මෙහි පාලි පාඨය සංශෝධනය කර ඇත්තේ අග්ගමහා පණ්ඩිත ලබුගම ලංකානන්ද අනුනායක හිමිපාණන් වහන්සේ විසිනි. සිංහල අනුවාදය උන්වහන්සේ සහ රාජකීය පණ්ඩිත කරහම්පිටිගොඩ සුමනසාර ස්ථවිරයන් වහන්සේ විසින් සම්පාදනය කර ඇත.
මෙහි අන්තර්ගත ප්‍රධාන අංශ:
- යුගනද්ධවග්ගො (කථා 10)
- පඤ්ඤාවග්ගො (කථා 10)
- ගාථාපිපාදසූචි හා පධානවචනසූචි
සංස්කාරක නිවේදනය
සූත්‍රාන්තපිටකයේ ඛුද්දකනිකායට අයත් පටිසම්භිදාමග්ගප්පකරණයෙහි ද්විතීය භාගය බුද්ධජයන්තිත්‍රිපිටකග්‍රන්ථමාලාවෙහි පස්තිස් (35) වැනි ග්‍රන්ථයේ ද්විතීය භාගය යි. පටිසම්භිදාමග්ගප්පකරණය එක් මැ ග්‍රන්ථයක් ලෙස සලකනලද නමුත් ග්‍රන්ථය ප්‍රමාණයෙන් විශාල වූ හෙයින් පරිශීලනය කරනුවන්ගේ පහසුව සඳහා ප්‍රකරණයේ පළමුවැනි වූ මහා වර්ගය ප්‍රථම භාගය සැටියෙන් ද, යුගනද්ධ - පඤ්ඤා යන වග ද්වය ද්විතීයභාගය සැටියෙන් ද පළකරවීමට සම්මත කරන ලද්දේ ය. එහෙයින් මෙය ඛුද්දකනිකායෙහි ත්‍රයොදශ (13) භාගය වේ. මේ ද්විතීයභාගය යුගනද්ධවග්ගයෙහි ‘යුගනද්ධ කථා’ ආදි දශකථාවෙකින් ද, ප්‍රඥාවර්ගයෙහි ‘පඤ්ඤාකථා’ ආදි දශකථායෙකින් දැයි විසි කථායෙකින් ප්‍රතිමණ්ඩිත වෙයි.
පටිසම්භිදාමග්ගයෙහි දෙවැනි තුන්වැනි වර්ගද්වය සිංහල භාෂාවෙන් අනුවාදය සඳහා ශ්‍රී ලංකා බෞද්ධ මණ්ඩලය විසින් පණ්ඩිත මහාස්ථවිර දෙපොලක් වෙත පවරන ලද නමුත් එහි පාඨශෝධනය හෝ පරිවර්තනය හෝ සමාප්තියට නො පැමිණියෙන් එ මැ කාර්යභාරය සංස්කාරක මණ්ඩලය මගින් අප වෙත පවරන ලද විය. දවරැ දෙක විවිධ කාර්ය බහුලත්‍වයෙන් මිරිකෙමින් සිටියමුදු සිංහල අනුවාදය සහිත පරිශුද්ධ ත්‍රිපිටක ධර්මය ඉතා ඉක්මනින් ඇස්හමු කරනු සඳහා මේ ඉමහත් බර හිසින් පිළිගෙන 1962 දී පාඨශෝධනය හා පරිවර්තනය නිමහම් කළෙමි.
මේ දුෂ්කරයෙහි ලා අප දහම් අතවැසි කලණමිත් කරහම්පිටිගොඩ සුමනසාර පණ්ඩිත ස්ථවිරයන් වහන්සේගේ අත්‍යන්තොපස්ථානය ද, ත්‍රිපිටක සංස්කාරක උත්තරීතර මණ්ඩලයේ සහාය ද අපට ලැබුණු බව පවසම්හ. මෙතෙක් ලක්දිවැ මුද්‍රණයෙන් ප්‍රකාශයට නොපත් ත්‍රිපිටකයේ ග්‍රන්ථ රත්නයක් වූ ‘පටිසම්භිදාමග්ගප්පකරණය’ පළකරවාලීමෙන් ජනිත කුශලයෙන් දිවංගත පරවාහැර ශ්‍රී වජ්‍රඥානාභිධාන නා හිමිපාණන් වහන්සේ හා ශ්‍රීලංකාරජය හා සංස්කෘතික කාර්යාංශයෙහි අධිකාරිහුද මුද්‍රණාලයයෙහි නියුක්ත වූ පින්වත්හු ද ලොව් ලොවුතුරුසුව ලබත්වා’ යි ආශංසනය කරම්හ.
මීට - ලොසසුන්වැඩ පතස්සා
ලබුගම ලංකානන්ද ස්ථවිර
ත්‍රිපිටකසංස්කාරකමණ්ඩලයේ ප්‍රධාන සම්පාදක.
1971. 8. 21 ත්‍රිපිටක කාර්යාලය,
කොළඹ මහානායකවාරිකාරාමය,
115, විජේරාම මාවත,
කොළඹ 7.
සභාපති ප්‍රකාශය
ආගම නාමයෙන් ප්‍රසිද්ධ පස්මහසඟියෙහි ඛුද්දකනිකායට ඇතුළත් ‘පටිසම්භිදාමග්ග’ දෙවන භාගය මෙය වේ. මෙහි පළමු වන භාගය කලකට පෙර මුද්‍රිත වියැ. ප්‍රතිසම්භිදාමාර්ගප්‍රකරණය පිළිබඳ වැ කියයුතු හැම එහි සංඥාපනයෙහි සඳහන් වනුවෙන් මෙහි දී ද ප්‍රකාශ කිරීම අවශ්‍ය නො වේ.
බුද්ධජයන්තිය නිමිති කොට පාලිධර්මය සියබසට අරවා මහාජනයා අත තබන්නට ලක්රජය ඉදිරිපත්වීමෙහි ප්‍රතිඵල වශයෙන් මෙසේ ‘පටිසම්භිදාමග්ග’ ය ප්‍රකාශයට පත් වෙයි. මෙයට කලින් මේ ප්‍රකරණය දිවයිනෙහි මුද්‍රිත නො වී යැ. විදෙශයෙහි මුද්‍රිත පොත් ද මෙරටැ පුස්කොළපොත් ද සසඳා බලන් මැ විවිධ පාඨ ආකුලව්‍යාකුල වැ ඇති බව පෙනේ. එයින් මෙහි පරිවර්තන කාර්යයට වඩා පාඨශොධනය අතිශය දුෂ්කර වූයක් වැ පැවැතිණි. එසේ වුව ද කෙලවර මුද්‍රණයෙහි ලා පණ්ඩිතජනයාගේ ප්‍රසාදයට හේතු වන සැටියෙන් පාඨශෝධනය බෙහෙවින් සම්පූර්ණ වැ ඇත. යුගනද්ධකථාවසානයෙහි සිටි ගාථාපඞ්ක්තියෙහි ශොධන ආදිය හා තෝරා අදොලිපි කළ පාඨාන්තර හා බලන් මැ පාඨශොධනයෙහි විශිෂ්ටතාව වටහාගත හැකි වෙයි. මේ කාර්යයෙහි දී තර්කව්‍යාකරණාදියෙහි සාධීත ත්‍රිපිටක පාලියෙහිත් හසල බුද්ධි ඇති පණ්ඩිතාචාර්ය ලබුගම ශ්‍රී ලංකානන්ද අනුනායක මහාස්ථවිරයන් වහන්සේ නියුක්ත වූ හ. පරිවර්තනකාර්යයෙහි ලා භාෂාශාස්ත්‍රාදියෙහිත් ධර්මවිනයයෙහිත් පරිපක්වබුද්ධි ඇති රාජකීයපණ්ඩිත කරහම්පිටිගොඩ සුමනසාර ස්ථවිරයන් වහන්සේ ඔබට සහාය වැ සිටියහ. මෙසේ මේ දෙදෙනා වහන්සේ කළ ශාසනසංග්‍රහය ඉතා උසස් කොට මෙහි දී ප්‍රකාශ කරම්හ.
මහාජනයා කෙරෙහි අප්‍රකාශ වැ පැවැති ‘පටිසම්භිදාමග්ග’ ය සියබසින් කියවා ශාසනය කෙරෙහි ශ්‍රද්ධාසම්පත් ඇති කොට ගෙනැ දෙලෝවැඩ හා කෙළවර නිවන්සම්පත් සිද්ධ කරගනිත්වායි පතම්හ.
ශාසනකීර්ති කෘ/මැති,
කෝදාගොඩ සිරිඤාණාලොක නායකස්ථවිර
ත්‍රිපිටකමණ්ඩලයෙහි සභාපති.