1172. පුණ්ණමාසෙ යථා චන්දො නක්ඛත්තපරිවාරිතො,
සමන්තා අනුපරියාති තාරකාධිපතී සසී.

1173. තථූපමං ඉදං ව්යම්හං දිබ්බං දෙවපුරම්භි ච.
අතිරොචති වණ්ණෙන උදයන්තොව රංසිමා.

1174. වෙළුරියසුවණ්ණස්ස ඵලිකා රූපියස්ස ච.
මසාරගල්ලමුත්තාහි ලොහිතඞ්කමණීහි ච.

1175. චිත්රා මනොරමා භූමි වෙළුරියස්ස සන්ථතා,
කූටාගාරා සුභා රම්මා පාසාදො තෙ සුමාපිතො.

1176. රම්මා ච තෙ පොක්ඛරණී පුථුලොමනිසෙවිතා,
අච්ඡොදිකා විප්පසන්නා සොණ්ණවාලුකසන්ථතා.

1177. නානාපදුම සඤ්ඡන්නා පුණ්ඩරීකසමොතතා
සුරභිං සම්පවායන්ති මනුඤ්ඤා මාළුතෙරිතා.

1178. තස්සා තෙ උභතො පස්සෙ වනගුම්බා සුමාපිතා,
උපෙතා පුප්ඵරුක්ඛෙහි ඵලරුක්ඛෙහි චූභයං.

1179. සොවණ්ණපාදෙ පල්ලඞ්කෙ මුදුකෙ චොලසන්ථතෙ,
නිසින්නං දෙවරාජංව උපතිට්ඨන්ති අච්ඡරා.

1180. සබ්බාභරණසඤ්ඡන්නා නානාමාලා විභූසිතා,
රමන්ති තං මහිද්ධිකං වසවත්තීව මොදසි.

1181. භෙරිසඞ්ඛමුදිඞ්ගාහි වීණාහි පණවෙහි ච,
රමසි රතිසම්පන්නො නච්චගීතෙ සුවාදිතෙ.

1182. දිබ්බා තෙ විවිධා රූපා දිබ්බා සද්දා අථො රසා,
ගන්ධා ච තෙ අධිප්පෙතා ඵොට්ඨබ්බා ච මනොරමා.

1183. තස්මිං විමානෙ පවරෙ දෙවපුත්ත මහප්පභො,
අතිරොචසි වණ්ණෙන උදයන්තොව භානුමා.

1184. දානස්ස තෙ ඉදං ඵලං අථො සීලස්ස වා පන,
අථො අඤ්ජලිකම්මස්ස තං මෙ අක්ඛාහි පුච්ඡිතොති.

1185. සො දෙවපුත්තො අත්තමනො මොග්ගල්ලානෙන පුච්ඡිතො,
පඤ්හං පුට්ඨො වියාකාසි යස්ස කම්මස්සිදං ඵලං.

1186. අහං කපිලවත්ථුස්මිං සාකියානං පුරුත්තමෙ,
සුද්ධොදනස්ස පුත්තස්ස කන්ථකො සහජො අහං.

1187. යදා සො අඩ්ඪරත්තායං බොධාය මභිනික්ඛමි,
සො මං මුදූහි පාණීහි ජාලතම්බනඛෙහි ච.

1188. සත්ථිං ආකොටයිත්වාන වහ සම්මාති ච බ්රවී,
අහං ලොකං තාරයිස්සං පත්තො සම්බොධිමුත්තමං.

1189. තං මෙ ගිරං සුණන්තස්ස හාසො මෙ විපුලො අහු,
උදග්ගචිත්තො සුමනො අභිසිංසිං තදා අහං.

1190. අභිරූළ්හඤ්ච මං ඤත්වා සක්යපුත්තං මහායසං,
උදග්ගචිත්තො මුදිතො වහිස්සං පුරිසුත්තමං

1191. පරෙසං විජිතං ගන්ත්වා උග්ගතස්මිං දිවාකරෙ,
මමං ඡන්නඤ්ච ඔහාය අනපෙක්ඛො සො අපක්කමි.

1192. තස්ස තම්බනඛෙ පාදෙ ජිව්හාය පරිලෙහිසං,
ගච්ඡන්තඤ්ච මහාවීරං රුදමානො උදික්ඛිසං.

1193. අදස්සනෙනහං තස්ස සක්යපුත්තස්ස සිරීමතො,
අලත්ථං ගරුකාබාධං ඛිප්පං මෙ මරණං අහු.

1194. තස්සෙව අනුභාවෙන විමානං ආවසාමිදං,
සබ්බකාමගුණොපෙතං දිබ්බං දෙවපුරම්භි ච

1195. යඤ්ච මෙ අහුවා හාසො සද්දං සුත්වාන බොධියා,
තෙනෙව කුසලමූලෙන ඵුසිස්සං ආසවක්ඛයං.