09 පරිවාර පාළි 2 - විනය.pdf
- ප්‍රකාශිත වර්ෂය :
- 2006
- මුද්‍රිත වර්ෂය :
- 2006
- පිටු ගණන :
- 353
- බාගත කිරීම් ගණන :
- 3,127
- වෙබ් අඩවියට එක් කළ දිනය :
- 2015-10-18
- ගොනුවේ ප්‍රමාණය :
- 7.9 MB
පොතේ පිටු කිහිපයක ඡායාරූප පහතින් බලන්න.
බුද්ධජයන්ති ත්‍රිපිටක ග්‍රන්ථමාලාවේ 6(ii) වන වෙළුම ලෙස පළ වූ විනය පිටකයට අයත් පස්වන ග්‍රන්ථය වන ‘පරිවාරපාළි’ දෙවන කාණ්ඩයයි. පරිවාර පාළිය විශාල ග්‍රන්ථයක් බැවින් හැදෑරීමේ පහසුව සඳහා කාණ්ඩ දෙකකට බෙදා පළ කරන ලද අතර, මෙහි පළමු කාණ්ඩය 1977 දී නිකුත් කෙරිණි.
මෙහි සිංහල පරිවර්තනය පොල්ගහවෙල විද්‍යාජ්‍යොදය පරිවෙණාධිපති කෙසෙල්වතුගොඩ ශ්‍රී රතනජොති නායක මහාස්ථවිරයන් වහන්සේ විසින් සිදු කර ඇති අතර, ලබුගම ලංකානන්ද නායක ස්ථවිරයන් ඇතුළු ත්‍රිපිටක සම්පාදක මණ්ඩලය විසින් පාඨශෝධනය කොට සංස්කරණය කරන ලදී.
මෙම දෙවන කාණ්ඩයට ඛන්ධකපුච්ඡා, එකුත්තරික, උපෝසථාදි පුච්ඡා-විස්සජ්ජනා, අත්ථවසපකරණ, ගාථාසංගණික, අධිකරණභේද, චෝදනාකණ්ඩ, චූළසංගාම, මහාසංගාම, කථිනභේද, උපාලිපඤ්චක ආදී පරිච්ඡේද රැසක් ඇතුළත් වේ.
සංස්කාරක නිවේදනය හා සංඥාපනය
විනයපිටකයෙහි පස්වැනි ග්‍රන්ථය වූ පරිවාරපාළි බුද්ධජයන්ති ත්‍රිපිටක ග්‍රන්ථමාලාවෙහි සවැනි ග්‍රන්ථය ලෙස සලකන ලද වෙයි. එහෙත් ග්‍රන්ථය හැදෑරීමෙහි පහසුව සලකා නියතස්ථානයෙහි ඡෙද වෙන් කරමින් සිංහල පරිවර්තනය සමග මුද්‍රණය කිරීමේ දී ග්‍රන්ථය සුවසේ පරිහරණ නොකළහෙණසේ මහත්වයට පැමිණෙන බව පෙනුණු හෙයින් පරිවාරපාළියෙහි “සමුට්ඨානභෙදය” අවසන් කොට ඇති ග්‍රන්ථප්‍රදේශය 1. කාණ්ඩය ලෙස ක්‍රි. ව. 1977 දී පළකරවන ලද්දේය.
ඛන්ධකපුච්ඡායෙහි පටන් නවසංගහවග්ගය අවසන් කොට ඇති ග්‍රන්ථශෙෂය පරිවාරපාළියෙහි 2 කාණ්ඩය ලෙස පළ වෙයි. පරිවාරපාළිය ගෙන කියැයුතු යම් දැයක් වේ නම් එ හැම ප්‍රථම කාණ්ඩයෙහි ලියූ සංඥාපනයෙන් දැක්වෙන හෙයින් මෙහි ලා වෙන මැ සංඥාපනයක් නොලියම්හ. අර්ථීන් විසින් එ සංඥාපනය බලන්නේ මැනැවි.
ලංකා බෞද්ධ මණ්ඩලයේ ආරාධනය පරිදි පරිවාරපාළිය සිංහලභාෂාවෙන් පරිවර්තන කළාහු පොල්ගහවෙල විද්‍යාජ්‍යොදය පරිවෙණාධිපති උපාධ්‍යායභූත කෙසෙල්වතුගොඩ සිරිරතනජොත්‍යභිධාන නායක මහාස්ථවිරපාදයන් වහන්සේ ය. ධර්මවිනයධර බහුශ්‍රැත පණ්ඩිතවරයාණකෙනකු වූ උන්වහන්සේ යථාකාලයෙහි නිමහම් කළ සිංහල පරිවර්තනය වර්තමාන ත්‍රිපිටකසම්පාදකමණ්ඩලයේ බහුශ්‍රැත මහතෙරවරුන් විසින් පාඨශොධන පූර්වක වැ සංස්කරණය කරන ලද්දේය. මෙහි රචනාශෛලිය හා අක්ෂරවින්‍යාසය ද පරිවර්තක නාහිමියන් විසින් අනුගමනය කළ සම්ප්‍රදාය නොපිරිහෙතසේ යොදා ඇත.
භික්ෂූන් වහන්සේගේ විනයඥානය සඳහා අතිශයින් ඵලවත් වූ පරිවාරපාළිය සුගම වූ සිංහලයෙන් පරිවර්තන කොට ප්‍රකාශයට පමුණුවාලන්නට ලැබීම ශාසනාර්ථිකාමී සකල සිංහල බෞද්ධජනතාවගේ ප්‍රමොදයට හේතු වේ යයි සිතමි. මේ සත්ක්‍රියාවෙහි පුරෝගාමී වූ ලංකාබෞද්ධමණ්ඩලයෙහි පින්වත්හු ද සංස්කෘතික අධිකාරියෙහි නියුක්ත සියලු සුධීහු ද ශ්‍රීලංකා ප්‍රජාතාන්ත්‍රික සමාජවාදී ජනරජය ද ධර්මදානමය කුශලහේතුවෙන් නිරාමය වෙත්වායි ආශංසනය කරම්හ.
හැමසත්නට සෙත් වේවා!
මෙවගට, ශාසනොදයකාරී ලබුගම ලංකානන්ද ස්ථවිර, ත්‍රිපිටකමණ්ඩලයේ ප්‍රධාන සම්පාදක. 1979 ජූනි මස 09 වැනි දින, මහානායකවාරිකාරාමය.