35 මහා නිද්දේස පාළි - සූත්‍ර.pdf
- කතෘ :
- ලබුගම ලංකානන්ද හිමි
- ප්‍රකාශිත වර්ෂය :
- 2006
- මුද්‍රිත වර්ෂය :
- 2006
- පිටු ගණන :
- 783
- බාගත කිරීම් ගණන :
- 2,953
- වෙබ් අඩවියට එක් කළ දිනය :
- 2015-10-18
- ගොනුවේ ප්‍රමාණය :
- 26 MB
පොතේ පිටු කිහිපයක ඡායාරූප පහතින් බලන්න.
මෙම ග්‍රන්ථය බුද්ධජයන්ති ත්‍රිපිටක ග්‍රන්ථමාලාවේ 33 වන වෙළුම (සූත්‍රාන්ත පිටකයේ 27 වන ග්‍රන්ථය) වන මහානිද්දෙසපාළි (ඛුද්දකනිකාය එකාදශභාගය) කෘතියයි. බුදුරජාණන් වහන්සේ දේශනා කළ සූත්‍ර නිපාතයේ අට්ඨක වර්ගයේ සූත්‍රයන්හි අර්ථ සහ ව්‍යඤ්ජන විග්‍රහ කරමින් අග්‍රශ්‍රාවක ශාරීපුත්‍ර මහ රහතන් වහන්සේ විසින් දේශනා කරන ලද විස්තරාත්මක ධර්ම දේශනා මෙහි අන්තර්ගත වේ.
මෙහි සිංහල පරිවර්තනය සිදු කර ඇත්තේ මොල්ලිගොඩ ප්‍රවචනෝදය පිරිවෙන්හි උපප්‍රධානාචාර්ය පණ්ඩිත ලබුගම ලංකානන්ද ස්ථවිරයන් වහන්සේ විසිනි. පරිවර්තන සෝධ්‍ය පත්‍ර පරීක්ෂාව සඳහා පණ්ඩිත ගලගම ධම්මික හිමි සහ පණ්ඩිත කරගම්පිටිගොඩ සුමනසාර හිමි සහාය වී ඇති අතර, අවසාන සංස්කරණය පරවාහැර වජිරඤාණ නාහිමියන්ගේ ප්‍රධානත්වයෙන් යුත් ත්‍රිපිටක සංස්කාරක මණ්ඩලය මඟින් සිදු කර ඇත.
මූලික පාලි පෙළ සහ ඊට අදාළ සිංහල පරිවර්තනයට අමතරව ග්‍රන්ථයෙහි පහත කොටස් ඇතුළත් වේ:
- සංස්කාරක නිවේදනය හා සංඥාපනය
- සංකේත නිරූපණය හා පාලි හෝඩිය
- පාලි පෙළ හා සිංහල පරිවර්තනය
- ගාථාපද සූචිය සහ නිද්දෙසපද සූචිය
සංස්කාරක නිවේදනය
ත්‍රිපිටකපාළියෙහි සූත්‍රාන්තපිටකාන්තර්ගත ඛුද්දකනිකායෙහි එකාදශභාගය වශයෙන් සිංහල පරිවර්තනය සමග සකස් වූ මෙ මහානිද්දෙසපාළිය බුද්ධජයන්ති ත්‍රිපිටක ග්‍රන්ථමාලාවෙහි සංඛ්‍යා වශයෙන් තෙතිස් වන - සූත්‍රාන්තපිටක ග්‍රන්ථසංඛ්‍යාවෙන් සත්විසිවන ග්‍රන්ථය වේ.
තථාගතප්‍රවේදිත ධර්මාවබෝධනයෙහි කෝටිප්‍රාප්ත ප්‍රථම අග්‍රශ්‍රාවක වූ ශාරීපුත්‍ර මහාක්‍ෂීණාස්‍රවයන් වහන්සේ විසින් ලෞකික - ලෝකොත්තරසම්පත් සිද්ධිකර අර්ථපද - ව්‍යඤ්ජනපද සමායෝගයෙන් සමන්වාගත කොට නිදෙසූ ධර්මප්‍රභාවත්භාවයත් ගණයෙන් සංගීතිකාරක මහ රහතුන් විසින් සම්භාවිත වූ මහානිද්දෙසපාළිය ත්‍රිපිටකබුද්ධවචන විෂයයෙහි ප්‍රණීත වූ මහා ශබ්දකෝෂයක් වැනිය.
තථාගතෝද්දිෂ්ට එකපදාර්ථයක් මුත් ප්‍රකාශ කිරීමෙහි දී තථ, අවිතථ, අනඤ්ඤථ වශයෙන් එහි බැඳී ඇති යථාර්ථය ම ප්‍රකට කර ලීම සඳහා තථාගතයන් වහන්සේ විසින් ම අනුශිෂ්ට වූ ආනන්තරපදසමුදය දේශනා ඥානානුකූලවන සේ එක්රැස් කොට යොදා ශාස්තෘකල්ප මහාප්‍රාඥයන් වහන්සේ විසින් නිර්දිෂ්ට වූ මහානිද්දෙසපාළිය සිංහලභාෂාවෙන් ව්‍යාඛ්‍යාන (සන්න) කිරීම ධර්මවිනය - ශබ්දශාස්ත්‍ර විෂයයෙහි නිපුණ වූ අලෞකික ප්‍රාඥයෙකු විසින් ම කටයුතු බව මෙහි අමුතුව ලා කිය යුතු නො වේ.
ලංකා බෞද්ධමණ්ඩලයෙහි අයැදුම් පිළිගෙන මෙ දුෂ්කර කෘත්‍යයෙහි ප්‍රතිමත් ව උද්‍යුක්ත වූ ලබුගම ලංකානන්ද, මොල්ලිගොඩ ප්‍රවචනෝදය පිරිවෙන්හි උපප්‍රධානාචාර්ය්‍ය පණ්ඩිත ස්ථවිරයන් වහන්සේ නෛසර්ගික කාර්යක්ෂම ඥානශක්තිය මෙහෙයවමින් ආගතභාරය මැනැවින් උසුලා තිබෙන බව ග්‍රන්ථය කියවනු වන්හට ම පසක් වනු ඇත.
සිංහල, පාලි, සංස්කෘත භාෂාසාහිත්‍යයෙහි ද ධර්මවිනයපර්යාප්තියෙහි ද හසල බුද්ධිමහිමයෙන් ස්වකීය වූ ප්‍රතිභාඥාන ඇති ගුරුගුරුවාදී වියතුන් යුත් නිකායමාන නිරවද්‍යකාර පණ්ඩිත ස්ථවිරයන් වහන්සේ විසින් මේ මහානිද්දෙසව්‍යාඛ්‍යානයෙහි දී පාළිවශයෙන් සුබෝධපදයනට ගූඪාර්ථකථනය, දුර්බෝධපදයනට සරලාර්ථකථනය, අති සුගම තැන් තැන්හි අතිරෙකාර්ථ දැක්වීම ආදි - පුරාතනාචාර්ය්‍ය වරයන්ගේ ව්‍යාඛ්‍යානස්වරූප අනුගමනයෙන් පාලිපදව නිරූපණය පමණක් නොව ආධුනිකානුග්‍රහය ද සිංහලසාහිත්‍ය පෝෂණය ද අපේක්ෂා කොට ඇති බව පෙනේ.
ග්‍රන්ථය හඳුන්වමින් සංඥාපනස්වරූපයෙන් උන්වහන්සේ විසින් ලියූ බුද්ධෝද්ඝාතයෙන් යුක්තාශය විදග්ධ ලලිත තදනුගත පර්යේෂණයන් පිණිස දක්වා ඇති උක්තාශයයන්, ඇතැම් විචාරකයන් විසින් මහානිද්දෙසපාළිය පිළිබඳ කොට පහළ කරණ එල්බුමිත කරුණු සහිතව නිරාකරණය කෙරෙමින් ග්‍රන්ථගෞරවය යථා ස්ථානයට පමුණුවා තිබෙන සැටින් පැහැසිය යුතු ම ය.
පරිවර්තන කර්තෲන් වහන්සේ විසින් ම සැපයූ ගාථාපදසූචි ආදියෙන් යුත් මේ ග්‍රන්ථයෙහි සෝධ්‍යපත්‍ර බැලීමෙහි පණ්ඩිත ගලගම ධම්මික ස්ථවිරයන් වහන්සේ ද, පණ්ඩිත කරගම්පිටිගොඩ සුමනසාර ස්ථවිරයන් වහන්සේ ද සහාය වූහ.
අපගේ අවසාන සංස්කරණයෙන් මුද්‍රණයට පැමිණි මෙ මහර්ඝ ධර්මග්‍රන්ථය සම්පාදනයෙන් ස්වායත්තකාර්ය්‍ය කාරණයෙහි යෙදුනු ත්‍රිපිටකසංස්කාරක මණ්ඩලයෙහි ස්ථවිරයන් වහන්සේ ද ලංකාරජයේ සාංස්කෘතික කාර්යාංශයෙහි අධිකාරීහු ද මහාබෝධි මුද්‍රණාලයෙහි පාලනාධිකාරීන් හා ආයුක්ත පිරිස ද ධර්මදානමය පුණ්‍යමහිමයෙන් සුඛභාගී වෙත්වයි ආශංසනය කරම්හ.
පරවාහැර වජිරඤාණ ස්ථවිර
ත්‍රිපිටක පරිවර්තන කාරකසභාවෙහි ද
සංස්කාරකමණ්ඩලයෙහි ද
සභාපති.
ත්‍රිපිටක කාර්යාලය, ධර්මදූතාශ්‍රම විද්‍යාලය,
දෙමටගොඩ, කොළඹ 9.
සංඥාපනය
යො පබ්බජි ජාතිසතානි පඤ්ච පහාය කාමානි මනොරමානි, තං වීතරාගං සුසමාහිතින්‍ද්‍රියං පරිනිබ්බුතං වන්දථ සාරිපුත්තං.
මහානිද්දෙස:
අප බුදුන් බුදු වැ ධර්මසක් පවත්වා පිළිවෙළින් ඉසිපතන වේළුවන ජේතවන ආදි විහාරයෙහි වෙසෙමින් උත්තම පාත්‍රයන්ගේ වශයෙන් වදාළ ගම්භීර වූ අර්ථ - ව්‍යඤ්ජන සම්පන්න සූත්‍රපදයන්ගේ උත්තානීකරණය සඳහා සර්වපාරමීඥාන කෙළ පැමිණි ධර්මසේනාපති සැරියුත් මහරහතුන් වහන්සේ විසින් දේශනා කල ධර්මවිභාගය නිද්දෙස නම් විය.
‘‘පාරො විසිට්ඨො නිද්දෙසො තන්‍නාමවිසෙසිතො වා’’ යි එ නිද්දෙස නම් කිමැයි දක්වති: බ්‍යඤ්ජනපාඨ අත්ථපාඨ යයි දෙ ලෙසින් සිටි පාඨ විස්තර විසින් එලවා දක්වනු නිද්දෙස නම්. නිද්දෙස සඟහ කල ග්‍රන්ථය ද උපචාර විසින් ‘නිද්දෙස’ නම් වී.
එහි බ්‍යඤ්ජනපාඨ ‘අක්ඛර - පද - බ්‍යඤ්ජන - ආකාර - නිරුක්ති - නිද්දෙස’ යැයි සයෙකි. අත්ථපාඨ ‘සංඛාසන - පකාසන - විවරණ - විභජන - උත්තානීකරණ - පඤ්ඤත්ති’ යැයි සයෙක් වේ. ...