28 ඛුද්දක පාඨ - සූත්‍ර.pdf
- ප්‍රකාශිත වර්ෂය :
- 2006
- මුද්‍රිත වර්ෂය :
- 2006
- පිටු ගණන :
- 620
- බාගත කිරීම් ගණන :
- 3,318
- වෙබ් අඩවියට එක් කළ දිනය :
- 2015-10-18
- ගොනුවේ ප්‍රමාණය :
- 18 MB
පොතේ පිටු කිහිපයක ඡායාරූප පහතින් බලන්න.
බුද්ධ ජයන්ති ත්‍රිපිටක ග්‍රන්ථමාලාවේ 24 වන වෙළුම වන මෙයින් සූත්‍ර පිටකයට අයත් බුද්දකනිකායේ ප්‍රථම භාගය ඉදිරිපත් කෙරේ. මෙහි ඛුද්දකපාඨපාළි, ධම්මපදපාළි, උදානපාළි සහ ඉතිවුත්තකපාළි යන මූල පාඨ සතර සහ ඒවායේ සම්පූර්ණ සිංහල අනුවාද අන්තර්ගත වේ.
මෙම ග්‍රන්ථයේ පරිවර්තන කටයුතු කලුකොඳයාවේ සිරි ප්‍රඥාශෙඛර නාහිමි, අහුන්ගල්ලේ විමලකිත්ති නාහිමි, සපුවලානේ ඤාණාලොක හිමි සහ ගම්මුල්ලේ චන්ද්‍රජොති හිමි විසින් සිදු කරන ලද අතර, අග්ගමහාපණ්ඩිත බලන්ගොඩ ආනන්ද මෛත්‍රෙය මහනාහිමියන්ගේ සහ කෝදාගොඩ ඤාණාලෝක නාහිමියන්ගේ සංස්කාරකත්වයෙන් සහ පරවාහැර වජිරඤාණ නාහිමියන්ගේ සංස්කාරක මණ්ඩල සම්පාදකත්වයෙන් ශ්‍රී ලංකා රජය මඟින් මුද්‍රණය කරවා ඇත.
පෙළ සහ පරිවර්තනයට අමතරව එක් එක් ග්‍රන්ථය සඳහා සම්පාදිත උපග්‍රන්ථ සහ අකාරාදී සූචි රැසක් මෙහි අඩංගුය:
- ඛුද්දකපාඨ, ධම්මපද, උදාන, ඉතිවුත්තක පෙළ සහ පරිවර්තනය
- ගාථාදිපාදානුක්‍රමණිකා, සඤ්ඤානාමානුක්‍රමණිකා, පදානුක්‍රමණිකා
- එක් එක් ග්‍රන්ථය සඳහා උපග්‍රන්ථ
සංස්කාරක නිවේදනය
ත්‍රිපිටක පාලියෙහි සූත්‍රාන්තපිටකයට අයත් බුද්දකනිකායාන්තර්ගත ඛුද්දකපාඨ ධම්මපද උදාන ඉතිවුත්තක යන ග්‍රන්ථ සතරෙහි පාළි හා සිංහල පරිවර්තනයෙන් යුත් මේ ප්‍රථම භාගය බුද්ධජයන්ති ග්‍රන්ථමාලාවෙහි සංඛ්‍යා වශයෙන් 24 වන ග්‍රන්ථය වේ.
ලංකාබෞද්ධමණ්ඩලය විසින් ආරාධිත වූ දැනට විද්‍යොදයපරිවෙණාධිපති කලුකොඳයාවේ සිරි ප්‍රඥාශෙඛර මහානායක ස්ථවිරයන් වහන්සේ විසින් ඛුද්දකපාඨය ද, වැලිතර අඹරුක්ඛාරාමයෙහි සුගතසාසනොදය පරිවෙණාධිපති පණ්ඩිත අහුන්ගල්ලේ විමලකිත්ති මහානායක ස්ථවිරයන් වහන්සේ විසින් ධම්මපදපාළිය ද, බලගල්ලේ සරස්වතීපරිවෙණාධිපති පණ්ඩිත සපුවලානේ ඤාණාලොක ස්ථවිරයන් වහන්සේ විසින් උදානපාළිය ද, මාතලේ ශ්‍රී ධර්මරාජපරිවෙණාධිපති ගම්මුල්ලේ චන්ද්‍රජොති නායක ස්ථවිරයන් වහන්සේ විසින් ඉතිවුත්තකපාළිය ද සිංහල භාෂාවට පරිවර්තනය කරණ ලදී. මේ අධිකාරයෙහි සහභාගි වූ පරිවර්තක ස්ථවිරයන් වහන්සේ සතර නම අප සැමගේ කෘතඥතාවට හිමි වෙති. පණ්ඩිත අහුන්ගල්ලේ විමලකිත්ති මහානායක ස්ථවිරයන් වහන්සේ විසින් සිංහලයට පරිවර්තනය කොට උපග්‍රන්ථයක් ද ලියන ලද ධම්මපදය පැංසිය යුතුවෙ සකස්ව තිබූ බව සිහිපත් කළ යුතු වේ.
ත්‍රිපිටක පරිවර්තන සංස්කාරක සභාවේ අනුමතියෙන් මේ ග්‍රන්ථයන්ගේ සංශොධනය උත්තරීතර සංස්කාරක මණ්ඩලයට අයත් අග්ගමහාපණ්ඩිත බලන්ගොඩ ආනන්ද මෛත්‍රෙය මහානායක ස්ථවිරයන් වහන්සේට පවරණ ලදී. ප්‍රාචීන ප්‍රතීචීන භාෂාන්තරයන්හි ප්‍රවීණ වූ බුද්ධධර්මවිෂයයෙහි ධර්මකථිකත්වයෙන් වැජඹි සිටුනා වූ, පාළි සංස්කෘත ප්‍රාකෘත ග්‍රන්ථාගත බුද්ධධර්මය පිළිබඳ මතාන්තර හා අර්ථාන්තර විභාවනයෙහි බුහුටි වූ මෛත්‍රෙය නායක ස්ථවිරයන් වහන්සේ ස්වකෘත්‍යය මැනැවින් ඉටු කළහ. උන්වහන්සේ විසින් පාළියෙහි බොහෝ තැන් අමුතු ව ලා ව්‍යාඛ්‍යාන කොට පාළිපාඨාන්තර ද, මේ ග්‍රන්ථාගත කරුණු පිළිබඳ සංස්කෘත-ප්‍රාකෘත ග්‍රන්ථයන්හි එන සදෘශ-විසදෘශතා දැනීමට උපයෝගී වූ ශ්ලෝකයන් ද අබොලිපි වශයෙන් යොදා, ගාථාදිපාද අනුක්‍රමණිකා ආදිය හා ඛුද්දකපාඨ උදාන ඉතිවුත්තක පොත් තුනට උපග්‍රන්ථ ද සම්පාදනය කරණ ලදී. කටයුතු බොහෝ ඇතත් ස්වායත්ත කොට ගත් කාර්යයෙහි උද්‍යොගීස්වභාව ඇති නායක ස්ථවිරයාණෝ ග්‍රන්ථය මුද්‍රණයෙහි පවත්නා කල්හි ශොධ්‍යපත්‍ර බැලීමෙහි ද යෙදුනාහ.
ධර්මව්‍යාකරණයෙහි නිපුණ වූ සවනත්‍රයදෘෂ්ටිප්‍රභා ඇති පණ්ඩිත කෝදාගොඩ ඤාණාලෝක දක්ෂිණලංකාවේ ප්‍රධාන සංඝනායක ස්ථවිරයන් වහන්සේ විසින් මෙහි ඇතුළත් ඛුද්දකපාඨාදි ග්‍රන්ථයන් පිණිස ඒ ඒ අට්ඨකථාශ්‍රයයෙන් ලියූ ව්‍යක්ත සංඥපනය ඒ ඒ ග්‍රන්ථයන්ගේ ආශයස්වරූප නිරූපණය කරත්තා සේ ම දැනට විසංවාදයෙන් හා අනභ්‍යාසයෙන් භාජනභාවීව යන අපගේ ජාතික සාහිත්‍යයට-ධර්මව්‍යාඛ්‍යානයට නිසි වූ සිංහල භාෂාවට රුකුල් දෙන්නේ ද වේ. මෙසෙයින් උන්වහන්සේ සංශොධකයන් වහන්සේගේ ද අපගේ ද සාධුවාදයට හිමි වෙති. අපගේ අවසාන සංස්කරණයෙන් මුද්‍රිත වූ මේ ග්‍රන්ථයෙහි ද ශොධ්‍යපත්‍ර බැලීම් ආදියෙන් පණ්ඩිත ගලගම ධම්මික ස්ථවිරයන් වහන්සේ ද සහාය වූහ.
බුද්දකනිකායෙහි ප්‍රථම භාගය සම්බුද්ධජයන්ති නිමිත්තෙන් මුද්‍රිත වන සිංහල පරිවර්තනයෙන් යුත් ත්‍රිපිටක පාළියෙහි සූත්‍රාන්තපිටකයට අයත් ග්‍රන්ථ සංඛ්‍යාවෙන් අටොළොස්වන ග්‍රන්ථය වේ.
මෙය මුද්‍රණය කරවා ප්‍රසිද්ධ කිරීම සඳහා උපකාරී වූ ලංකාආණ්ඩුව ද එහි සාංස්කෘතික කාර්ය්‍යාංශයෙහි අධිකාරීහු ද, සිංහලජාතිකමුද්‍රණාලයෙහි අධිකාරීන් හා මුද්‍රණ ශිල්පීහු ද, ග්‍රන්ථ පරිවර්තනය හා සංශොධනය කිරීමෙහි යෙදුනු මහාස්ථවිරයන් වහන්සේ ද ධර්මදානමය පුණ්‍යමහිමයෙන් සුඛභාගී වෙත්වා යි ආශංසනය කරම්හ.
පරවාහැර වජිරඤාණ ස්ථවිර.
ත්‍රිපිටකපරිවර්තන කාරක සභාවෙහි ද සංස්කාරක මණ්ඩලයෙහි ද සම්පාදක.
ත්‍රිපිටක කාර්ය්‍යාලය, ධම්මදූතාශ්‍රම විද්‍යාලය, දෙමටගොඩ, කොළඹ.
සංඥාපනය
ඛුද්දකපාඨපාළි:
ඛුද්දකපාඨ යනු “සරණ - සික්ඛාපද - ද්වත්තිංසාකාර - කුමාරපඤ්හ - මඞ්ගලසුත්ත - රතනසුත්ත - තිරොකුඩ්ඩසුත්ත - නිධිකණ්ඩසුත්ත - මෙත්තසුත්ත” විසින් නවප්‍රකාර පාඨයන්ගේ සඞ්ග්‍රහය වෙයි. තෙල පාඨයෝ ධර්මස්කන්ධ වශයෙන් ගනුත් මැ මහත් නො වෙති. එයින් ‘ඛුද්දකපාඨ’ යනු ආඛ්‍යා වෙයි. පඤ්චනිකාය අතර ඛුද්දකනිකායෙහි මුලැ සිටුනා පෙළ ද ‘ඛුද්දකපාඨ’ය වේ.
මෙහි ලා ශාසනාවතරණය සරණගමනයෙන් වන හෙයින් ‘සරණ’ය පළමු වැ ලා දැක්විණ. සසුන්වන් කුලදරුවන් විසින් පළමු සික්මියැ යුතු වන බැවින් දෙවනු ‘සික්ඛාපද’ දැක්විණ. සිකපදෙහි සිටුනා කුලදරුවන්ගේ චිත්තභාවනා පිණිසැ, ‘ද්වත්තිංසාකාර’ය තෙවනු කොට දැක්විණ. චිත්තභාවනායෙන් පසු නානාප්‍රකාරයෙන් ප්‍රඥාභාවනාලබ්ධි දක්වනු පිණිසැ ‘කුමාරපඤ්හ’ය සිව්වැනි කොට දැක්විණ. මෙ හැම පරමමඞ්ගල වන හෙයින් ‘මඞ්ගල’ සූත්‍රය පස්වනු කොට දැක්විණ. මඞ්ගල කාරණයෙහි සිටුනාහට ආත්මාරක්‍ෂාව ස්වයංසිද්ධ නුයි පරරක්‍ෂාව පිණිසැ ‘රතනසුත්ත’ය සවැනි කොට දැක්විණ. රතනසූත්‍රයෙහි උපහිතය භූතදෙශනාව නුයි කිසි භූත කෙනකුන් දක්වනු පිණිසැ ‘තිරොකුඩ්ඩ’ සූත්‍රය සත්වැනි කොට දැක්විණ. තිරොකුඩ්ඩයෙන් පුණ්‍යවිරහිතයන්ගේ විපත් පැවැසේ නුයි පින්කැතියන්ගේ සැපත් දක්වනු පිණිසැ ‘නිධිකණ්ඩ’ සූත්‍රය අෂ්ටම කොට දැක්විණ. ද්වත්තිංසාකාරයෙන් රාගප්‍රහාණය හා කුමාරප්‍රශ්නයෙන් මෝහප්‍රහාණය හා සිදු කරන කමටහන් පැවැසේ නුයි ද්වෙෂප්‍රහාණයට නිසි කමටහනක් ද කියනු සඳහා ‘මෙත්ත’ සූත්‍රය නවවැනි කොට දැක්විණ. මේ නව පාඨයන්ගේ නිඃක්‍ෂෙපයෙන් ඛුද්දකපාඨය සම්පූර්ණ වෙයි. තෙල නිඃක්‍ෂෙපක්‍රමය පිණිස අටුවාචාරීන් කියන අර්ථාන්තර දනුකැමැතියන් ‘අටුවා’ බලා දන්නේ යැ.
කුදුගත්සඟියෙහි ඇතුළත් වැ සිටුනා ධම්මපද - උදාන ආදියෙහි නොලැබෙන ‘පාඨ’ ශබ්දය ගෙනැ ‘ඛුද්දකපාඨ’ යැ යි මෙහි සංඥානිර්දෙශ වී යැ. එහි ලා විශේෂාර්ථයෙක් ඇද්ද, යනු විමසනු වටනේ යැ. පැරැණියන් එහි විශේෂාර්ථ උදුරා නොදැක්වුව ද, සසුන් වන් කුලදරුවන් විසින් පාඨ්‍ය ප්‍රසන්නක වශයෙන් එහි යි පාඨ ශබ්දානුසාරයෙන් විශේෂාර්ථය සිතියැ හැක්කේ යැ. මූලකර්මස්ථාන සඳහා, මඞ්ගලාවමඞ්ගලයෙහි බණ වදාරනු සඳහා, පිරිත් කරනු සඳහා, සතතයෙන් පඨන පාඨනයට නිසි ධර්මප්‍රවචන මෙහි එකසේ පෙනේ. ... [continues]