36 චූල නිද්දේස පාළි - සූත්‍ර.pdf
- ප්‍රකාශිත වර්ෂය :
- 1976
- මුද්‍රිත වර්ෂය :
- 2006
- පිටු ගණන :
- 668
- බාගත කිරීම් ගණන :
- 2,562
- වෙබ් අඩවියට එක් කළ දිනය :
- 2015-10-18
- ගොනුවේ ප්‍රමාණය :
- 19 MB
පොතේ පිටු කිහිපයක ඡායාරූප පහතින් බලන්න.
බුද්ධජයන්ති ත්‍රිපිටක ග්‍රන්ථ මාලාවේ 34 වන වෙළුම (සූත්‍ර පිටකයේ 28 වන ග්‍රන්ථය හෙවත් ඛුද්දක නිකායේ දොළොස්වන භාගය) ලෙස ප්‍රකාශයට පත් කරන ලද චුල්ලනිද්දෙස පාළි ග්‍රන්ථයයි. මීට පෙර පළවූ මහානිද්දෙස පාළියෙන් අනතුරුව සූත්‍ර නිපාතයේ පාරායන වග්ගය සහ ඛග්ගවිසාණ සූත්‍රය විග්‍රහ කරමින් සැරියුත් මහරහතන් වහන්සේ විසින් දේශනා කරන ලදැයි සලකනු ලබන චුල්ලනිද්දෙස පාළිය සහ එහි පූර්ණ සිංහල අනුවාදය මෙහි අන්තර්ගත වේ.
මෙම ග්‍රන්ථයේ පාඨශෝධනය සහ සිංහල අනුවාදය ලබුගම සිරි ලංකානන්ද අනුනායක ස්ථවිරයන් වහන්සේ සහ කරහම්පිටිගොඩ සුමනසාර ස්ථවිරයන් වහන්සේ විසින් සම්පාදනය කර තිබේ. පොතුහැර වඤ්ඤසෙල පරිවේණාධිපති අහුංගොඩ සීලානන්ද නායක ස්ථවිරයන් විසින් පිළියෙල කළ අත්පිටපත ද, බුරුම, සියම් සහ ලන්ඩන් පාලි පොත් සමාගමේ මුද්‍රිත පිටපත් හා පුස්කොළ පිටපත් රාශියක් ද ඇසුරු කරගනිමින් මෙම ශාස්ත්‍රීය සංස්කරණය සිදු කර ඇත.
මෙහි අඩංගු ප්‍රධාන කොටස්:
- පාරායනවග්ග නිද්දෙස (අජිත, තිස්සමෙත්තෙය්‍ය ආදී මානවකයන්ගේ ප්‍රශ්න විවරණ)
- ඛග්ගවිසාණසුත්ත නිද්දෙස
- ගාථාදි පාද සූචි, පුද්ගල-ස්ථාන සංඥා සූචි සහ විශෙෂපදානුක්‍රමණිකා
චුල්ලනිද්දෙසය
ශාක්‍යකුල ශාරීපුත්‍ර අග්‍රශ්‍රාවකයන් වහන්සේ විසින් දෙශිත නිද්දෙස’ය ඛුද්දකනිකායෙහි ඇතුළත් වේ. “නිද්දෙස” විසින් එය එකක් වුව ද, පසු කලෙක දෙකක් වැ ගිය සැටිය මෙහි සංඥාපනයෙහි දැක්විණ. දෙවන කොටස විසින් සලකන තෙල ‘චුල්ලනිද්දෙස’යෙහි සිංහල පරිවර්තනය පොතුහැර වඤ්ඤසෙල පරිවෙණාධිපති පණ්ඩිත අහුංගොඩ සීලානන්ද නායක ස්ථවිරයන් වහන්සේ සැපයාලූහ. උන්වහන්සේ මහත් පරිශ්‍රමයකින් ඒ කාර්යය නිමකළ නමුදු, පරිවර්තනයෙහි දු සංශොධනයෙහි දු ඌනතා දුටු ත්‍රිපිටක පරිවර්තන සංස්කාරක මණ්ඩලය ත්‍රිපිටකවාගීශ්වරාචාර්‍ය්‍ය ලබුගම සිරි ලංකානන්ද අනුනායක ස්ථවිරයන්වහන්සේ වෙතැ පාඨශොධනය හා, පරිවර්තනය හා දෙවන වර කරනු සේ දක්වන ලද්දේ යැ. උන්වහන්සේ ස්වදෙශ විදෙශ දෙක්හි එන පාඨාන්තර සසඳමින් කළ තෙල පාඨශොධනය හා පරිවර්තනය මෙතෙක් ලොවැ පළ වැ ගිය පාඨශොධනාදිය යටපත් කරන සංස්කරණයෙකැයි කියම්හ. උන්වහන්සේ මෙහි ලා දැක්වූ කෘතහස්ත භාවය හා ව්‍යක්තභාෂායෙනි සියබසට අරවා තැබීම හා පය්‍යාප්තිධරයන්ගේ ප්‍රසාදය පිණිස හේතු වෙතියි සලකම්හ.
කෝදාගොඩ සිරි ඤාණාලොක නායක ස්ථවිර.
ත්‍රිපිටක සම්පාදක මණ්ඩලයෙහි
සභාපති.
සංස්කාරක නිවේදනය
බුද්ධජයන්ති ත්‍රිපිටක ග්‍රන්ථමාලාවෙහි තුන්තිස් (34) වන ග්‍රන්ථය වූ ‘චුල්ලනිද්දෙසපාළි’ය ඛුද්දකනිකායාන්තර්ගත පසළොස් ග්‍රන්ථයන් අතුරෙහි එකොළොස්වැන්න වූ ‘නිද්දෙසපාළි’යෙහි ද්විතීය භාගය ලෙස සැළකිය යුතුය.
තථාගතප්‍රවේදිත වූ ප්‍රවචනපාළියෙහි කොට්ඨාසගත අභිධෙය්‍ය ඇති ශාක්‍යකුල අගසවු සැරියුත් මහරහතුන් වහන්සේ විසින් සූත්‍රනිපාතයෙහි සම්භාවිත ධර්‍මාර්ත්‍ථ හෙයින් ගම්භීර වූ තෙතිස් සූත්‍ර කෙනකුන් සඳහා වදාළ නිද්දෙසපාළියෙහි ‘චුල්ලනිද්දෙස’ නමින් ගත් ද්විතීය භාගය ද සිංහල භාෂාවෙන් පරිවර්තන කරනු අතිශයින් දුෂ්කර කාර්ය්‍යයෙකි.
ලංකා බෞද්ධ මණ්ඩලයේ ආරාධනයෙන් කරනලද පරිවර්තනය ප්‍රමාණවත් නොවන සේ පෙනීගිය හෙයින් උත්තරීතර සංස්කාරක මණ්ඩලය විසින් චුල්ලනිද්දෙසපාළියෙහි පාඨශොධනය හා පරිවර්තනය ද අප වෙත පවරන ලද්දේය.
රාජකීය පණ්ඩිත අහුංගොඩ ශීලානන්ද නායක ස්ථවිරයන් වහන්සේ විසින් පුස්කොළ පිටපත් බොහෝ ගණනක පාඨාන්තර ද සහිත කොට සපයා තුබූ අත්කොපිය සියම් බුරුම ඉංග්‍රීසි අක්‍ෂරයෙන් මුද්‍රිත චුල්ලනිද්දෙස ග්‍රන්ථයන්හුදු ඇසිරි කොට පරිශ්‍රමයෙන් පාඨශොධනය කෙරෙමින් සිංහල පරිවර්තනය ද කරනලද්දේය. මෙහි ශොධන පරිවර්තන කාර්ය්යය සඳහා ත්‍රිපිටක සම්පාදක මණ්ඩලයෙහි සාමාජික රාජකීය පණ්ඩිත කරහම්පිටිගොඩ සුමනසාර ස්ථවිරයන් වහන්සේගේ සහාය සපුරා ලැබුණු බව ප්‍රකාශ කරම්හ.
මුද්‍රණ අවස්ථාවට පැමිණි ත්‍රිපිටක මණ්ඩලයේ සභාපති නායක ස්ථවිරයන් වහන්සේ යැ සම්පාදක මණ්ඩලයේ රද්දැල්ලේ සිරි පඤ්ඤාලොක අනුනායක ස්ථවිරයන් වහන්සේ යැ, ඩෙබාරුවේ සිරි අනොමදස්සි නායක ස්ථවිරයන් වහන්සේ යැ, කරහම්පිටිගොඩ සුමනසාර ස්ථවිරයන් වහන්සේ යැ යන ධර්‍මවිනයධර පූජ්‍ය පණ්ඩිත මහතෙරවරුන්ගේ අනල්ප කෞශල්‍යය හේතු කොට ගෙන සංශොධන කටයුතු මැනැවින් සිදුකළ හැකි විය. ලෙඛකාධිකාරී නායකස්ථවිරයන් වහන්සේගේ සාහාය්‍යය ද මෙහි ලා සඳහන් කළ යුතුය.
තවද ශ්‍රී ලංකාරාජ්‍යයේ අග්‍රාමාත්‍යවර සිරිමාවෝ බණ්ඩාරනායක උත්තමාව ත්‍රිපිටක මුද්‍රණය සඳහා දක්වන බලවත් ප්‍රසාදය හා අනුග්‍රහය ද, ටී. බී. තෙන්නකෝන් ගරු සංස්කෘතික ඇමතිතුමා මෙය ඉක්මනින් නිමහම කරවාලීමට ගන්නා උත්සාහය ද, සංස්කෘතික අමාත්‍යාංශයේ ලේකම් කේ. එච්. ඇම්. සුමතිපාල මහතාණන්, සහකාර අධ්‍යක්‍ෂ සෝමපාල ජයවර්ධන මහතාණන් හා සාහිත්‍ය සංවර්ධන නිලධාරි කේ. ජී. අමරදාස මහතාණන් ප්‍රමුඛ සංස්කෘතික නිලධාරින් මේ සඳහා දක්වන උද්‍යොගය ප්‍රශංසනීය වෙයි.
දෙහිවල තිසර මුද්‍රණාලයෙහි අධිකාරී ඇස්. ඩී. සපරමාදු මහතාණන් ප්‍රමුඛ කාර්ය්‍යමණ්ඩලය දෙමසක් පමණ කෙටි කාලයකින් මුද්‍රණය නිමහම කිරීම ද පැසසිය යුතුය. එ මතු ද, ත්‍රිපිටක කාර්ය්‍යාලය පිහිටි කොළඹ මහානායක චාරිකාරාමයේ භාරකාර ඇම්. ඒ. ආර්. සමරසිංහ මහතාණන් ත්‍රිපිටක මණ්ඩලයට දිවා රෑයෙහි ලැබෙන සාහාය්‍යය ද අනුස්මරණීය වේ.
දෙවියන් සහිත ලොවට වැඩ සිදුකරන අතිපරිශුද්ධ පර්‍ය්‍යාප්තිධර්‍මය ව්‍යාප්ත කරවාලීමෙහි යත්න දරන මෙ හැම සුධීහු ධර්‍මදානමය කුශලබලයෙන් සුඛභාගී වෙත්වයි ආශංසනය කරම්හ.
මෙසඟට: ශාසනොපකාරී,
ලබුගම ලංකානන්ද ස්ථවිර
ත්‍රිපිටක මණ්ඩලයේ ප්‍රධාන සම්පාදක.
1976 අගෝස්තු මස 15 වැනි දින
ත්‍රිපිටක කාර්යාලය,
මහානායක චාරිකාරාමය,
115, විජේරාම මාවත,
කොළඹ-7
සංඥාපනය
යො පබ්බජී ජාතිසතානි පඤ්ච පහාය කාමානි මනොරමානි, තං වීතරාගං සුසමාහිතින්ද්‍රියං පරිනිබ්බුතං වන්දථ සාරිපුත්තං.
ඛන්තීබලො පඨවිසමො න කුප්පති න චා’පි චිත්තස්ස වසෙන වත්තති, අනුකම්පකො කාරුණිකො ච නිබ්බුතො පරිනිබ්බුතං වන්දථ සාරිපුත්තං.
චණ්ඩාළපුත්තො යථා නගරං පවිට්ඨො නීචමනො චරති කපාලහත්ථො, තථා අයං විචරති සාරිපුත්තො පරිනිබ්බුතං වන්දථ සාරිපුත්තං.
උසභො යථා ඡින්නවිසාණකො අහෙඨයන්තො චරති පුරන්තරෙ, තථා අයං විචරති සාරිපුත්තො පරිනිබ්බුතං වන්දථ සාරිපුත්තං.
යනාදී පන්සියක් ගාථාවෙන් තථාගත සර්‍වඥ සම්බුදුරදුන් විසින් පරිනිර්‍වාණාවස්ථාවෙහි ලා සංවේග විෂය කළ ගුණරාශි ඇති සව්පෙරුම් කෙළපැමිණි අගසව් සැරියුත් මහරහතුන් වහන්සේ බුදුරජාණන් වහන්සේ ගේ ත්‍රිවිධ ශාසනය පස්වාදහසක් නිරුපද්‍රව ව පවත්නා සඳහා ධර්‍ම චක්‍රය විභාග කරමින් ධර්‍මාර්ත්‍ථ හෙයින් අතිගම්භීර වූ, මහාසද්ධර්‍මනගරාවස්ථාවෙහි සූත්‍රනිපාතයෙහි ලා සංඛිත ව පවත්නා, ‘අට්ඨකවග්ගිය’ සූත්‍ර සොළොස යැ, ‘පාරායන වග්ගිය’ සූත්‍ර සොළොස යැ, ‘ඛග්ගවිසාණ’ සූත්‍ර යැ යන තෙතිස් සූත්‍ර ධර්‍මයන් උද්දෙස කොට පදානුපදික ව නිද්දෙස විසින් විභාග කළහ. ඛුද්දකමහානිකාය (ක්‍ෂුද්‍රග්‍රන්ථයෙහි) යෙහි බැසගෙන සිටුනා “ඛුද්දකපාඨ, ධම්මපද, උදාන, ඉතිවුත්තක, සුත්තනිපාත, විමානවත්‍ථු, පෙතවත්‍ථු, ථෙරගාථා, ථෙරිගාථා, ජාතක, නිද්දෙස, පටිසම්භිදා, අපදාන, බුද්ධවංශ, චරියාපිටක’’ යන පසළොස් ග්‍රන්ථයන් කෙරෙහි එකොළොස් වැන්න අග්‍රශ්‍රාවක දේශිත වූ මේ ‘නිද්දෙසපාළි’ ය යි. නිද්දෙසපාළිය ගැන අපගේ සංඥාපනය බුද්ධජයන්ති ත්‍රිපිටක ග්‍රන්ථමාලාවෙහි මහා නිද්දෙසපාළියෙහි ලා පළ කරනලද්දේය. අර්ත්‍ථින් එයින් බලා දන්නේ මැනැවි.
සැරියුත් මහරහතුන් වහන්සේ ශ්‍රාවක පාරමී ඥානයෙහි සිට දේශනා කොටවදාළ එක් මැ නිද්දෙසපාළිය ඈත අතීතයෙහි සිට සියම් බුරුම ආදි රටවල ස්ථවිරවාදීන් විසින්දු එය අනුගමනය කිරීමෙන් දෝ හෝ හෙළදිවැ මහතෙරවරුන් විසින්දු ‘මහානිද්දෙස චුල්ලනිද්දෙස’ යි ග්‍රන්ථ දෙකක් කොට වහරනු දක්නට ලැබේ. එහෙත් යට දැක්වූ ඛුද්දකනිකාය පර්‍ය්‍යාපන්න ග්‍රන්ථසංග්‍රහයෙහි නිද්දෙසය එකෙක් මැය. සද්ධම්මජොතිකා නම් නිද්දෙස අටුවායෙහි ද උපසෙන මහතෙරණුවෝ අටුවා මුඛබන්ධනයෙහි -
‘‘සාරිපුත්තො මහාපඤ්ඤො - සංඝකප්පො ජිනොරසො ධම්මචක්කං විභාජෙත්වා - මහානිද්දෙස මබ්‍රවී’’ යි ද,
‘‘ආරභිස්සං සමාසෙන - මහානිද්දෙසවණ්ණනං’’ යි ද දැක්වූහ.
මෙහි එන ‘මහානිද්දෙස’ ශබ්දය බලා අවිශෙෂඥ වූ කිසි කෙනකුන් ‘‘මහානිද්දෙස” ඇත. චුල්ලනිද්දෙසයකුදු වුව මැනැවැ’යි හැඟැ අට්ඨක-වග්ගනිද්දෙස මහානිද්දෙස යි ද පාරායනවග්ග ඛග්ගවිසාණසුත්ත නිද්දෙස ‘චුල්ලනිද්දෙස’යි ද දෙබෙද කළයේ යැයි දතහැකි ය. එහෙත් අටුවා ඇදුරු උපසෙන තෙරණුවන් සව්පැරුම් කෙළ පැමිණි අගසව් සැරියුත් මහරහතුන්වහන්සේ කාමසුත්තාදී යථොක්ත තෙතිස් සූත්‍රයනට නිරවශෙෂ අර්ත්‍ථ විස්තාරය වදාළ නිද්දෙසපාළිය මුළුල්ල මහාපඨවි මහාසමුද්‍ර සෙයින් ‘මහන්ත නිද්දෙස’ නුයි ‘මහානිද්දෙස’ නමැයි ගන්නා ලද්දේය.
එහෙයින් අටුවා නිගමනයෙහි දී ද –
‘‘යො සො සුගතපුත්තානං - අධිපති භූතෙන භූතහිතරතිනා ථෙරෙන ධීරගුණවතා - සුවිහිතො මහානිද්දෙසො’’යි
සඳහන් කරන ලද්දේය. මෙසේ තිබියදී බුද්ධජයන්ති ත්‍රිපිටක මණ්ඩලයේ ආරම්භක සංස්කාරකයන් විසින්දු නූතන පරිකල්පනය අනුව නිද්දෙසපාළි ද්විතීය භාගය ‘චුල්ලනිද්දෙස’යි මැ ව්‍යවහාර කරන ලද්දේ ය.
මෙතෙක් ලක්දිවැ මුද්‍රණද්වාරයෙන් ප්‍රකාශයට නො පැමිණි නිද්දෙස පාළියෙහි ද්විතීය භාගය වූ චුල්ලනිද්දෙසය ද පාඨශොධන පූර්වක වැ සිංහල භාෂාවෙන් පරිවර්තනය කිරීමේ දුෂ්කර කාර්ය්යය ද ත්‍රිපිටක සංස්කාරක මණ්ඩලය විසින් අප වෙත පවරන ලද්දේ ය. අනේක කාර්‍ය්‍යභාරයෙන් මිරිකෙමින් සිටියදී මැ ඒ විධානය අනුව අප බුරුමරට ඡට්ඨසංගීති සංස්කරණය ද, සියම්රට ශ්‍යාමාක්‍ෂරයෙන් මුද්‍රිත ග්‍රන්ථය ද, එංගලන්තයේ පාළිපොත් සමාගම මගින් මුද්‍රිත ග්‍රන්ථය ද, බෞද්ධමණ්ඩලයෙන් චුල්ලනිද්දෙස පරිවර්තනය භාරගෙන සිටි පොතුහැර වඤ්ඤසෙල පරිවෙණාධිපති පණ්ඩිත අහුංගොඩ සීලානන්ද නායකස්ථවිරයන් වහන්සේ පැරණි පුස්කොළ පිටපත් බොහෝ ගණනක පාඨාන්තර සහිත කොට සපයාතුබූ අත්පිටපත ද ඇසුරු කෙරෙමින් මේ සංස්කරණය මහත් පරිශ්‍රමයෙන් සිදුකරන ලද්දේය. සිංහලයෙන් පරිවර්තන කිරීමේ දී ධර්‍මශාස්ත්‍ර විෂයෙහි බැසගත් බුද්ධිමහිම ඇති රාජකීය පණ්ඩිත කරහම්පිටිගොඩ සුමනසාර ස්ථවිරයන් වහන්සේ අත්‍යාන්තයෙන් උපස්තම්භ වූහ.
දෙදහස් පන්සියයේ බුද්ධජයන්ති උත්සවය අනුස්මරණ කරනු සඳහා ශ්‍රී ලංකා බෞද්ධමණ්ඩලය විසින් ආරබ්ධ වූ සත්කාර්යයන් අතුරෙහි ප්‍රමුඛස්ථානයෙහි සිටිනුයේ ත්‍රිපිටක සිංහලානුවාදය හා මුද්‍රණයයි කියනු නිවරද වේ. බෞද්ධමණ්ඩලයේ මෙහෙයීම නොවන්නට චුල්ලනිද්දෙස වැනි ග්‍රන්ථ සිංහලයෙන් පරිවර්තන වෙති සිතනු පවා උගහට යැ. පටිසම්භිදාමග්ග චුල්ලනිද්දෙස පෙළ පවා මුද්‍රණය කරවා ලියවාගත හැකි වූයේ බෞද්ධමණ්ඩලයේ සංකල්පන හේතුවෙනි. ශාසනස්ථාපනයට ඉවහල් වූ ත්‍රිපිටක සංස්කරණ පරිවර්තන මුද්‍රණාදියෙහි නියුක්ත සියලු සුධීහු ද විශේෂයෙන් අප මෙ සත්කර්මයෙහි මෙහෙයවා ලූ දෙමටගොඩ පධානඝර විහාරාධිපති ව වැඩ විසූ දර්ශනවිශාරද පරවාහැර සිරි වජිරඤාණාභිධාන කොළඹ නවකෝරළේ ප්‍රධාන සංඝනායක හිමියාණන් වහන්සේ ද සුඛභාගී වෙත්වායි ආශංසනය කරම්හ.
ලබුගම ලංකානන්ද ස්ථවිර
2519 / 1976 අගෝස්තු මස 12 වැනි දින
මොල්ලිගොඩ ප්‍රවචනොදය පරිවෙන.