04 මහාවග්ග පාළි 1 - විනය.pdf
- ප්‍රකාශිත වර්ෂය :
- 2006
- මුද්‍රිත වර්ෂය :
- 2006
- පිටු ගණන :
- 594
- බාගත කිරීම් ගණන :
- 5,224
- වෙබ් අඩවියට එක් කළ දිනය :
- 2015-10-18
- ගොනුවේ ප්‍රමාණය :
- 20 MB
පොතේ පිටු කිහිපයක ඡායාරූප පහතින් බලන්න.
බුද්ධ ජයන්ති ත්‍රිපිටක ග්‍රන්ථ මාලාවේ තෙවන වෙළුම වන මෙම කෘතිය විනය පිටකයේ ‘මහාවග්ගපාළි’ ප්‍රථම භාගයයි. පාලි මූල පෙළ හා සිංහල පරිවර්තනය මෙහි අන්තර්ගත වන අතර පරිවර්තනය අම්බලන්ගොඩ ශාස්ත්‍රෝදය පරිවෙණාධිපති පණ්ඩිත අම්බලන්ගොඩ ධම්මකුසල ස්ථවිරයන් වහන්සේ විසින් සිදු කරන ලද්දකි.
මෙම ප්‍රථම භාගය ප්‍රධාන ඛන්ධක පහකින් සමන්විත වේ:
- මහාඛන්ධකං (බෝධිකථා, ප්‍රව්‍රජ්‍යා විධි සහ ශාසනික විනය නීති)
- උපොසථක්ඛන්ධකං (උපෝසථ විධි සහ ප්‍රාතිමෝක්ෂ දේශනා ක්‍රම)
- වස්සූපනායිකක්ඛන්ධකං (වස් එළඹීම හා ඒ පිළිබඳ නීති)
- පවාරණක්ඛන්ධකං (පවාරණය කිරීමේ විනය කර්ම)
- චම්මක්ඛන්ධකං (සම් පරිහරණය හා ආශ්‍රිත නීති)
ලංකා බෞද්ධ මණ්ඩලයේ ආරාධනයෙන් සකස් වූ මෙම කෘතිය ත්‍රිපිටක පරිවර්තන කාරක සභාව සහ සංස්කාරක මණ්ඩලය මගින් සංස්කරණය කොට මහාබෝධි යන්ත්‍රාලයේ මුද්‍රණය කරවා ඇත.
සංඥාපනය
සම්බුද්ධජයන්තිය
ශ්‍රීශාක්‍යමුනීන්ද්‍ර වූ තථාගත සම්මාසම්බුදුරජානන් වහන්සේගේ සකන්ධ-පරිනිර්‍වාණයෙන් දැන් අවුරුදු දෙදහස් පන්සියයක් සම්පූර්‍ණ ය. මේ තරම් දීර්ඝකාලයක් උන්වහන්සේගේ නෛය්‍යාණිකශාසනය සදෙවකලෝකයා හට හිතවැඩ සලසමින් අඛණ්ඩ ව පැවැත්මේ ආශ්චර්‍ය්‍යසිද්ධිය නිමිත්ත කොට ගෙන සම්බුද්ධමංගලමහෝත්සව පැවැත්වීමට හා සම්බුද්ධශාසනයාගේ චිරස්ථිතියට හිත වූ කෘත්‍ය සංවිධානය සඳහා බෞද්ධමහාජනයා විසින් දෙදහස්පන්සියවන සම්බුද්ධපරිනිර්‍වාණවර්‍ෂය බුද්ධජයන්තිවර්‍ෂය වශයෙන් සම්මත කර ගන්නාලදී.
සිංහලජාතිය
සම්බුද්ධපරිනිර්‍වාණදිනයෙහි ලක්දිව පැමිණි විජයකුමාරයාගෙන් ආරම්භ වූ සිංහලජාතියට ද අවුරුදු දෙදහස්පන්සියයක් පිරුණේ ය. එහෙයින් සිංහලජනතාවට මේ ජයන්තීවර්ෂය ජාතික වශයෙන් ද අතිශයින් වැදගත් වන්නේ ය. බුදුරජානන් වහන්සේ විසින් ම තමන් වහන්සේගේ නෛය්‍යාණිකශාසනය පන්දහසක් හවුරුදු ආරක්‍ෂා කිරීමට සුදුසු ජාතිය වශයෙන් තෝරා ගණු ලැබූ සිංහලජාතිය ඒ ශ්‍රෙෂ්ඨධර්මය ස්වකීයස්වභාවය හා ආගම ද වශයෙන් වැළඳ ගෙන මෙතුවක් කල් ආරක්‍ෂා කිරීමෙන් දෙවියන් සහිත ලෝකයාගේ සම්භාවනයට පාත්‍ර වී ය.
ලංකාබෞද්ධමණ්ඩලය
මේ බව සැලකීමෙන් මහත් ප්‍රබෝධයට පැමිණි වර්තමාන සිංහල බෞද්ධයන් විසින් බුද්ධශාසනයේ චිරස්ථිතිය සඳහා මින් පෙර නුවූ විරූ අත්‍යවශ්‍ය කෘත්‍ය සංවිධාන කළ යුතු බව සලකා මෙහි දැක්වෙන ප්‍රස්තාවනාවෙහි විස්තර වන පරිදි ලංකාබෞද්ධමණ්ඩලය පිහිටුවන ලදී.
ලංකාරජයේ අනුග්‍රහය
බුද්ධජයන්තිය පිළිබඳ කටයුතු නො පිරිහෙළා සිදු කරණු පිණිස එකල අග්‍රාමාත්‍ය ව සිටි ලංකාබෞද්ධමණ්ඩලයේ සභාපති වූ ශ්‍රීමත් ජෝන් කොතලාවල මැතිතුමන්ගේ හා ස්වදේශකාර‍ය්‍යභාර ව සිටි ඒ. රත්නායක ඇමැතිතුමන්ගේ ද ඉල්ලීම පරිදි ගරුතරයේ අමාත්‍යමණ්ඩලය විසින් ප්‍රථමවරට රුපියල් පණ්ණස්ලක්‍ෂයක ආධාරමුදලක් ලංකාබෞද්ධමණ්ඩලයට පවරා දෙන ලද්දේ ය.
ත්‍රිපිටකය සිංහලභාෂාවට නැගීම
ලංකාබෞද්ධමණ්ඩලය මඟින් සම්බුද්ධජයන්තිඅනුස්මරණය සඳහා කළ යුතු යයි සම්මත කරගත් කටයුතු අතර ත්‍රිපිටකපාලිය සිංහලයට නැගීම ප්‍රධාන වේ. එසේ කියන්නේ ස්ථවිරවාද බුද්ධධර්මයෙහි ආරක්‍ෂාව හා ව්‍යාප්තිය ද සලසාලීමට වරම් ලැබා සිටුනා අප රටෙහි සියබසින් ලියැවුනු ත්‍රිපිටකයක් මෙතෙක් ඇති නො වීම මහත් පාඩුවක් ව තුබූ බැවිනි. දැන් ඒ කෘත්‍යය සිද්ධ කිරීමෙන් ඒ පාඩුව පියැවෙන්නේ ය. අනාගතසාමාන්‍ය මහාජනයාට ද ධර්‍මඥානය ලැබෙන්නේ ය. රත්නත්‍රය විෂයයෙහි ඔවුන්ගේ ශ්‍රද්ධාව වැඩෙන්නේ ය. දෙවියන් සහිතලෝකයාගේ යහපත සිද්ධ වන්නේ ය. ඉතිරි අවුරුදු දෙදහස්පන්සියය තුළ බුද්ධශාසනයාගේ ආරක්‍ෂාව ද සැලසෙන්නේ ය.
ත්‍රිපිටකපරිවර්‍තනකාරකසභාව
සම්බුද්ධජයන්තිඋත්සවය පිළිබඳ කටයුතු සඳහා තෝරා පත් කරණ ලද කාරකසභා අතුරෙහි ත්‍රිපිටකපරිවර්‍තනකාරකසභාව ද එකෙකි. මේ කාරකමණ්ඩලය සම්භාවනීය වූ ධර්‍මශාස්ත්‍රධර ස්ථවිරයන් වහන්සේලා සතළිස් සතරනමකගෙන් හා ගිහි මහතුන් සදෙනෙකුගෙන් ද යුක්ත වේ. එහි සභාපති ධුරය කොළඹ විද්‍යොදයමහාවිද්‍යාලයයෙහි උපප්‍රධානාචාර්‍ය්‍ය වූත්, එහි අධ්‍යාපනාධිකාරී වූත්, අතිගරු පණ්ඩිතාචාර්‍ය්‍ය වැලිවිටියේ ශ්‍රී සොරතාභිධාන නායක ස්වාමීන්ද්‍රයන් වහන්සේ උසුලති. සම්පාදකධුරය උසුලන්නේ කොළඹ දෙවටගොඩ ධර්‍මදූතග්‍රන්ථවිද්‍යාලයාධිපති වූ අතිගරු දර්ශනවිශාරද (පී එච්. ඩී.) පරවාහැර ශ්‍රී වජ්‍රඥානාභිධාන නායක ස්වාමීන්ද්‍රයන් වහන්සේ ය. මේ සභාපතිධුරය හා සම්පාදකධුරය ත්‍රිපිටක පරිවර්‍තනකාරකසභාව කෙරෙහි බෞද්ධමහාජනයාගේ ගෞරවය හා විශ්වාසය තහවුරු වීමට කරුණු වේ. එසේ ම එය ත්‍රිපිටකපරිවර්‍තනකෘත්‍යය ශීඝ්‍ර ව පරිසමාප්ත වීමට අසහාය හේතුව වශයෙන් ද සැලකිය යුත්තේ ය. මුන්වහන්සේලාගේ පාලනයෙන් හා සංවිධානයෙන් ත්‍රිපිටකපරිවර්‍තන කාරකසභාව ද ඒ කෘත්‍යයෙහි උනන්දුවෙන් ක්‍රියා කරන්නේ ය. එනෙයින් කල් නො යවා මෙතෙක් නො ලැබූ සිංහලත්‍රිපිටකයක් සිංහලබෞද්ධ-මහාජනයා අතට පත් වන්නේ ය.
සිංහලත්‍රිපිටකය
ත්‍රිපිටකපාලියෙහි සමහර කොටස් හා අටුවා පෙර සිංහලභාෂාවෙන් පැවති බව ඉතිහාසයෙන් පෙනේ. දළඬු සිංහලයෙන් ලියූ සිංහලසාහිත්‍යයට නැගුනු සම්භාවනීය වූ සිංහලගද්‍යපද්‍ය දහම් පොත් රාශියක් තිබේ. එහෙත් මෙයට කලින් සම්පූර්‍ණත්‍රිපිටකපාලිය සිංහලයට නැගීමෙක් කවදාවත් නො වූයේ යයි සිතමු. එසේ සලකනවිට දෙදහස් පන්සියයේ බුද්ධජයන්ති නිමිත්තෙන් ඉතිහාසයේ ප්‍රථම වරට සිංහලයාට සිංහලත්‍රිපිටකයක් ලැබීමේ භාග්‍යය උදා වූයේ ය.
සංස්කාරකමණ්ඩලය
ත්‍රිපිටකපරිවර්‍තකපණ්ඩිතස්ථවිරයන් වහන්සේලා විසින් කරණු ලබන සිංහලපරිවර්‍තන ඒ ඒ ආචාර්‍ය්‍යපරම්පරා අනුව යෑමෙන් එකකට එකක් වෙනස් විය හැක්කේ ය. එහෙයින් ඒ හැම පරිවර්තන ම සංශෝධනය කොට පදයෝජනා, වාක්‍යයෝජනා, අර්‍ථවාචනාදිය හැකි පමණින් සමාන කොට ප්‍රවචනයාගේ යථාර්ථාවබෝධයට සරි ලන සේ සකස් කිරීම සඳහා මේ මණ්ඩලය පිහිටුවන ලද්දේ ය.
පරිවර්තනය සඳහා පොත් පිළිගැන්වීම
ලංකාබෞද්ධමණ්ඩලයේ මෙහෙයීම පරිදි එක්දහස් නවසියපණස් පස්වන ක්‍රිස්තු වර්‍ෂයෙහි මාර්තු මස දහනවවන දින කොළඹ රාජකීය විද්‍යාලයයෙහි මුළු දෙවුනු ගිහිපැවිදි මහාසභාවේ දී එකල අග්‍රාමාත්‍ය වූ ජෝන් කොතලාවල මහතා විසින් බෞද්ධමණ්ඩලය වෙනුවෙන් ත්‍රිපිටක-පරිවර්‍තනකාරකසභාවේ මහාස්ථවිරයන් වහන්සේලා සූසාලිස් නමකට ත්‍රිපිටකය සිංහලභාෂාවට නගන්නට ආරාධනා කොට ඒ ඒ පොත් ඒ ඒ ස්ථවිරයන් වහන්සේලාට පිළිගන්වන ලදී. මේ වනාහි වලගම්බා රජු දවස මාතලේ අලුලෙන දී ත්‍රිපිටකය ග්‍රන්ථාරූඪ කිරීමෙන් පසු ඇති වූ ශ්‍රෙෂ්ඨසිද්ධිය සේ පිළිගත යුතු ය.