02 පාචිත්තිය පාළි 1 භික්ෂු විභංගය - විනය.pdf
- ප්‍රකාශිත වර්ෂය :
- 2005
- මුද්‍රිත වර්ෂය :
- 2005
- පිටු ගණන :
- 592
- බාගත කිරීම් ගණන :
- 3,549
- වෙබ් අඩවියට එක් කළ දිනය :
- 2015-10-18
- ගොනුවේ ප්‍රමාණය :
- 14 MB
පොතේ පිටු කිහිපයක ඡායාරූප පහතින් බලන්න.
බුද්ධ ජයන්ති ත්‍රිපිටක ග්‍රන්ථ මාලාවේ 2 (1) වන වෙළුම ලෙස පළ වූ පාචිත්තිය පාලි - ප්‍රථම භාගය විනය පිටකයට අයත් ග්‍රන්ථයකි. මෙහි භික්ෂු විභංගයේ පාචිත්තිය ශික්ෂාපද අන්තර්ගත වේ.
ලංකා බෞද්ධ මණ්ඩලයේ ආරාධනයෙන් ශ්‍රී ලංකා රාමඤ්ඤ නිකායේ මහානායක ධුරන්ධර විද්‍යාවිශාරද රාජකීය පණ්ඩිත ඉඳුරුවේ උත්තරානන්ද මහානායක ස්ථවිරයන් වහන්සේ විසින් සිංහල පරිවර්තනය සිදු කර ඇති අතර, ත්‍රිපිටක පරිවර්තන සම්පාදක මණ්ඩලය මගින් සංශෝධනය කර ඇත. ලබුගම ලංකානන්ද ප්‍රධාන සංස්කාරක ස්වාමීන්ද්‍රයන් වහන්සේගේ සංස්කාරක නිවේදනයක් සහ පාළි හෝඩිය, සංකේත නිරූපණය, ගාථාපාද ආදී අනුක්‍රමණිකා මෙහි අඩංගුය.
පාචිත්තිය පාලියේ විශාලත්වය නිසා ප්‍රථම භාගය ලෙස භික්ඛු විභංගයේ මුසාවාද, භූතගාම, සහ භික්ඛුනොවාද ආදී වග්ගයන්හි විස්තර පෙළ සහ සිංහල පරිවර්තනය මුහුණට මුහුණ ලා මුද්‍රණය කර ඇත.
සංස්කාරක නිවේදනය
මහාකාරුණික වූ තථාගත සම්මාසම්බුදුරජාණන්වහන්සේ විසින් පන්සාළිස්වසක් මුළුල්ලෙහි සදෙවක ලොකයාට ලොකනිබ්බාපණයෙන් අමාමහනිවන්සුව සාධාලනු සඳහා දේශනා කර වදාළ තෙවළා දහමෙහි භික්ෂූන්ගේ කාය වාක් සංවරය පිණිස ප්‍රඥප්ත වූ ද අනුප්‍රඥප්ත වූ ද ශික්ෂාසංග්‍රහ ලත් විනයසද්ධර්මය විනයපිටක නම් විය. විභංග ඛන්ධක පරිවාර විසින් ත්‍රිවිධ වූ විනයපිටකය ධර්මසංග්‍රාහක මහරහතුන් විසින් පාරාජී, පාචිති, මහාවග, චුළ්ලවග, පරිවාර, යයි පාළි විසින් ග්‍රන්ථ පසෙක ලා සංගීත වෙයි. මහා විභංගයෙහි පාරාජික කාණ්ඩය පටන් භික්ඛු විභංගය හා භික්ඛුනී විභංගය අවසන් කොට ප්‍රඥප්ත ශික්ෂාපද බැසගෙන සිටි පාළිප්‍රදේශය පාචිත්තියපාළි නම් වේ.
බුද්ධපරිනිර්වාණයෙන් දෙදහස්පන්සිය වසක් පිරුණු ජයන්ති අනුස්මරණ උත්සවය නිමිත්ත කොටගෙන ශ්‍රීලංකා බෞද්ධමණ්ඩලය මගින් ප්‍රාරබ්ධ වූ ත්‍රිපිටක බුද්ධවචනය හෙළබසින් තබාලීමේ මහඟු කාර්යය සිදුකිරීමෙහි ලා පාචිත්තියපාලිය සිංහලයෙන් පරිවර්තනය සඳහා ආරාධනා ලැබුවාහු ශ්‍රීලංකාරාමඤ්ඤනිකායේ මහානායක පදප්‍රාප්ත විද්‍යාවිශාරද, රාජකීය පණ්ඩිත ඉඳුරුවේ උත්තරානන්දාභිධාන මහාස්ථවිරපාදයන් වහන්සේ යැ. ධර්මවිනයෙහි ආචරිත බුද්ධි ඇති, සිංහල ඡන්දොව්‍යවහාරයෙහි දු නිපුණ වූ මහානායක ස්ථවිරයන් වහන්සේ ස්වාධිකාරය මැනවින් ඉටුකළහ. අවුරුදු එකුන්විස්සකට පමණ පෙර මුද්‍රණයට යොමු කොට තුබූ පාචිත්තියපාලිය චන්ද්‍රමුද්‍රණාලයෙහි අකර්මණ්‍යභාවයෙන් අතරමං වූයේ සංස්කෘතික අමාත්‍යාංශයේ අතිරේක ලේකම් සෝමපාල ජයවර්ධන මහතාණන්ගේ කාර්යක්ෂම සැලැසුම් හේතුවෙන් මෙසේ පළකරවන්නට හැකිවූ බව පවසම්හ.
ත්‍රිපිටක ග්‍රන්ථමාලාවෙහි දෙවැනි ග්‍රන්ථය වශයෙන් සලකන ලද පාචිත්තියපාලිය අර්ථාවබෝධයට පහසු වන සේ යථාස්ථානයෙහි ඡේද වෙන්කරමින් සිංහල පරිවර්තනය සමග මුද්‍රණය කරැවීමේදී පරිහරණයට සුකර නො වන සේ ග්‍රන්ථය මහත් වැ යන බව පෙනුණු හෙයින් භික්ඛුවිභංගය තෙක් ප්‍රථම භාගය වශයෙනුදු භික්ඛුනීවිභංගය අවසාන කොට ඇති ශේෂය ද්විතීය භාගය වශයෙනුදු මුද්‍රණය කරවන්නට සිදුවූ බව ද පවසම්හ. වර්තමාන ත්‍රිපිටක සම්පාදක මණ්ඩලයේ බහුශ්‍රුත මහතෙරවරුන් විසින් ඌන වැ තුබූ තැන් සපුරාලමින් තව දුරටත් සංස්කරණය කොට ආවශ්‍යක වූ ශබ්දසූචී ආදිය ද සම්පාදනය කොට අපගේ ද පරිශ්‍රමයෙන් පාඨශෝධනාදිය කොට පාචිත්තියපාළි ප්‍රථම භාගය මෙසේ පළකරවන්නට හැකි වූ බව පවසම්හ.
මෙ මැ උදාරතර ධර්මදානමය කුශලහේතුවෙන් මේ සඳහා පූර්ණ අනුග්‍රහය දෙන ශ්‍රීලංකා ප්‍රජාතාන්ත්‍රික සමාජවාදී ජනරජය ද, බෞද්ධමණ්ඩලයේ සුධීහු ද ගරු සංස්කෘතික කටයුතු පිළිබඳ ඇමතිතුමාණන් ප්‍රමුඛ සංස්කෘතික අධිකාරියෙහි පින්වත්හු ද මෙහිලා උපකාරිභූත වූ හැම සත්පුරුෂයෝ ද ලොව් ලොවුතුරු සුව ලබත්වා’යි ආශංසනය කරම්හ.
පරිවර්තක මහානායක ස්ථවිරයන් වහන්සේ ලියූ විනය පිළිබඳ දීර්ඝ ප්‍රස්තාවනාව ද්විතීය භාගයෙහි ඇතුළත් කරනු ලැබේ.
මෙවගට, ශාසනොදයකාරී, ලබුගම ලඞ්කානන්ද ස්ථවිර
ත්‍රිපිටකමණ්ඩලයේ ප්‍රධාන සම්පාදක
1981 ජූලි 10 දින
කොළඹ 7, විජේරාම මාවතේ
අං: 115 දරන, මහානායකචාරිකාරාමයේ
ත්‍රිපිටකමණ්ඩලය.