14 මජ්ඣිම නිකාය 2 - සූත්‍ර.pdf
- ප්‍රකාශිත වර්ෂය :
- 2006
- මුද්‍රිත වර්ෂය :
- 2006
- පිටු ගණන :
- 797
- බාගත කිරීම් ගණන :
- 3,638
- වෙබ් අඩවියට එක් කළ දිනය :
- 2015-10-18
- ගොනුවේ ප්‍රමාණය :
- 20 MB
පොතේ පිටු කිහිපයක ඡායාරූප පහතින් බලන්න.
බුද්ධ ජයන්ති ත්‍රිපිටක ග්‍රන්ථ මාලාවේ 11 වන වෙළුම ලෙස මුද්‍රිත සූත්‍ර පිටකයට අයත් මජ්ඣිම නිකායේ දෙවන භාගය හෙවත් මජ්ඣිමපණ්ණාසකය (පාළි පෙළ සහ සිංහල පරිවර්තනය) මෙහි අන්තර්ගත වේ.
මෙහි පාළි පෙළ සංශෝධනය පණ්ඩිත ලබුගම ලංකානන්ද අනුනායක ස්ථවිරයන් වහන්සේ විසින් සිදු කරන ලද අතර, සිංහල පරිවර්තනය පණ්ඩිත කෝදාගොඩ ශ්‍රී ඤාණාලොක නායක ස්ථවිරයන් වහන්සේ සහ පණ්ඩිත කරහම්පිටිගොඩ සුමනසාර ස්ථවිරයන් වහන්සේ විසින් සම්පාදනය කර ඇත.
මෙහි ප්‍රධාන වශයෙන් පහත වග්ග තුන යටතේ සූත්‍ර 50ක් අන්තර්ගත වේ:
- ගහපතිවග්ගො (කන්දරක, අට්ඨකනාගර ආදී සූත්‍ර)
- භික්ඛුවග්ගො (අම්බලට්ඨිකරාහුලොවාද ආදී සූත්‍ර)
- පරිබ්බාජකවග්ගො (තෙවිජ්ජවච්ඡගොත්ත ආදී සූත්‍ර)
සංස්කාරක - නිවේදනය
පරවාදමථනය විශේෂලක්ෂණ කොට ඇති මජ්ඣිමසංගහයට අයත් මජ්ඣිමපණ්ණාසක - පාළියෙහි මේ සිංහල පරිවර්තනය එහි දෙවන කාණ්ඩය වේ. පිටකග්‍රන්ථසඞ්ඛ්‍යාවශයෙන් සූත්‍රාන්තපිටකයෙහි පස්වැන්නී ද, මුද්‍රිතකාණ්ඩසඞ්ඛ්‍යාවශයෙන් බුද්ධජයන්ති ත්‍රිපිටක ග්‍රන්ථ මාලායෙහි එකොළොස්වැන්නී වූ ග්‍රන්ථය ද වේ. ත්‍රිපිටක පරිවර්තන සම්පාදක මණ්ඩලයෙහි සභාපති වූ අහංගම විද්‍යාචන්ද්‍රපරිවෙණාධිපති, ත්‍රිපිටකවාගීශ්වරාචාර්‍ය්‍ය කෝදාගොඩ ශ්‍රී ඤාණාලොකාභිධාන දක්ෂිණ ලංකාවෙහි ප්‍රධාන සංඝනායකස්ථවිරයන් වහන්සේ හා ත්‍රිපිටක සම්පාදකමණ්ඩලයෙහි සාමාජික වූ රාජකීයපණ්ඩිත කරහම්පිටිගොඩ සුමනසාරස්ථවිරයන් වහන්සේ මේ පරිවර්තනකාර්‍ය්‍යය මැනැවින් නිම කළහ. අප විසින් මෙහි පෙළ සංශෝධනයෙන් සකස් කරන ලදී. මැදුම්සඟිය පිළිබඳ වැ කියයුතු දැය ප්‍රථමභාගයෙහි ලා ලියූ සංඥාපනයෙහි පල වැ ඇතියෙන් මෙහි මෙහි නැවත සඳහන් කළයුතු නොවේ.
ත්‍රිපිටක පරිවර්තන සම්පාදකමණ්ඩලයෙහි සාමාජිකයන් වූ ද, කොළඹ විද්‍යොදය පිරිවෙනෙහි ආචාර්ය්‍යවරයන් වූ ද, ශාස්ත්‍රපති, විද්‍යා විශාරද, රාජකීය පණ්ඩිත, රද්දැල්ලේ සිරිපඤ්ඤාලොකාභිධාන අනුනායකස්ථවිරයන් වහන්සේ ද, ශාස්ත්‍රපති, විද්‍යා විශාරද, රාජකීය පණ්ඩිත, වේබඩුවේ සිරි අනොමදස්සි නායකස්ථවිරයන් වහන්සේ ද මුද්‍රණාවස්ථාවෙහි සංශෝධන කාර්‍ය්‍යය පිණිස බෙහෙවින් වෙහෙසු දැරූබව සඳහන් කරම්හ. මුද්‍රණය වගවහා නිම කරවාලීම පිණිස සංස්කෘතිකකාර්‍ය්‍යාංශයෙහි අධිකාරීන් දැරූ සැලකිල්ල ද පැසසියයුතු බව සඳහන් කළ යුතු ද වෙයි. රජයෙහි මුද්‍රණ දෙපාර්තමේන්තුවෙහි මුද්‍රණාලයාධිපතිතුමා හා අතිරේක මුද්‍රණාලයාධිපති ඔස්ටින් ජයවර්ධන මැතිතුමා හා ත්‍රිපිටක මුද්‍රණකාර්යයෙහි නියුක්ත සේවක මහතුන් ඉතා සැලකිල්ලෙන් මෙහිලා ක්‍රියා කළ බව විශේෂයෙන් සඳහන් කළයුතු ද වේ. මේ පින්වතුන්ගේ කාර්‍ය්‍යසූරභාවය ත්‍රිපිටක මණ්ඩලයෙහි සිටිනා හැමගේ චිත්තාරාධනයට සමර්ථ ද විය. ත්‍රිපිටක කාර්යාලය පිහිටි මහානායක චාරිකාරාමයෙහි භාරකාර වන ඇම්. ජී. ආර්. සමරසිංහ මහතා ඇතුළු සේවක පිරිස ඉතා හිතවත් වැ උපස්ථානාදියෙන් වහල් වැ සිටි බව ද මෙහි ලා කියයුතු වෙයි.
තව ද ශ්‍රී ලංකා ජනරජයෙහි අග්‍රාමාත්‍යවරිය වන සිරිමාවෝ බණ්ඩාරනායක උතුමාණන් මේ පරිවර්තනකාර්‍ය්‍යවිෂයෙහි ලා දක්වන බලවත් ප්‍රසාදය හා තදනු වැ සංස්කෘතික අමාත්‍ය ඇස්. ඇස්. කුලතිලක මැතිතුමාණන් හා අමාත්‍යාංශයෙහි ස්ථිරලේකම් වන නිශ්ශංක විජයරත්න මැතිතුමාණන් වෙතින් ලැබුණු වහල ද තියු පෙරටු කොට සඳහන් කළයුතු ද වේ.
‘බුද්ධජයන්ති’ය නිමිති කොට ආරම්භ කළ ත්‍රිපිටකපරිවර්තන - කාර්යයෙහි දිවාරෑ වෙහෙසු ධරමින් ක්‍රියා කළ, ශ්‍රී ලංකා විද්‍යොදය විශ්වවිද්‍යාලයෙහි උපකුලපති වැ වැඩසිටි අතිගෞරවාර්‍හ ත්‍රිපිටක - වාගීශ්වරාචාර්‍ය්‍ය පරවාහැර සිරිවජිරඤාණාභිධාන බස්නාහිර පලාතෙහි ප්‍රධාන සංඝනායක මහාස්ථවිරයන් වහන්සේ ඇතුළු කොට, අපවත් වූ සංස්කාරක ස්ථවිරයන් වහන්සේ සැම හා මේ කාර්‍ය්‍යයෙහි නියුක්ත හැම සුදීහු ද, ආධාර උපකාර කළ සියලු භවත්හු ද, මේ ධර්මදානමයකුශලයෙන් භවනිස්සරණය කෙරෙත්වයි ආශංසනය කරම්හ.
මෙයට
ශාසනස්ථිතිය පතන,
ලබුගම ලංකානන්ද
ත්‍රිපිටකපරිවර්තන සම්පාදක
මණ්ඩලයෙහි ප්‍රධාන සංස්කාරක. ත්‍රිපිටක කාර්යාලය, මහානායක චාරිකාරාමය, අංක : 115, විජේරාම මාවත, කොළඹ 7.