24 අංගුත්තර නිකාය 3 - සූත්‍ර.pdf
- ප්‍රකාශිත වර්ෂය :
- 1968
- මුද්‍රිත වර්ෂය :
- 2006
- පිටු ගණන :
- 500
- බාගත කිරීම් ගණන :
- 3,135
- වෙබ් අඩවියට එක් කළ දිනය :
- 2015-10-18
- ගොනුවේ ප්‍රමාණය :
- 15 MB
පොතේ පිටු කිහිපයක ඡායාරූප පහතින් බලන්න.
බුද්ධ ජයන්ති ත්‍රිපිටක ග්‍රන්ථ මාලාවේ 20 වන වෙළුම (සූත්‍ර පිටකයේ 14 වන ග්‍රන්ථය) වන මෙයින් අංගුත්තර නිකායේ තෙවන භාගය හෙවත් පඤ්චක නිපාතය අන්තර්ගත වේ. මෙහි පාලි පෙළ සහ සිංහල පරිවර්තනය මුහුණට මුහුණ ලා මුද්‍රණය කර ඇත.
මූලික පරිවර්තනය හල්ගස්තොට දේවානන්ද ස්ථවිරයන් වහන්සේ විසින් සිදු කර ඇති අතර, අනතුරුව අංගුත්තර නිකාය සංශෝධක මණ්ඩලයේ කෝදාගොඩ ඥාණාලෝක, පරවාහැර පඤ්ඤානන්ද, තලල්ලේ ධම්මානන්ද, මකුළුදූවේ පියරතන, ලබුගම ලංකානන්ද සහ කරගම්පිටිගොඩ සුමනසාර ආදී මහා තෙරවරුන් විසින් සකස් කර සංශෝධනය කර තිබේ. මුල් මුද්‍රණයේ සංස්කාරක නිවේදනය ශ්‍රී බුද්ධ වර්ෂ 2512 (ක්‍රි.ව. 1968) දී පරවාහැර වජිරඤාණ හිමියන් විසින් සටහන් කර ඇත.
පඤ්චක නිපාතයට අයත් ප්‍රධාන වර්ග ඇතුළත් වේ:
- සෙඛබල වර්ගය
- බල වර්ගය
- පඤ්චඞ්ගික වර්ගය
- සුමනා වර්ගය
- මුණ්ඩරාජ වර්ගය
- නීවරණ වර්ගය ආදිය
සංස්කාරක නිවේදනය
අංගුත්තරනිකායෙහි පඤ්චකනිපාතය අවසන් කොට ඇති මේ තෘතීය භාගය සූත්‍රාන්තපිටක ග්‍රන්ථ සංඛ්‍යායෙන් තුදස් වැනි, බුද්ධජයන්ති ත්‍රිපිටක ග්‍රන්ථමාලා සංඛ්‍යායෙන් විසිවැනි ග්‍රන්ථය වේ.
ලංකා බෞද්ධ මණ්ඩලය විසින් ආරාධිත වූ ගම්පහ විද්‍යාරවින්ද පරිවේණාධිපති, ශ්‍රී කල්ප්‍යාණීසාමග්‍රීධර්‍ම සඞ්ඝසභාවයෙහි අනුනායක, හල්ගස්තොට දෙවානන්ද ස්ථවිරයන් වහන්සේ විසින් අංගුත්තරනිකායෙහි පඤ්චක, ඡක්ක, සත්තකනිපාතයෝ සිංහලට පරිවර්තනය කරණ ලදහ. උන්වහන්සේ විසින් ඉදිරිපත් කරණ ලද ඒ නිපාතයන්ගේ සිංහල පරිවර්තනය සෘජු වාද ලැබීමට යෝග්‍ය වේ. එහෙත් එය එලෙසින් ම මුද්‍රණයට පත් කිරීම පය්‍යාප්ත නොවනැයි සැලකූ අංගුත්තරනිකාය සංශෝධක මණ්ඩලයෙහි අධිකාරී කෝදාගොඩ පණ්ඩිත ඤාණාලොක නායක ස්ථවිරයන් වහන්සේ හා පරවාහැර පණ්ඩිත පඤ්ඤානන්ද, තලල්ලේ පණ්ඩිත ධම්මානන්ද යන ස්ථවිරවරයන් විසින් කොහුවල විජයධම්මාරාමාධිපති ආචාර්‍ය්‍ය මකුළුදූවේ පියරතන නායක ස්ථවිරයන් වහන්සේගේ සහායකත්‍වය ඇති ව අංගුත්තර පඤ්චකනිපාතය සකස් කොට සිංහලට පරිවර්තනය කරණ ලදි. ධර්‍මාර්ත්‍ථ නො පිරිහෙළා පෙළඳ ගූඪ නො කරමින් සිංහල සාහිත්‍ය පෝෂණයට ද හිත වන සේ පරිවර්තීත පඤ්චකනිපාතය අංගුත්තරනිකායේ තෘතීය භාගය වශයෙන් මුද්‍රණයට පිළියෙල කිරීමේ දී ත්‍රිපිටකපරිවර්‍තන සංශෝධක මණ්ඩලයෙහි සාමාජිකයන් වන ලබුගම පණ්ඩිත ලංකානන්ද නායක ස්ථවිරයන් වහන්සේ හා කරගම්පිටිගොඩ පණ්ඩිත සුමනසාර ස්ථවිරයන් වහන්සේ විසින් දරණලද ආයාසය පැසසිය යුතු වේ. ද්විපත්‍ර බැලීමෙහි දී පරවාහැර පණ්ඩිත පඤ්ඤානන්ද ස්ථවිරයෝ ද උපකාරී වූහ.
අංගුත්තර පඤ්චකනිපාතයෙහි සූත්‍ර දහයක් බැගින් ඇති වර්ග විසිපහකි. වර්ග පහ පහ යෙදෙන පණ්ණාසක (සූත්‍ර පනහක් ඇති කොට්ඨාස) පහකි. එහෙත් “ඡට්ඨො පණ්ණාසකො” යි පෙළෙහි දැක්වෙන හෙයින් එහි පණ්ණාසක සයක් ඇති බව පෙනේ. එහෙයින් අප විසින් “ඡට්ඨ පණ්ණාසකං” යි පණ්ණාසක පිළිවෙළ අනුව ශීර්ෂ පාඨය යොදන ලදී. එහි ඇත්තේ ‘උපසම්පදාවග්ගො” නමින් එක් වර්‍ගයෙකි. එය පණ්ණාසකයන්හි එන වර්ග සංඛ්‍යා පරිපාටිය අනුව “උපසම්පදාවග්ගො පඨමො” යි යොදන ලදී. එයට ස්වරූපයෙන් හා පෙය්‍යාලමුඛයෙන් සංක්ෂිප්ත ව දැක්වෙන සූත්‍ර විසිඑකක් ඇතුළත් ය. පෙළෙහි වර්ග නාමයක් නැති අධික සංඛ්‍යාවක් පෙය්‍යාලයෙන් අන්තර්ගත වූ සූත්‍ර තීස්නවයක් “වග්ගාතිරෙකසුත්තානි” යි අප විසින් යොදන ලදහ. ඉක්බිති එන සූත්‍ර අටසියපනහක් “රාගාදිපෙය්‍යාලං” නමින් දැක්වෙයි. මෙසෙයින් පඤ්ච පණ්ණාසකයෙහි දැක්වෙන සූත්‍ර දෙසියපනහ සමග අංගුත්තර පඤ්චකනිපාතයෙහි සූත්‍ර එක්දහස් එකසිය සැටක් වේ. එහෙත් පාලියෙහි නිපාතාවසානයෙහි “උපසම්පදාවග්ගො ඡට්ඨො,”” යි ද “ඡට්ඨො පණ්ණාසකො” යි ද දක්වමින් උපසම්පදා වර්‍ගයට සූත්‍ර නවසියදහයක් ඇතුළත් වන සේ අඟවා තිබේ. බුරුම අකුරෙන් ද සියම් අකුරෙන් ද මුද්‍රිත පොත්හි ද ‘උපසම්පදා වග්ගො ඡට්ඨො’ යි දැක් වේ. පඤ්චම පණ්ණාසකයේ අවසාන “වග්ගො පංචමො” යි දැක්වූ පස්වන වග හා සම්බන්ධ කොට පෙළෙහි “උපසම්පදා වග්ගො ඡට්ඨො” යි දක්වා ඇති බව සිතිය හැකි වෙයි.
මෙහි පාඨකයන්ගේ පහසුව සඳහා පෙළෙහි ඌන වූ ද අස්ථානපතිත වූ ද පෙය්‍යාලයන් [ ]-මේ ලකුණු අතර යොදා, එක ම පඬ්ක්තියක් වශයෙන් යෙදී ඇති පදවාක්‍යයන් ද, ඒ ඒ සූත්‍රයන්හි එන පස්වැදෑරුම් ධර්‍මසංඛ්‍යා ද වෙන් කොට දැක්වීමෙහි ලා අප විසින් දැරූ ආයාසය අනල්ප බව සැලකිය යුතු.
මේ ග්‍රන්ථය ද බුද්ධජයන්ති ත්‍රිපිටක ග්‍රන්ථමාලාවෙහි 20 වැනි ග්‍රන්ථය වශයෙන් මෙසේ මුද්‍රණය කරවීමෙන් සිද්ධවන ධර්‍මදානමය පුණ්‍යසමුද්‍රයෙන් ලංකාණ්ඩුව ද, සංස්කෘතික කාර්‍ය්‍යංශයේ අධිකාරීහු ද, සිංහලජාතික (ස්වදේශීය) මුද්‍රණාලයෙහි අධිකාරීන් හා මුද්‍රණ ශිල්පීහු ද, ග්‍රන්ථපරිවර්‍තක හා සංශෝධක ස්ථවිරවරු ද සුදුසු පරිදි සර්‍වාභීෂ්ට සම්පත් ලාභයෙන් සුවපත් වෙත්වා!
පරවාහැර වජිරඤාණ ස්ථවිර, ත්‍රිපිටක පරිවර්‍තන කාරක සභාවෙහි ද සංස්කාරක මණ්ඩලයෙහි ද සම්පාදක. ශ්‍රී බුද්ධවර්‍ෂ 2512. ත්‍රිපිටක කාර්‍ය්‍යාලය, ධර්‍මදූත ආශ්‍රම විද්‍යාලය, 174, සිරිවජිරඤාණ මාවත, කොළඹ 9.