31 ථෙරගාථා පාළි ථෙරීගාථා පාළි - සූත්‍ර.pdf
- ප්‍රකාශිත වර්ෂය :
- 2006
- මුද්‍රිත වර්ෂය :
- 2006
- පිටු ගණන :
- 488
- බාගත කිරීම් ගණන :
- 3,510
- වෙබ් අඩවියට එක් කළ දිනය :
- 2015-10-18
- ගොනුවේ ප්‍රමාණය :
- 11 MB
පොතේ පිටු කිහිපයක ඡායාරූප පහතින් බලන්න.
ථෙරගාථාපාලි යනු ත්‍රිපිටකයේ සූත්‍ර පිටකයට අයත් ඛුද්දක නිකායේ අටවැනි ග්‍රන්ථයයි. බුද්ධජයන්ති ත්‍රිපිටකග්‍රන්ථමාලාවේ 28-29 වන කාණ්ඩය හා ඛුද්දකනිකාය පඤ්චම භාගය වශයෙන් මෙය ප්‍රකාශයට පත් කර ඇත. මෙම ග්‍රන්ථයෙහි බුදුරජාණන් වහන්සේගේ ශ්‍රාවක වූ මහ රහතන් වහන්සේලා විසින් විවිධ අවස්ථාවන්හිදී ප්‍රකාශ කරන ලද උදාන සහ අත්දැකීම් අඩංගු ගාථාවන් පාලි පෙළ සහ සිංහල පරිවර්තනය සහිතව සම්පාදනය කර තිබේ.
මෙහි සිංහල පරිවර්තනය ලංකා බෞද්ධ මණ්ඩලයේ ආරාධනයෙන් මාකඩවර විහාරාධිවාසි පණ්ඩිත කරහම්පිටිගොඩ සුමනසාර ස්ථවිරයන් වහන්සේ විසින් සිදු කරන ලද අතර, ලබුගම ලංකානන්ද මහානායක ස්ථවිරයන් වහන්සේ ප්‍රමුඛ ත්‍රිපිටක සංස්කාරක මණ්ඩලය විසින් සංස්කරණය කොට ඇත. ඒකක නිපාතයේ සිට සත්තති නිපාතය දක්වා වූ නිපාත විසිඑකකින් සමන්විත මෙම ග්‍රන්ථයෙහි තෙරවරුන් 264 නමකගේ ගාථා 1,211 ක් පමණ අන්තර්ගත වේ.
පොත අවසානයේ ගාථාදිපාදානුක්කමණිකා, සඤ්ඤානාමානුක්කමණිකා සහ විසෙසපදානුක්කමණිකා ආදී අනුක්‍රමණිකා සූචීන් ද ඇතුළත් කොට තිබේ.
සංස්කාරක නිවේදනය
ත්‍රිපිටක පාළියෙහි සූත්‍රාන්තපිටකයට අයත් කුදුගත් මහසඟියේ ක්ෂුද්‍ර ග්‍රන්ථයන් කෙරෙහි අටවැන්න වූ ථෙරගාථා පාළිය බුද්ධජයන්ති ත්‍රිපිටක ග්‍රන්ථමාලාවෙහි අටවිසි (28) වැන්නට පැමිණෙයි. ලංකා බෞද්ධ මණ්ඩලය මගින් ප්‍රාරබ්ධ වූ සත්කාර්‍ය්‍යයන් අතුරෙහි අතිශයින් ප්‍රශංසනීය වූත් දුර්ඝට වූත් කර්තව්‍යය වූයේ ත්‍රිපිටක ග්‍රන්ථ සිය බසින් අරවා ප්‍රකාශ කිරීම ය. ලංකා බෞද්ධ මණ්ඩලයේ ඇරයුම් පරිදි ථෙරගාථා පාළිය ද පරිවර්තිත වැ තුබූ නමුත් එය විධිමත් පරිවර්තනයක් නො වූයෙන් ත්‍රිපිටක සංස්කාරක මණ්ඩලය විසින් එය සපුරා පරිවර්තන කරන ලෙස පණ්ඩිත කරහම්පිටිගොඩ සුමනසාර ස්ථවිරයන් වහන්සේට පවරාදෙන ලද්දේ ය.
බොහෝ සෙයින් බුදුරදුන්ගේ සම්මුඛශ්‍රාවක වූ මහ රහතුන් විසින් තමන් තමන් වහන්සේගේ අධිගත ගුණ ප්‍රකාශ කිරීම් වශයෙන් ද උදාන වශයෙන් ද ඒ ඒ අවස්ථාවෙහි ප්‍රකාශ කළ ගාථා යථා විධින් ථෙරගාථාවෙහි සාංගෘහිත වැ ඇත. බුද්ධකාලීන මගධදේශීය ව්‍යවහාරය ද බැසගෙන සිටි ධර්මයෙහි විනිර්මුද්‍ර ගැඹුරු වූ ථෙරගාථා පරිවර්තනය සුකර නො වේ.
මොල්ලිගොඩ ප්‍රවචනෝදය පිරිවෙන්හි ආචාර්ය්‍යවරයකු ව සිටි සිංහල පාලි සංස්කෘත හින්දි ද්‍රාවිඩාදි භාෂාන්තරයෙහි ද ව්‍යාකරණ තර්කන්‍යාය ඉතිහාස පුරාවිද්‍යාදි ශාස්ත්‍රාන්තරයෙහි ද, ධර්ම විනය විෂයෙහි ද අක්‍ෂ්‍යුපලක්ෂණ ඇති කරහම්පිටිගොඩ සුමනසාර පණ්ඩිත ස්ථවිරයන් වහන්සේ පරිවර්තනකාර්ය්‍යය නිසිසේ සිදු කළ අතර ත්‍රිපිටක ග්‍රන්ථයන් පිළිබඳ වැ විවිධ දුර්මත පහළ කරනුවනට පිළිතුරු සපයන සාරගර්භ සංඥාපනය ද ග්‍රන්ථය පරිශීලනය කරනුවන්ගේ පහසුව සඳහා වෙන වෙන මැ ගාථාදිපාද සංඥානාම හා විශේෂ පදයන්ගේ අනුක්‍රමණිකා සූචි ද මහත් පරිශ්‍රමයෙන් සපයනලද වෙයි.
මේ කාර්ය්‍යය සපුරාලීම සඳහා ත්‍රිපිටක සම්පාදක මණ්ඩලයේ උපදේශක එකාබද්ධ අමරපුරමහානිකායේ සභාපති බලන්ගොඩ මහානායක ස්ථවිර පාදයන් වහන්සේ ද ත්‍රිපිටකසම්පාදක මණ්ඩලයේ සභාපති අහංගම විද්‍යාවංශ පරිවේණාධිපති දක්ෂිණලංකාවේ ප්‍රධාන සංඝනායක ස්ථවිර පාදයන් වහන්සේ ද සහාය වූහ.
ශාසනාභිවෘද්ධියෙහි හේතු වූ මේ මැ කාර්ය්‍යයට පුරෝගාමී ව සිටි ලංකාබෞද්ධමණ්ඩලයේ භවත්හු ද මුද්‍රණයෙන් ප්‍රචාරය කිරීමෙහි උත්සුක වූ සංස්කෘතික අමාත්‍යාංශයේ සුධීහු ද මුද්‍රණශිල්පීහු ද මෙයින් ජනිත කුශලඵලයෙන් සුඛිත වෙත්වායි ආශංසනය කරම්හ.
ලබුගම ලංකානන්ද ස්ථවිර
ත්‍රිපිටක සංස්කාරක මණ්ඩලයේ
ප්‍රධාන සම්පාදක.
1972 ජනවාරි 22 වැනි දින
ත්‍රිපිටක කාර්යාලයේ දී ය.
කොළඹ මහා නායක චාරිකාරාමය.
සංඥාපනය
ශ්‍රී සුගත තථාගත සම්මා සම්බුදුරදුන් විසින් කලියුගවර්ෂ 2513 වැන්නෙහි ඇසළ පුරපසළොස්වක් දවස් දඹදිව බරණැස ඉසිපතන නම් වූ මිගදායෙහි දී කොණ්ඩඤ්ඤ තෙරණුවන් ප්‍රමුඛ පස්වග මහණුනට දම්සක් පැවැතුම් සූත්‍රයත් දෙසා කොණ්ඩඤ්ඤ තෙරණුවන් සෝවන් පෙළෙහි පිහිටුවා නික්මිනිතියි අවපෑළවිය දවස් ‘භද්දිය’ තෙරණුවන් ද දියවක් දවස් ‘වප්ප’ තෙරණුවන් ද තියවක් දවස් ‘මහානාම’ තෙරණුවන් ද ජලවක් දවස් ‘අස්සජී’ තෙරණුවන් ද සෝවන් පෙළෙහි පිහිටුවා විසේනි දවස් අනත්තලක්ඛණ සූත්‍ර දේශනායෙන් පස් දෙනා වහන්සේ මැ රහත් පෙළෙහි පිහිටුවා, එකීභික්ඛුභාවයෙන් පැවිදි උපසපත් කිරීමෙන් පිහිටුවා වදාළ සම්බුදු සසුන් හෙබ වූ ‘සුභූති’ ආදි දෙසිය සවිස්සක් පමණ වූ කෘත්‍යකෘත්‍ය ස්ථවිරවරෙණ්‍යයන් විසින් නිරාමිෂ ප්‍රීති සෞමනස්‍යයෙන් උදානාදි විසින් භාෂිත වූ ගම්භීරාවැති ගුණස්තුති ප්‍රතිසංයුක්ත ආශ්චර්‍ය්‍ය ප්‍රකාශක ගාථා ථෙරගාථා නම් වෙයි.
එහි ඇතැම් ගාථා ඒ ඒ තෙරවරුන් විසින් තමන් තමන් අධිගම කළ මගපලසුව ප්‍රත්‍යවෙක්ෂා කිරීමෙන් උපන් ප්‍රීතිසෞමනස්‍යයෙන් කියු උදාන වශයෙනුදු ඇතැම් ගාථා තමන් තමන්ගේ සමාපත්තිවිහාර ප්‍රත්‍යවෙක්ෂා කිරීම් වශයෙනුදු ඇතැම් ගාථා පැවිදිගණ ප්‍රත්‍යවෙක්ෂා කිරීම් වශයෙනුදු ඇතැම් ගාථා පිරිනිවන් සමයෙහි ශාසනයාගේ නෛය්‍යානිකභාවය ප්‍රකාශ කිරීම් වශයෙනුදු එලවා ඇත. එයිදු ස්වයම්භූඥානයෙන් ප්‍රකාශිත ගාථා ද බුදුරදුන් වෙත අසා උගත් ගාථා ද ඇත. එ හැම ගාථා එක්රැස් කොට සංගීති කාලයෙහි ‘මහාකාශ්‍යප’ මහ රහන් තෙරණුවන් ප්‍රමුඛ සංගීතිකාරක ක්‍ෂීණාස්‍රව මහතෙරවරුන් විසින් සූත්‍රාදි නවවිධ ශාස්තෘශාසනයෙහි ගාථාංගයෙහි ලා සංගෘහිත යැ. ග්‍රහණධාරණයෙහි පහසුව තකා නිපාත වර්ග වශයෙන් විභාග කොට උද්දානසංග්‍රහ ද කරනලද්දේ යැ. තුන්පිටකයෙහි දක්නාලැබෙන නානාවිධ සංග්‍රහ ප්‍රභේදයෝ සංගීතිකාරක තෙරවරුන් විසින් මැ කරනලද වෙති. එය කියත් විනයට්ඨකථායෙහි. “බුද්ධවචනං සංගායන්තෙන මහාකස්සපප්පමුඛෙන වසිගණෙන අයං ධම්මො, අයං විනයො, ඉදං පඨමබුද්ධවචනං, ඉදං මජ්ඣිමබුද්ධවචනං, ඉදං පච්ඡිමබුද්ධවචනං, ඉදං විනයපිටකං, ඉදං සුත්තන්තපිටකං, ඉදං අභිධම්මපිටකං. අයං දීඝනිකායො -පෙ- අයං ඛුද්දකනිකායො ඉමානි සුත්තාදීනි නවඞ්ගානි, ඉමානි චතුරාසීති ධම්මක්ඛන්ධසහස්සානීති ඉමං පභෙදං වවත්ථපෙත්වා සංගීතං. න කෙවලං එත්තකමෙව අඤ්ඤම්පි උද්දානසංගහ, වග්ගසංගහ, පෙය්‍යාලසංගහ, එකකනිපාත දුකනිපාත ආදි නිපාතසංගහ, සංයුත්තසංගහ, පණ්ණාසකසංගහාදිමනෙකවිධං තීසු පිටකෙසු සන්දිස්සමානං සංගහප්පභෙදං වවත්ථපෙත්වා එවං සත්තහි මාසෙහි සංගීතා”යි.
ථෙරගාථා නිපාත විසින් එකක නිපාතය පටන් චුද්දස නිපාතය හිමි කොටැ එකිනෙක වැඩි ගිය නිපාත තුදුසෙක් ද ඉක්බිති සොළස නිපාත යැ වීසතිනිපාත යැ තිංසතිනිපාත යැ චත්තාලීසතිනිපාත යැ පඤ්ඤාසනිපාත යැ සට්ඨිනිපාත යැ සත්තතිනිපාත යැ යන සත් නිපාතයෙක්දැ යි එක්විසි නිපාතයෙකින් සමන්විත වෙයි.
එකකනිපාතයෙහි වර්ග දොළොසෙක, එක් වර්ගයෙකැ තෙරවරු දසදෙනා බැගින් දොළොස්වගෙහි තෙරවරු එක්සියවිසි දෙනෙක, ගාථා එක්සිය විස්සෙකි. දුකනිපාතයෙහි වර්ග පසෙකි, තෙරහු එකුන්පනසෙක. ගාථා අටානූවෙකි. තිකනිපාතයෙහි තෙරහු සොළොස් දෙනෙක, ගාථා අටසාලිසෙකි. චතුක්කනිපාතයෙහි තෙරහු තෙළෙස් දෙනෙක, ගාථා දෙපනසෙකි.* පඤ්චකනිපාතයෙහි තෙරහු දොළොස් දෙනෙක, ගාථා සැටෙකි. ඡක්කනිපාතයෙහි තෙරහු තුදුස් දෙනෙක, ගාථා සුවාසූවෙකි. සත්තකනිපාතයෙහි තෙරහු පස් දෙනෙක, ගාථා පන්තිසෙකි. අට්ඨකනිපාතයෙහි තෙරහු තිදෙනෙක, ගාථා සූවිස්සෙකි. නවකනිපාතයෙහි එක් තෙර කෙනෙක, ගාථා නවයෙකි. දසකනිපාතයෙහි තෙරහු සත් දෙනෙක, ගාථා සැත්තෑවෙකි. එකාදසනිපාතයෙහි එක් තෙර කෙනෙක, ගාථා එකොළොසෙකි. ද්වාදසනිපාතයෙහි තෙරහු දෙදෙනෙක, ගාථා සූවිස්සෙකි. තෙරසනිපාතයෙහි එක් තෙර කෙනෙක, ගාථා තෙළෙසෙකි. චුද්දස නිපාතයෙහි තෙරහු දෙදෙනෙක, ගාථා අටවිස්සෙකි. සොළසනිපාතයෙහි තෙරහු දෙදෙනෙකි, ගාථා දෙතිසෙකි. වීසතිනිපාතයෙහි තෙරහු දසදෙනෙක, ගාථා දෙසියපන්සාලිසෙකි. තිංසතිනිපාතයෙහි තෙරහු තිදෙනෙක, ගාථා එක්සියපසෙකි. චත්තාලීස නිපාතයෙහි එක් තෙර කෙනෙක, ගාථා දෙසාලිසෙකි. පඤ්ඤාසනිපාතයෙහි එක් තෙර කෙනෙක, ගාථා පනස්පසෙකි. සට්ඨිනිපාතයෙහි එක් තෙර කෙනෙක, ගාථා අටසැටෙකි. සත්තතිනිපාතයෙහි එක් තෙර කෙනෙක, ගාථා එක් සැත්තෑවෙකි. හැම තෙරහු දෙසිය සූසැට දෙනෙක, ගාථා එක්දහස් දෙසිය එකොළොසෙකි.
සමානානාමික තෙරවරු: එක් බඳු නම් ඇති නොයෙක් තෙරවරු ථෙරගාථාවෙහි හමු වෙති. එහි ‘අභිභූත’ නමින් තෙරවරු දෙදෙනෙක: පළමු තෙරණුවෝ සැවැත්නුවර බමුණුකුලයෙකැ වෙදපාරප්‍රාප්ත වැ සිට දෙව්රම් වෙහෙර මහ උලෙළෙහි බුදුනුබාව දැකැ පහන් සිත්හි පැවිදි වැ රහත් වූහ, දෙවැනි තෙරණුවෝ සංකිච්ච තෙරණුවන්ගේ භාගිණෙය්‍යයන්ගේ පුත්‍ර වෙති, ඔබ ද සැවැත්නුවර බමුණුමහසල් කුලයෙකැ උපන් කෙනෙකි. ‘අභය’ නමින් දෙදෙනෙක: පලමු තෙරණුවෝ මගධේශ්වර බිම්බිසාර රජහුගේ පුතණු කෙනෙක, දෙවැනි තෙරණුවෝ සැවැත්නුවර බ්‍රාහ්මණවංශික වෙති. ‘උත්තර’ නමින් හෙරණි කෙනෙක් ද තෙරණු කෙනෙක් ද වෙති. හෙරණෝ රජගහනුවර බමුණු මහසල් කුලයෙකැ උපන්නෝ යැ, තෙරණුවෝ සාකෙත නුවර බමුණු කුලයෙකැ උපන්නෝ යි. ‘උපතිය’ නමින් තෙරවරු තිදෙනෙක: පළමු තෙරණුවෝ සැවැත්නුවර බමුණු කුලයෙකැ උපන් කෙනෙක, දෙවන තෙරණුවෝ මලයරාජකුමාරයෙක, තුන්වන තෙරණුවෝ කිඹුල්වත්පුර ශාක්‍යරාජකුලයෙහි උපන් කෙනෙකි. ‘උසභ’ නමින් තෙරවරු දෙදෙනෙක: එක් කෙනෙක් කොසොල්රටැ ආය්‍ය කුලයෙකින් නික්ම පැවිදි වූහ, අනෙක් තෙරණුවෝ කිඹුල්වත්පුර ශාක්‍යකුලයෙන් නික්ම පැවිදි වූහ. ‘ඛිතක’ නමින් තෙරවරු දෙදෙනෙක: පලමු තෙරණුවෝ සැවැත්නුවර බ්‍රාහ්මණවංශික වෙති, මහමුගලන් තෙරණුවන් කෙරෙහි පහැද පැවිදි වූහ, දෙවැනි තෙරණුවෝ කොසොල්රටැ බමුණු කුලයෙකින් නික්මැ බුදුරදුන් වෙතැ පැවිදි වූහ. ‘ගොතම’ නමින් තෙරවරු දෙදෙනෙක: රජගහනුවර බ්‍රාහ්මණ කුලයෙකින් නික්මැ පැවිදි වූ එක් තෙර කෙනෙක, කිඹුල්වත්හි ශාක්‍යරාජකුලයෙන් නික්මැ පැවිදි වූ එක් තෙර කෙනෙකි. ‘ජන්ත’ නමින් තෙරවරු දෙදෙනෙක: එක් තෙර කෙනෙක් මගධරටැ ‘ජෙන්ත’ නම් ගමැ මාණ්ඩලික රජකුගේ පුතණුවෝ යැ, අනෙක් තෙරණුවෝ සැවැත්නුවර කොසොල් රජහුගේ පුරෝහිතයන්ගේ පුතණුවෝ යි. ‘තිස්ස’ නමින් තිදෙනෙක: පළමු තෙරණුවෝ බුදුරදුන්ගේ සුළුපියන්ගේ පුතණුවෝ යැ, දෙවැනි තෙරණුවෝ රොරුව රටැ රජ වැ සිට අවුත් පැවිදි වූවෝ යැ, තුන්වන තෙරණුවෝ රජගහනුවර වෙදපාරප්‍රාප්ත බ්‍රාහ්මණ කෙනෙකි. ‘දෙවසභ’ නමින් දෙදෙනෙක: පලමු තෙරණුවෝ ගිහි කලැ මාණ්ඩලික රජකෙනෙක, දෙවැනි තෙරණුවෝ කිඹුල්වත්හි ශාක්‍යරාජකුලයෙන් පැමිණියෝ යි. ‘නන්දක’ නමින් දෙදෙනෙක: චම්පානුවර සිටු කුලයෙකින් නික්මැ පැවිදි වූ එක් තෙර කෙනෙක, සැවැත්නුවර කුලගෙයකින් නික්මැ පැවිදි වූ එක් තෙර කෙනෙකි. ‘පාරාසරිය’ නමින් දෙදෙනෙක: පළමු තෙරණුවෝ රජගහනුවර බ්‍රාහ්මණවංශික කෙනෙක, ත්‍රිවෙදයෙහි පාරප්‍රාප්තයෝ යැ, පරාසරගොත්‍ර ඇත්තෝ යැ. දෙවැනි තෙරණුවෝ සැවැත්නුවර බමුණු මහසල් කුලයෙකින් නික්මැ සප්‍රව්‍රජිත වූවෝ යැ, ත්‍රිවේදයෙහි පාරප්‍රාප්තයෝ යැ, පරාසරගොත්‍රයෙහි උපන්නෝ යි. ‘වජ්ජිපුත්ත’ නමින් දෙදෙනෙක: පළමු වැන්නා විශාලානුවර අමාත්‍ය පුත්‍රයෙක, දෙවැන්නා විශාලානුවර ලිච්ඡවිරාජපුත්‍රයෙකි. ‘වනවච්ඡ’ නමින් දෙදෙනෙක: එක් තෙර කෙනෙක් කිඹුල්වත්හි ‘වච්ඡගොත්ත’ බ්‍රාහ්මණයාගේ පුතු වෙති, අනෙක් තෙරණුවෝ රජගහනුවර ආය්‍යකුලයෙකැ බ්‍රාහ්මණ කෙනෙකි. ‘විමල’ නමින් දෙදෙනෙක: පලමු තෙරණුවෝ රජගහනුවර ආය්‍යකුලයෙකැ උපන් කෙනෙක, දෙවැනි තෙරණුවෝ බරණැස්හි බ්‍රාහ්මණ කුලයෙකැ උපන් කෙනෙකි. ‘සුමන’ නමින් දෙදෙනෙක: පලමු වැන්නා කොසොල් රටැ බ්‍රාහ්මණයෙක, දෙවැන්නා අනුරුද්ධ තෙරණුවන්ගේ උපාසක කුලයෙකැ උපන් කෙනෙකි. ‘සොපාක’ නමින් දෙදෙනෙක: සැවැත්නුවර දුගී කුලයෙකින් නික්මැ පැවිදි වූ එක් තෙර කෙනෙක, රජගහනුවර සොපාක කුලයෙකින් නික්මැ පැවිදි වූ එක් තෙර කෙනෙකි. ‘හාරිත’ නමින් දෙදෙනෙකි: දෙදෙන මැ සැවැත්නුවර බ්‍රාහ්මණවංශිකයෝ යැ, පලමු තෙරණුවෝ ගිහි කලැ පොලොඟකු විසින් දෂ්ට කරනු ලැබැ බිරිය මරණ පත් වීම නිසා සංවේගයෙන් පැවිදි වූහ, දෙවන තෙරණුවෝ දහමෙහි පැහැද පැවිදි වූ කෙනෙකි.
දෙතැනෙකැ එක තෙරණුවෝ: එක් මැ තෙරණුවන්ගේ ගාථා දෙතැනෙකැ සංග්‍රහ කළ තැන් ද ථෙරගාථායෙහි වෙයි. කිඹුල්වත්හි ශාක්‍යවංශික තෙර කෙනෙකු වූ කිම්බිල (කාළ) තෙරණුවන්ගේ ගාථා එකකනිපාතයෙහි දොළොස් වන වර්ගයෙහිත් දුකනිපාතයෙහි දෙවන වර්ගයෙහිත් ඇත. එකකනිපාතයෙහි ගාථාවෙන් තමන්ගේ සංවේගයත් පැවිද්දත් ප්‍රකාශ වෙයි. දුකනිපාත ගාථාවෙන් ආයුෂ්මත් ‘නන්දිය’ තෙරණුවන් හා ‘සමග්ගවාසය’ ප්‍රකාශ වෙයි. සැවැත්-නුවර බ්‍රාහ්මණවංශික පාරාසරිය තෙරණුවන්ගේ ගාථා වීසතිනිපාතයෙහි දෙතැනෙක දක්නා ලැබේ. පළමු ගාථා බුදුරදුන් ධරමානකාලයෙහි උන්වහන්සේගෙන් ඉන්ද්‍රියභාවනා සූත්‍රාන්තදේශනා අසා උගෙන ඉන්ද්‍රිය නිග්‍රහ වශයෙන් වදාරනලද යැ, දෙවන ගාථා බුදුන් පිරිනිවි කල්හි තමන්ගේ ද පිරිනිවන ආසන්න කල්හි මත්තෙහි භික්‍ෂූන්ගේ උපද්‍රවයන් ප්‍රකාශ කරන්-නට වදාරනලදි. පුණ්ණමාසථෙරගාථා ද දෙතැනෙකැ වෙයි. එකකනිපාතයෙහි පළමුවන වගැ දස වන ගාථාවත් දුකනිපාතයෙහි තුන් වන වගැ සවන ගාථාත් පුණ්ණමාස තෙරණුවන්ගේ යැ. එකක නිපාතයෙහි